18°C , Partly sunny | Kigali-Rwanda

COVID-19 : Shampiyona y’Isi  muri  Beach Volleyball yimuriwe muri Kamena 2022

Yanditswe na BUGINGO FIDELE

Ku ya 27-04-2020 saa 01:09:04
Ikipe y'u Rwanda mu bagabo yari igizwe na Ntagengwa na Akumuntu ubwo yari yitabiriye shampiyona y'Isi muri 2019

Kubera icyorezo cya Koronavirusi cyurije Isi muri iyi minsi hari ibikorwa by’imikino itandukanye  mpuzamahanga byasubitswe ibindi byimurirwa ikindi gihe.

Ishyirahamwe ry’umukino wa Volleyball ku Isi “FIVB” ryamaze gutangaza ko imikino ya nyuma ya shampiyona y’Isi mu mukino wa Volleyball ikinirwa ku mucanga “FIVB Beach Volleyball World Championships”  yagombaga  kubera mu mujyi wa Roma mu Butaliyani  umwaka utaha wa 2021 yimuririwe muri Kamena 2022 nabwo ikazabera mu Butaliyani.

Iyi mikino yimuwe nyuma y’aho  iki cyorezo cyatumye hari indi mikino yagombaga kuba muri uyu mwaka wa 2020  yimuriwe  umwaka  utaha  wa 2021.

Muri iyi mikino harimo imikino Olempike  yagombaga   kubera mujyi wa Tokyo mu Buyapani kuva tariki 24 Nyakanga kugeza 09 Kanama 2020  naho   tariki 25 Kanama kugeza 06 Nzeri 2020 hakaba imikino Paralempike ariyo  y’abafite ubumuga. Iyi mikino rero byemejwe ko yimurirwa umwaka utaha wa 2021 aho imikino Olempike izaba tariki 23 Nyakanga kugeza 8 Kanama 2021 naho imikino Paralempike ikaba tariki 24 Kanama kugeza 05 Nzeri 2021.

Kwimura iyi shampiyona y’Isi byemejwe  nyuma y’inama  yahuje ubuyobozi bwa FIVB, Komite Olempike y’u Butaliyani ndetse n’ishyirahamwe ry’umukino wa Volleyball muri iki gihugu.

Perezida wa FIVB, Ary da Silva Graça Filho yavuze ko kwimura iyi mikino ari cyo gisubizo bari bafite kuko kubera iriya mikino izaba umwaka utaha wa 2021 bitari kubangikana. Yakomeje avuga ko yizeye ko bizagenda neza kuko umujyi wa Roma ari inshuro ya kabiri  ugiye kwakira irushanwa nk’iri nyuma yo kuryakira muri 2011.

Ku ruhande rwa Perezida wa Komite Olempike y’u Butaliyani, Giovanni Malagò yavuze ko  shampiyona y’Isi ya Beach Volleyball ari irushanwa ryo ku rwego rwo hejuru. Yakomeje avuga ko bashyigikiye iki kemezo cyo kuryimurira muri 2022 kandi bizeye ko  rizagenda neza kuko bazafatanya bose kuritegura.

Iri rushanwa mu busanzwe riba buri myaka 2, ubwo ryaherukaga kuba muri 2019 ryari ryabereye mu Budage mu mujyi wa Hamburg aho mu bagabo  ikipe ya Oleg Stoyanovskiy  na  Viacheslav Krasilnikov (Russia) yegukanye umudari wa zahabu itsinze ku mukino wa nyuma ikipe ya  Clemens Wickler  na Julius Thole (u Budage) amaseti 2-1.

Abitwaye neza mu kiciro cy’abagabo

Mu bagore irushanwa ryegukanwe na Melissa Humana-Paredes na Sarah Pavan (Canada) batsinze ku mukino wa nyuma  ikipe ya Alix Klineman na April Elizabeth Ross (USA) amaseti 2-0.

Ikipe yegukanye irushanwa mu kiciro cy’abagore

Iri rushanwa rikaba ryari ryitabiriwe n’ikipe y’u Rwanda mu bagabo yari igizwe na Ntagengwa Olivier afatanyije na Akumuntu Kavalo Patrick ndetse n’ikipe y’abagore  yari igizwe na  Nzayisenga Charlotte na Hakizimana Judith. Izi kipe z’u Rwanda ariko zaviriyemo mu majonjora.

Ntagengwa Olivier (ibumoso) na Akumuntu Kavalo Patrick

Hakizimana Judith (2) na Nzayisenga Charlotte

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.