22°C , Partly sunny | Kigali-Rwanda

COVID-19: U Rwanda rwashimiwe kubahiriza amasezerano y’i Paris

Yanditswe na NTAWITONDA JEAN CLAUDE

Ku ya 21-05-2020 saa 08:03:21

Umunyarwanda yaciye umugani agira ati: “Aho imfura zisezeraniye ni ho zihurira ihatanze indi irahaborera”, ukaba usobanuye ko ari byiza kubahiriza amasezerano kabone n’iyo ibintu byaba bisa n’aho bigoye.

Muri ibi bihe bitoroheye Isi yose yugarijwe n’icyorezo cya Koronavirusi (COVID-19), ibihugu bitandukanye byerekeje imbaraga z’ubushobozi n’ibitekerezo mu rugamba rwo guhangana n’icyo cyorezo ku buryo bitabyoroheye kubahiriza zimwe mu nshingano bigomba Umuryango Mpuzamahanga.

Leta y’u Rwanda  ikomeje gushimirwa ko itirengagije n’izindi nshingano igomba kuzuza ziyongera ku gufatanya n’Umuryango Mpuzamahanga guhangana n’ingaruka z’icyo cyorezo.

Umunyamabanga Nshingwabikorwa w’Urwego rwashyiriweho kubahiriza Amasezerano y’Umuryango w’Abibumbye Yerekeye Imihindagurikire y’Ikirere (UNFCCC) Patricia Espinosa Cantellano, yashimiye u Rwanda nk’Igihugu cyabimburiye ibindi mu kugaragaza ibyo kiyemeje gukora mu kubahiriza amasezerano y’i Paris yerekeye imihindagurikire y’ikirere.

Ayo masezerano mpuzamahanga agena uburyo bwo gushyira mu bikorwa ingamba zo gukumira izamuka ry’igipimo mpuzandengo cy’ubushyuhe bw’Isi, kikava kuri  dogere 2 (2°C) kikagera hasi ya dogere 1.5 (1.5°C).

Patricia Espinosa yagize ati: “Kubera ko COVID-19 itigijeyo ihumana ry’ikirere, niteguye kubona ingamba nshya z’ibindi bihugu zo guhangana n’imihindagurikire y’ibihe nk’uko bikubiye mu masezerano y’i Paris. Ndashimira u Rwanda ko rwatwoherereje ingamba zarwo zivuguruye. Twishimiye kubona ubushake bwanyu mu gutegura ahazaza harambye…”

Umunyamabanga Nshingwabikorwa wa UNFCCC Patricia Espinosa Cantellano yashimiye u Rwanda

Nka kimwe mu bihugu byibasiwe n’imihindagurikire y’ikirere, u Rwanda rushishikajwe no gushyiraho ingamba zo kugabanya imyuka ihumanya ndetse no kurushaho kubaka ubudahangarwa ku mihindagurikire y’ibihe.

Amasezerano y’ i Paris atanga umurongo wo kugera kuri izi ntego binyuze mu bufatanye bw’Umuryango Mpuzamahanga no gushyigikira ibihugu byibasiwe n’ingaruka z’imihindagurikire y’ikirere.

Ayo masezerano yagizwe itegeko mu Rwanda binyuze mu Iteka rya Perezida wa Repubulika Paul Kagame ryemeza Burundu Amasezerano y’i Paris ashamikiye ku Masezerano y’Umuryango w’Abibumbye Yerekeye Imihindagurikire y’Ibihe.

Ku wa 6 Ukwakira 2016, ni bwo u Rwanda rwagejeje ku Munyamabanga Mukuru w’Umuryango w’Abibumbye inyandiko igena iyemezwa ry’ayo masezerano, kuri ubu rukaba ruri mu bihugu 189 byiyemeje kurinda no kuyashyira mu bikorwa .

Umwanditsi:

NTAWITONDA JEAN CLAUDE

One Comment on “COVID-19: U Rwanda rwashimiwe kubahiriza amasezerano y’i Paris”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.