28°C , Partly sunny | Kigali-Rwanda

COVID-19: Umunsi Nyafurika uratwibutsa ibyiza by’ubufatanye- Kagame

Yanditswe na NTAWITONDA JEAN CLAUDE

Ku ya 25-05-2020 saa 16:46:32

Perezida wa Repubulika y’u Rwanda Paul Kagame yifatanyije n’Umugabane wose kwizihiza Umunsi W’Ubwigenge bw’Afurika (Africa Day) wabaye kuri uyu wa 25 Gicurasi 2020, yibutsa agaciro ko kunga ubumwe mu kugera ku ntego.

Uwo munsi w’Ubwigenge bw’Afurika wizihijwe ku nsanganyamatsiko igira iti: “Gucecekesha imbunda: Kuremera ikirere kiza iterambere ry’Afurika.”

Perezida Kagame yashimangiye ko nubwo uyu munsi Nyafurika ubaye mu bihe bigoye aho Afurika n’Isi yose ihanganye n’Icyorezo cya Koronavirusi (COVID-19), ukwiye gusiga isomo ry’ubufatanye mu guharanira imibereho myiza.

Ati: “Ubwo twizihiza Umunzi w’Ubwigenge bw’Afurika, ibi bihe bigoye biributsa buri umwe muri twe ko imibereho myiza duhuriyeho, iterambere n’agaciro bizagerwaho binyuze mu guhuza intumbero.”

Yakomeje ashimira Perezida w’Afurika y’Epfo akaba n’Umuyobozi w’Umuryango w’Ubumwe bw’Afurika (AU) Cyril Ramaphosa ndetse na Perezida wa Komisiyo ya AU Moussa Faki Mahamat, ku buyobozi bwiza bwerekeza  Abanyafurika kuri Afurika bakeneye.

Kuri uyu munsi, Cyril Ramaphosa yongeye kwibutsa Isi yose ko ibisubizo by’ibibazo by’Afurika biri mu maboko y’Abanyafurika, harimo n’icyorezo cya KCOVID-19.

Yagize ati: “Nubwo COVID-19 atari umwihariko w’Afurika yonyine, byagaragaye ko dushobora kugisohokamo vuba kandi mu buhanga. Iki cyorezo cyatwibukije ko hatitawe ku nkomoyo ya gikire cyangwa mu bukene, twese turapfa kandi, twakwibasirwa n’icyorezo kimwe.”

Yashimangiye ko nubwo ibihugu bitandukanye by’Afurika bigaragara nk’aho bikennye ariko uburyo byahuye n’ibyorezo n’izindi ngorane zitandukanye, byasigiye Abanyafurika umwihariko wo kumenya uko bahangana na byo akenshi bitanabasabye ikiguzi gihambaye.

Guhera mu ntangiriro z’ukwezi kwa Gicurasi, ibihugu 43 byari byarafashe umwanzuro wo gufunga imipaka mu kwirinda COVID-19, ibigera kuri 53 byarafunze amashuri n’ahandi hose hahurira abantu benshi, 26 byagize kwambara agapfukamunwa itegeko, 32 bifunze ingendo z’ijoro, 18 bikiri mu mabwiriza yo kuguma mu rugo.

Kugeza ubu muri Afurika hamaze kuboneka abarwayi 112,290 ba COVID-19, barimo 44,920 bakize na 3,359 bambuwe ubuzima n’icyo cyorezo. Abo batahuwe babarirwa muri miriyoni zirenga 5.5 z’abamaze kuboneka ku Isi yose.

Loni irasaba ibihugu by’Afurika gukoresha imbaraga nk’izo byakoresheje mu kwirinda COVID-19 bikumira amakimbirane n’akarengane kakira ngwa mu bihugu bimwe na bimwe.

Umwanditsi:

NTAWITONDA JEAN CLAUDE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.