21°C , Partly sunny | Kigali-Rwanda

COVID-19: Miss Vivine yanyomoje ko yafatiwe mu banyoye inzoga

Yanditswe na Imvaho Nshya

Ku ya 14-02-2021 saa 15:54:15
Miss Vivine ni we murwayi wa mbere wakize COVID-19 nyuma yo gushyirwa ku mashini imwongerera umwuka

Uwizeye Vivine wamenyekanye cyane ku izina rya Miss Viviane yababajwe n’amakuru yakwirakwiye mu bitangazamakuru bitandukanye, avuga ko yafatanywe n’abanywi b’inzoga bari barenze ku mabwiriza yo kwirinda icyorezo cya COVID-19.

Miss Vivine ni we murwayi wa COVID-19 wakize bwa mbere nyuma yo gushyirwa ku mashini imwongerera umwuka muri Gicurasi 2020.

Uyu mubyeyi yakize nyuma y’ibihuha byakwirakwijwe ko yaba yabaye uwa mbere wahitanywe n’icyo cyorezo, ariko Minisiteri y’Ubuzima igahita inyomoza ayo makuru igaragaza ko ari muzima kandi ari koroherwa.

Ku wa Gatandatu tariki ya 13 Gashyantare 2021, ni bwo Polisi y’u Rwanda yatangaje ko yafashe abantu 11 bari kunywera inzoga mu rugo rwa Bazatsinda Bonfils ruherereye mu Kagari k’Agateko, Umurenge wa Jali mu Karere ka Gasabo.

Muri iyo nkuru, Polisi yatangaje ko yanafashe Miss Vivine avuye muri urwo rugo kuko ngo yari yagiye kubasura.

Mu kiganiro Vivine yagiranye n’Imvaho Nshya yavuze ko yababajwe n’inkuru zakomeje gutambuka zimugaragaza nk’uwafatiwe hamwe n’abanywaga inzoga kandi atarafatanyije na bo kuko yahageze ari mu kazi.

Ubusanzwe Miss Vivine ashakira abakiriya kimwe mu bigo by’ubwishingizi bikorera mu Rwanda. Yari amaze iminsi inshuti ye imurangiye Bazatsinda nk’umwe mu bantu bakeneye ubwishingizi bw’ubuzima.

Yakomeje kumuhamagara muri iki cyumweru bahana gahunda zigenda zipfa kugeza ku wa Gatanu ubwo bemeranyaga guhura ahagana saa kumi n’imwe.

Miss Vivine nk’umwe mu baturage bazi ingaruka za COVID-19 kandi udashobora gutinyuka kurenga ku mabwiriza yo kwirinda azi neza ububi bw’icyo cyorezo, yageze kwa Bazatsinda kuva saa kumi n’imwe ateganya kuhamara igihe gito gishoboka cyane ko kwari ugusobanura serivisi z’ubwishingizi acuruza agahita ataha.

Miss Vivine yatunguwe no kwisanga mu itangazamakuru

Akigera kwa Bazatsinda yasanze ntawuhari, hariyo umugore we ari na we wari wakiriye abashyitsi. Ati: “Twari twahanye gahunda ya saa munani ntibyakunda, nahageze saa kumi n’imwe. Nageze iwe muri salon nsanga afite abashyitsi nk’uko babivuga, nahageze banywa inzoga..”

Akomeza avuga ko akihagera na we yicaye umwanya muto ategereje Bazatsinda ariko we ngo ntiyigeze asoma kuri izo nzoga ndetse ngo yubahirije ingamba zo kwirinda nk’uko zatanzwe n’inzego z’ubuzima.

Ntibyatinze Bazatsinda yaraje atangira kumusobanurira iby’ubwishingizi acuruza, ndetse na ba bashyitsi bumva ari ibintu byiza bamutega amatwi arabasobanurira.

Ahagana saa kumi n’ebyiri n’iminota mikeya ni bwo yahagurutse ariko ngo ahita ahura n’umugore wamusabye kumutwara akamufasha kugera kwa muganga. Icyo gihe yahise asaba uruhushya kuri Polisi kugira ngo amasaha atamufatira mu nzira.

Yakomeje agira ati: “Saa kumi n’ebyiri n’iminota 40, hari undi mubyeyi wansabye lift naka uruhushya online [kuri murandasi] bisanzwe, mbabwira ko ngiye kujyana umuntu kwa muganga. Nabasabye kunyongerera amasaha abiri, barambwira ngo bagiye kubikoraho ngo niba mfite imodoka y’akazi n’ikarita indanga nkomeze nta mupolisi umpagarika kuko niba umubyeyi ntwaye arwaye bari buze kubibona.”

Ubwo yari avuye i Jali ageze mu Gatsata ni bwo imodoka yari imutwaye yahagaritswe bamubaza impamvu iminota yabagendanye bakaba bakigenda mu nzira mu masaha atemewe.

Avuga ko yasobanuriye umupolisi wamuhagaritse, na we aramubwira ati: “Nta kibazo muze mube muparitse hano kuri sitasiyo.”

Miss Vivine akomeza agira ati: “Uwari ubakuriye yavugiye kuri telefoni umwanya munini, aho agarukiye ati: ariko ahantu muvuye hari abantu banywaga inzoga. Namusobanuriye ko nasanze bari kuzinywa ko njye nari ndi mu kazi kanjye…”

Bamubajije niba umushoferi we nta nzoga yanyoye ababwira ko ntazo, ariko ngo bamupiye inshuro eshatu birangira bemeje ko yasomye ku nzoga. Ati: “Umushoferi bamushyize mu modoka ya Polisi na njye bampa umupolisi untwara batujyana muri Sitade.”

Icyamushenguye ni uko byarangiye agiye mu itangazamakuru nk’uwafatanyije n’abanyoye inzoga, kandi abanywaga inzoga barafatiwe mu rugo i Jali mu gihe we yari yigereye mu Gatsata.

Ati: “Babafatanye inzoga jye ntazo bamfatanye, banapima umwuka wanjye ntazo babonye, umushoferi wanjye na we bavuze ko yanyoye inzoga ku nshuro ya gatatu bamupimye…”

Yavuze ko atishimiye kuba izina rye ryakoreshejwe mu bikorwa nk’ibyo, akanenga abatangaje inkuru ye batamubajije ngo abahe ukuri n’uruhande rwe kuko izasohotse mbere zibogamye cyane ndetse zimuharabika.

Polisi y’u Rwanda ikomeje kwihanangiriza abarenga ku mabwiriza yashyiriweho kwirinda COVID-19, ko itazacika intege mu kubatahura, kwigisha no guhana abafatirwa mu makosa ashyira ubuzima bwabo n’ubw’abandi mu kaga.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.