21°C , Mostly cloudy | Kigali-Rwanda

COVID-19: Polisi ntiyishe umuco ifata uwambaye agatimba-CP Kabera

Yanditswe na Imvaho Nshya

Ku ya 06-04-2021 saa 14:46:15

Polisi y’u Rwanda yatanze ibisobanuro birambuye ku bikorwa byafatiwemo abantu barimo n’abageni barenze ku mabwiriza yashyiriweho kwirinda icyorezo cya COVID-19, isaba buri wese kubikuramo isomo kuko itazigera idohoka mu kugenzura ko ayo mabwiriza agamije guhangana n’icyo cyorezo cyugarije Isi yashyizwe mu bikorwa.

Icyorezo cya COVID-19 kimaze guhitana abantu 311 mu Rwanda nk’uko bigaragara mu mibare yatangajwe ku wa Mbere, ndetse kugeza ubu abantu bakabakaba 1,800 baracyayirwaye mu gihe batanu muri bo barembye.

Kimwe mu bifasha kugabanya ubukana bw’icyo cyorezo no gutera intambwe mu rugendo wo kugihashya ku Isi yose, ni ugushyiraho amabwiriza yashyiriweho gukumira ko gikomeza gukwirakwizwa mu bantu benshi barimo n’abafite intege nke z’umubiri bigoranye kucyandura bakakirokoka.

Nubwo izo ngamba zishyirirwaho kurinda rubanda, usanga abenshi bazirengaho nkana bitewe n’impamvu zitandukanye zirimo n’imyumvire iri hasi n’izindi, ariko ibyo ntibikuraho ko utabyumva yaba umuyoboro wo kwanduza bagenzi be baba barimo abatabyumva nka we, yewe n’ababyumva bahura na we.

Ni muri urwo rwego Umuvugizi wa Polisi y’u Rwanda CP John Bosco Kabera yaburiye buri wese utekereza ko hari imiterere cyangwa imyitwarire izatuma ataryozwa kurenga ku mabwiriza yo kwirinda no kurinda abandi, yibutsa ko biri mu nshingano za Polisi kugenzura uko amategeko n’amabwiriza bishyirwa mu bikorwa.

Mu Kiganiro yagiranye na Televiziyo y’u Rwanda kuri uyu wa Kabiri, CP Kabera yagarutse ku by’umugeni wajyanywe muri Sitade yambaye agatimba, amashusho ye akaba yakwirakwijwe ku mbuga nkoranyambaga bamwe banenga Polisi ko yirengagije umuco, ndetse ko yakabaye yahannye abo bageni mu bundi buryo.

CP Kabera yagize ati: “Uwarenze ku mabwiriza yaba yambaye agatimba cyangwa uko bamusanze yambaye kose, ikibazo si uwamufotoye cyangwa Polisi yamufashe ikamugaragariza itangazamakuru kugira ngo n’abandi bose babirebereho babitinye babireke. Ikibazo cya mbere ni COVID-19, icya kabiri ni abarenga ku mabwiriza yo kuyirinda kandi bazi neza ko hari ingamba zafashwe, hari amabwiriza abigena, hari n’inzego zigomba kureba ishyirwa mu bikorwa ry’ayo mabwiriza, bakabirengaho.”

Abageni batwawe mu modoka ya Polisi bajyanywe muri Sitade

Yakomeje avuga ko ibyabaye bikwiye kubera abandi isomo, by’umwihariko abafite ubukwe, bigatuma bubahiriza ingamba zashyizweho na Guverinoma zo kwirinda icyo cyorezo.

Ati: “Abatekerezaga gukora ubukwe, ni abantu batarenze 20 bemewe nta kwiyakira (reception), biranditse mu byemezo by’Inama y’Abaminisitiri. Ntekereza ko twareka amarangamutima ahubwo abantu ni ukubagira inama bagakoresha imbuga nkoranyambaga zabo neza bakangurira abandi bafite ibikorwa bitandukanye byemewe kubikora bakurikije amabwiriza.”

CP Kabera yanasobanuye ko uwo mugeni wafashwe akajyanwa muri Sitade hari i Hoteli (Rainbow Hotel) bari barateguye gukoreramo ubukwe, ikarenga ku mabwiriza yakira abantu mu buryo butari bwo bikarangira ifunzwe. Nyiri iyo hoteli ngo yahisemo kujyana abageni iwe mu rugo iwe bajya gukorerayo imihango y’ubukwe itemewe.

“[…]Urumva nyiri hoteli we ubu arafunze… Icyo tugira ngo tuvuge ni iki? Abantu nibirinde kino cyorezo. Abantu nibareke kudohoka, COVID-19 irazwi, ingamba zirazwi, uko abantu bitwara birazwi, ibyo abantu basabwa birazwi biranditse nta n’ubwo ari no kuvuga ngo ni iby’umuntu yitekerereza. Nibabikurikize rero, bareke inzego zibishinzwe zikore akazi kazo, ariko abumva batera inkunga nibayitere babwira abaturage kureka imyitwarire mibi.”

Yashimangiye ko kuba umuntu yambaye agatimba agakosa bidasobanuye ari umwere cyangwa ngo nafatwa yarenze ku mabwiriza byitwe ko Polisi yarenze ku muco, ati: “Kubahiriza amabwiriza nta kurobanura. Nta bwo bireba uwo uri we, ntibireba uko wambaye…”

Yashimangiye ko Polisi y’u Rwanda idateze kudohoka mu gukurikirana uko amategeko n’amabwirizwa byashyizweho na Leta byubahirizwa nk’inshingano zayo nyamukuru ziganisha ku kubungabunga umutekano w’abaturage n’ibyabo muri rusange.

Umuvugizi wa Polisi y’u Rwanda CP John Bosco Kabera

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.