26°C , Partly sunny | Kigali-Rwanda

COVID-19: Oxfam yahagaritse ibikorwa byayo mu Rwanda

Yanditswe na Imvaho Nshya

Ku ya 21-05-2020 saa 08:59:29
Oxfam yagize uruhare mu iterambere ry'umugore mu Rwanda

Umuryango Mpuzamahanga wita ku kurwanya ubukene n’akarengane (Oxfam) wahagaritse ibikorwa byawo mu bihugu 18 n’u Rwanda rurimo kubera ingaruka z’icyorezo cya Koronavirusi (COVID-19).

Oxfam yanatangaje ko mu rwego rwo guhangana n’ingaruka za COVID-19 yanahagaritse abakozi 1,450 mu bakabakaba 5,000 basanzwe bayikorera, bikazagira n’ingaruka ku miryango y’abafatanyabikorwa 700 mu 1,900 isanzwe ikorana na yo mu bihugu bitandukanye.

Ibihugu 18 Oxfam yahagaritse gukoreramo byiyongera ku Rwanda ni Thailand, Afghanistan, Sri Lanka, Pakistan, Tajikistan, Haiti, Dominican Republic, Cuba, Paraguay, Misiri, Tanzania, Sudan, u Burundi, Sierra Leone, Benin, Liberia na Mauritania.

Umuyobozi Nshingwabikorwa wa Oxfam Chema Vera, yagize ati: “ Ndagira ngo nshimire abakozi n’abafatanyabikorwa bacu ku mirimo yuje ubuhanga bakoze bafasha abantu n’imiryango dutera inkunga guhindura ubuzima.”

Oxfam ni Umuryango wakoreye mu Rwanda na Tanzania guhera mu myaka ya 1960, mu mishanga ijyanye n’imiyoborere myiza n’ubutabera, gushyigikira iterambere ry’umugore n’umukobwa no kurwanya ubukene mu bice by’icyaro.

By’umwihariko mu 1994 uwo muryango  w’Abongereza watanze itangazo rigenewe abanyamakuru ryemeza ko ubwicanyi bwari burimo kubera mu Rwanda ari Jenoside yakorerwaga Abatutsi. Uwo muryango wagiye unagenera imfashanyo impunzi n’abandi bantu batagira kivurira ubwo u Rwanda rwari mu bihe bikomeye.

Nyuma ya Jenoside yakorewe Abatutsi uwo muryango wakomeje gufatanya na Leta y’u Rwanda mu rugamba rw’iterambere; guhera mu mwaka wa 2018 ni bwo ku rwego mpuzamahanga hatangiye kwigwa uburyo bwo kugabanya abakozi, icyorezo cya COVID-10 gihumira ku mirari.

Chema Vera yatangaje ko ibihugu byageneraga Oxfam inkunga zitandukanye zo gukoresha, byashegeshwe cyane na COVID-19 avuga ko ibigaragarira amaso ni uko izo ngaruka zitazarangira vuba.

Agira ati “Abaterankunga bacu ubu bari mu bibazo ingendo zarahagaze, imishahara y’abakozi by’umwihariko abo mu nzego zo hejuru yarahagaritswe, ingengo y’imari ya bimwe mu bikorwa birimo n’ingendo zo hirya no hino yarahagaze kugira ngo ibyo bihugu byongere kwisuganya”.

Icyorezo cya COVID-19 cyagize ingaruka ku nzego zose z’ubuzima, bikaba bisaba ibihugu, imiryango mpuzamahanga ndetse n’abantu ku giti cyabo guhindura imyumvire n’imikorere kugira ngo izo ngaruka  zitazatuma ubuzima n’imikorere bihagarara burundu.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.