22°C , Partly sunny | Kigali-Rwanda

COVID-19: RBC yorohereje abakenera serivisi zo kurwanya SIDA

Yanditswe na TUMUKUNDE GEORGINE

Ku ya 25-01-2021 saa 15:51:45
Abantu barakangurirwa kwipimisha bakamenya uko bahagaze

Ikigo k’Igihugu gishinzwe Ubuzima (RBC) kiratangaza ko kuva icyorezo cya COVID-19 kigeze mu Rwanda serivisi zo kurwanya Virusi itera SIDA zitahagaze, zikomeje gutangwa kandi hashyizweho uburyo bworohereza abazikeneye kuzibona hafi yabo ntibakore ingendo zitari ngombwa ngo babe bakurizamo kwandura Koronavirusi.

Muri iki gihe cya “Guma mu karere”, abakeneye izo serivisi, zaba izo gufata imiti igabanya ubukana bwa Virusi itera SIDA n’izindi zijyanye no kwirinda bakwegera ibigo nderabuzima biri muri buri murenge bakazihabwa ku buntu.

Hashyizweho n’umurongo 1245 utishyurwa wahamagarwaho n’ugize ikibazo cyaba ikirebana n’ubuvuzi akaba yabubona bumworoheye cyangwa se ik’imiti akaba yayishyikirizwa aho ari.

Mu kiganiro n’Imvaho Nshya, Sangwayire Beatha Umuyobozi w’agateganyo w’Agashami gashinzwe gukumira ubwandu bushya bwa virusi itera SIDA muri RBC, yagize ati: “Mu mirenge hose haba hari ikigo nderabuzima gitanga serivisi zo kurwanya SIDA kandi ku buntu, kuba uturere dufunze na Guma mu rugo mu Mujyi wa Kigali, nta bwo ari ikibazo kidafite igisubizo ahubwo twakongera gukangurira abantu ko serivisi zihari ziboneka”.

Yongeyeho ati: “Twese nubwo duhugiye ku kwirinda COVID ntitwibagirwe ko tugomba no kwirinda SIDA, uburyo bwo kuyirinda burahari mu mavuriro atwegereye. Turakangurira abantu kwipimisha bakamenya uko bahagaze, bagasaba serivisi, ari udukingirizo ku wananiwe kwifata, ari ukwisiramuza,… Izo ni serivisi ziboneka kandi zifasha umuntu kwirinda Virusi itera SIDA”.

Ntawukwiye gucikiriza imiti igabanya ubukana bwa Virusi itera SIDA

Dr. Habimana Dominique Savio umukozi wa RBC ushinzwe Ubuvuzi bw’abafite Virusi itera SIDA, na we ashimangira ko bashyizeho ingamba zituma serivisi zikomeza gutangwa, abakenera imiti ntibayibure.

Yagize ati: “Twasabye ko hajya hatangwa imiti nibura irenze ukwezi kumwe abantu bafite Virusi itera SIDA bagatwara iy’igihe kinini kugira ngo bibarinde gukora ingendo nyinshi zitari ngombwa”.

Dr. Habimana Dominique Savio umukozi wa RBC ushinzwe Ubuvuzi bw’abafite Virusi itera SIDA

Muri iki gihe hariho gahunda ya “Guma mu Karere ndetse na Guma mu rugo mu Mujyi wa Kigali”, kandi hakaba hari abajyaga bafatira imiti ahantu hatandukanye mu gihugu kuko buri wese afite uburenganzira bwo kuyifatira aho yifuza, Dr. Habimana yasobanuye uko na bo ikibazo cyabo cyashakiwe umuti.

Avuga ko basabye abaganga muri rusange n’abantu bose batanga serivisi zikenerwa n’abafite Virusi itera SIDA, ko uzajya abageraho wese afite ikarita yerekana ko asanzwe afata imiti bagomba kumufasha bakayimuha.

Nta kibazo k’ibura ry’imiti gihari

Dr. Habimana Dominique Savio avuga ko u Rwanda rutumiza mu mahanga imiti igabanya ubukana bwa Virusi itera SIDA, nubwo hagiye habaho guhagarika ingendo zihuza ibihugu kubera COVID-19, nta kibazo cyabayeho cyo kuyibura.

Ati: “Kubera ko dusanzwe dutumiza imiti hanze tukagira ububiko buhagije; kuri buri bwoko bw’umuti tukaba dufite ishobora kumara hagati y’amezi 9 na 14, kugeza uyu munsi nta kibazo gikomeye cyo kubura imiti twagize mu gihugu. Iyo tuyifite mu gihugu rero no mu bitaro, muri farumasi z’uturere igeramo no ku bigo nderabuzima ikahagera mu buryo bworoshye”.

Agaragaza ko bakomeje gukurikirana uko izi serivisi z’ubuvuzi zitangwa ahakiri imbogamizi zigakemurwa.

Hari uburyo bwo gukurikirana abafite ibibazo byihariye

Ku bijyanye n’uko hari abashobora kudafata imiti neza muri ibi bihe byo guhangana na COVID-19, bafite ibibazo byihariye, Dr. Habimana yavuze ko hari uburyo bwo kubakurikirana bagafashwa.

