22°C , Partly sunny | Kigali-Rwanda

COVID-19: Impinduka mu Cyumweru cyahariwe ubuzima bw’umwana

Yanditswe na NTAWITONDA JEAN CLAUDE

Ku ya 22-02-2021 saa 19:25:25
Umujyanama w'Ubuzima aha ikinini umwe mu bana bo mu Murenge wa Gishyita mu Karere ka Karongi ku munsi wa mbere w'itangizwa ry'ibikorwa by'icyumweru cyahariwe ubuzima bw'umwana

Guhera kuri uyu wa Mbere tariki ya 22 Gashyantare kugeza ku ya 7 Werurwe 2021, mu Rwanda hose hatangiye ibikorwa by’Icyumweru cyahariwe kwita ku buzima bw’umwana, cyateguwe ndetse kikaba gishyirwa mu bikorwa na buri Karere mu buryo bwihariye hagamijwe kwirinda ikwirakwizwa ry’icyorezo cya COVID-19.

Muri uyu mwaka haratangwa ibinini bivura inzoka zo mu nda guhera ku bana bafite umwaka umwe kugeza ku myaka 15, hari n’abahabwa ibinini bivura inzoka ya Bilariziyoze (Shisitozomiyaze) iba mu miyoboro y’amaraso.

Abandi bafite amezi atandatu kugeza ku myaka itanu barahabwa ikinini cya Vitamini A, kibafasha kugira ubudahangarwa ku ndwara no kubarinda ubuhumyi. Baranapimwa kandi imikurire yabo bapimwa ibiro n’umuzenguruko w’ikizigira cy’ukuboko kw’ibumoso (MUAC). Ikindi kirimo gukorwa ni uko ku bana bafite amezi 3, 6, 12, 15 na 18 harebwa imikurire yabo hifashishijwe umusambi wabugenewe upima uburebure.

Izo serivisi zose ziyongeraho kwigisha Abanyarwanda ibijyanye n’indwara zituruka ku mwanda no ku mirire mibi babasanze mu ngo zabo no mu ishuri bigamo, kugira ngo bazimenye neza bajye bazirinda bazizi.

Ikidasanzwe ku mitangire y’izo serivisi zahurijwe mu bukangurambaga bw’ibyumweru bibiri ni uko zegerejwe abaturage, zikazajya zitegurwa n’Akarere n’Inzego z’ibanze kugira ngo zizishyire mu bikorwa zifatanyije n’inzego z’ubuzima kuva ku rwego rw’Akarere kugera ku Mujyanama w’Ubuzima na Mutwarasibo.

Muri ibi bihe byo kurwanya COVID-19, izo serivisi zirimo gutangwa urugo ku rundi, aho Umujyanama w’Ubuzima afatanya na Mutwarasibo, igikorwa kikayoborwa n’Umuyobozi w’Umudugudu.

Mu mashuri ho serivisi ziratangwa n’abarimu babihuguriwe, hanyuma ibyo bikorwa bikarebererwa n’Umuyobozi w’ikigo cy’ishuri ari na we muhuzabikorwa wa gahunda zikorerwa mu kigo ayoboye.

Ni umwanzuro wishimiwe n’abaturage ndetse n’Inzego z’ibanze. Abaturage bavuga ko baruhuwe ingendo bakoraga n’igihe batakazaga bajya guhabwa serivisi ahantu kure, akenshi wasangaga ari ku kagari.

Mbonigaba Jean Bosco, aganiriza Abajyanama b’Ubuzima bazindukiye gufata ibinini bigenewe abana

Inzego z’ibanze zishimangira ko ari uburyo bwiza buzagera ku baturage bose ndetse bukanagira uruhare rukomeye mu gukumira ikwirakwizwa rya COVID-19.