Ati: “Hari nk’abantu bake twagiye twumva ko badafata imiti neza, umuntu akavuga ati kubera ko nabuze akazi nta bwo ndimo kurya uko bikwiye, kandi iriya miti iba ikeneye ko abona ifunguro ryuzuye, abo twagiye tubabarura abo tubona ko bikwiriye ko bakwiriye ubufasha, dufatanyije n’ubuyobozi bw’Inzego z’ibanze ndetse n’abaterankunga bacu n’abafatanyabikorwa tugerageza kubashakira ubufasha bujyanye n’imirire, ku buryo babona inyunganizi mu mirire bakeneye. Gusa nta bwo kunywa imiti neza bisaba kuba wariye byinshi, ahubwo kurya indyo yuzuye ni inyunganizi ku mikorere y’imiti”.

Yakomeje avuga ko n’ibibazo by’abashobora kubura kwa muganga muri gahunda yo gukurikiranwa babakurikirana binyuze muri gahunda yiswe “Home visit”, ikorwa n’abaganga bo ku bigo nderabuzima, bajya kubareba aho batuye.

Hari kandi abitwa “Abajyanama b’urungano” (abafite Virusi itera SIDA b’abakorerabushake) bari muri buri kagari bafasha bagenzi babo bafite virusi bakabakurikirana kugira ngo bafate imiti neza, bababa hafi bakabagira inama nkuko byasobanuwe na Semafara Sage UmunyamabangaNshingwabikorwa w’Urugaga Nyarwanda rw’Abafite Virusi itera SIDA (RRP+).

Semafara Sage Umunyamabanga Nshingwabikorwa wa RRP+

Ashimangira ko bakomeje gukora ibishoboka kugira ngo hatagira abantu bava ku miti kubera ingamba zo kurwanya COVID-19 zirimo izo kuguma mu karere no kuguma mu rugo.

Semafara arasaba kandi abafata imiti gukomeza kuyifata neza bakabijyanisha no kubahiriza ingamba zo kwirinda COVID-19.

Ati: “Koronavirusi na Virusi itera SIDA bikumirwe byombi nta kirengagijwe. Abafite Virusi ya SIDA bafate imiti neza kuko iki gihe nticyoroshye ku bafite iyo virusi”.

Abafata imiti neza bafite ubuhamya

Umubyeyi twitiriye Nyiramana ku mpamvu z’umutekano we, wo mu Ntara y’Iburasirazuba ni umwe mu bafite Virusi itera SIDA, avuga ko akomeje intego yo gufata imiti neza kuko yabonye akamaro kabyo kandi akanashima ko muri ibi bihe bya COVID-19 bakomeje kuyibona uko bikwiye.

Amaze imyaka igera kuri 18 amenye ko afite iriya virusi, akibimenya kubyakira byaramugoye, ntiyabashaga no gufata imiti neza, ariko ngo aho amenyeye ko uwubahirije inama agirwa n’abaganga aramba kandi agatera imbere, yiyemeje kuzubahiriza.

Ati: “Nkimara kumenya ko nanduye narabicecetse mara nk’umwaka, bampaye imiti bwa mbere ndayinywa ariko ngira isoni zo gusubirayo, naje kurwara indwara nyinshi zitandukanye, nsubiye kwipimisha nsanga ngeze habi, numvaga ko ngiye gupfa […]. Bongeye kumpa imiti, muganga akajya anganiriza, ambwira ko iyo ufashe imiti neza ubuzima bukomeza ushobora no kwiyongeraho imyaka nka 20, kugeza ubungubu ndabona na 40 na 50 izagera”!

Nyiramana arahamagarira bagenzi be gufata imiti neza. Ati: “Bafate imiti neza kandi bumve ko bafite inshingano zo kubaho ndetse no kubeshaho abandi, bimenye, biyiteho, barye indyo yuzuye, birinde ubusambanyi kugira ngo batayikwirakwiza cyangwa umubiri bakawunaniza, birinde ibiyobyabwenge”.

Serivisi zo kurwanya SIDA zikomeje gutangwa

Izo nama azihurizaho n’ Umujyanama w’urungano wo mu Kagari ka Kabare, Umurenge wa Muhazi mu Karere ka Rwamagana unashima gahunda yashyizweho y’amatsinda bafite bahuriramo bagafashanya, bakaganira ku buryo buri wese yumva ko agomba kwiyitaho agafata imiti. Gusa ngo guhura kenshi byakomwe mu nkokora na COVID-19.

Agaragaza ko bakomeje gufasha bagenzi babo uko bashoboye bakiyakira kuko hakiri bake badafata imiti neza kubera ipfunwe.

Ati: “Ibyo duhura na byo kenshi umuntu yajya gufata imiti yahasanga abantu benshi agahita akata akigendera”.

RBC ivuga ko kugeza ubu abarenga gato ibihumbi 200 bafite Virusi itera SIDA bari ku miti, ariko nanone ishingiye ku ibarurishamibare rihari abari hafi y’ibihumbi 220 ni bo bashobora kuba bafite iyo virusi. Ni ukuvuga ko bariya barengaho badafata imiti bitewe n’uko bataramenya uko bahagaze.

Abakeneye serivisi zo kurwanya SIDA bakwegera n’ibigo nderabuzima mu mirenge

RBC yashyizeho na za kiosk zifasha abakeneye serivisi z’ubuzima zirimo n’izo kurwanya SIDA

Umwanditsi:

TUMUKUNDE GEORGINE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.