Umwe mu baturage bo mu Kagari ka Kigarama, Umurenge wa Gishyita mu Karere ka Karongi wavuganye n’Imvaho Nshya, yagize ati: “Kuba barimo kudusanga mu ngo zacu biraturuhuye kuko ntibizatubuza kwikomereza n’imirimo ya buri munsi, ndetse uzaba n’umwanya wo gusobanuza abayobozi duhorana umunsi ku munsi ku byo twaba tudasobanukiwe ku ndwara zimwe na zimwe.”

Bizimungu Ignace, Umuhuzabikorwa w’Abajyanama b’Ubuzima mu Kagari ka Kigarama mu Murenge wa Gishyita, yongeyeho ko bamaze iminsi baganiriza abaturage ndetse bakaba banizeye ko abaturage bose bumvise ubutumwa bw’ibyo basabwa gukora muri ibi byumweru bibiri.

Yagize ati: “Abo bireba bose twagerageje kugera mu ngo zabo, kandi uko tugezeyo tunabasobanurira byimbitse imyitwarire ifasha umuryango kubaho neza. Ni igikorwa kizajya gitangira saa moya kugeza saa cyenda.”

Umuyobozi wungirije w’Akarere ka Karongi ushinzwe Imibereho Myiza y’Abaturage Mukase Valentine, yabwiye Imvaho Nshya ko inzego z’Ibanze zishimiye gufata mu nshingano ibi bikorwa by’ubuzima byegerejwe abaturage kuko byunganira ibindi bikorwa bifasha guhindura ubuzima n’imibereho y’abaturage muri rusange.

Umuyobozi wungirije w’Akarere ka Karongi ushinzwe Imibereho Myiza y’Abaturage Mukase Valentine

Yashimangiye ko muri iki cyumweru cyahariwe kwita ku buzima bw’umwana banononsoye imyiteguro kugira ngo abatanga serivisi bazagere ku ngo zose ari na ko birinda ikwirakwizwa ry’icyorezo cya COVID-19, cyane ko abaturage batazaba bahurijwe hamwe nk’uko byajyaga bikorwa mbere.

Ati: “Iyo abantu begeranye bashobora kwanduzanya byoroshye ariko iyo Umujyanama w’Ubuzima na Mutwarasibo basuye urugo ku rundi baba bafite ubwirinzi. Twababwiye ko bagomba gukaza ingamba, bahagera bagakaraba, bambaye udupfukamunwa, ntihabeho kwegerana kugira ngo batanduzanya.”

Mbonigaba Jean Bosco, Umuyobozi w’Agateganyo w’Agashami gashinzwe kurwanya indwara zititaweho uko bikwiriye (NTDs) n’izindi ziterwa n’umwanda mu Kigo cy’Igihugu cy’Ubuzima (RBC), yashimangiye ko bizeye kubona umusaruro wisumbuye ku wo babonaga.

Ati: “Ubu twiteze ko izi serivisi zizagera ku bantu 100% kandi zigatanga umusaruro wisumbuye mu guhashya izi ndwara ziterwa n’umwanda kuko igitera izi ndwara z’umwanda cyangwa se kugwingira, usanga n’imyumvire ikiri hasi ibigiramo uruhare runini. Twizera ko bizakemura ikibazo kinini cyane kijyanye n’imyumvire ikiri hasi.”

Minisiteri y’Ubuzima irashimira Inzego z’Ibanze zashyize ingufu nyinshi mu itegurwa n’ishyirwa mu bikorwa ry’ibikorwa biteganyijwe muri iki cyumweru, n’abarimu biyemeje kuba abafatanyabikorwa mu rugamba rwo guharanira imibereho myiza y’abana bo mizero y’ahazaza h’u Rwanda.

Mbere yo gutanga ibinini, Abajyanama b’Ubuzima babanza kubahiriza ingamba zashyiriweho kwirinda COVID-19

Mbonigaba Jean Bosco (wa 3 uhereye iburyo) nyuma yo kuganira n’abayobozi bo mu nzego z’ibanze

Umwanditsi:

NTAWITONDA JEAN CLAUDE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.