26°C , Partly sunny | Kigali-Rwanda

COVID-19: Hari abashoferi ba Tanzania batazinjira mu Rwanda

Yanditswe na Imvaho Nshya

Ku ya 17-05-2020 saa 10:13:57

Ikemezo cyo gukoraho ihererekanywa ry’amakamyo ku bashoferi b’u Rwanda n’abavuye muri Tanzania cyakiriwe neza ku bashoferi n’abacuruzi ku mpande zombi, kuko cyabonwagamo imbogamizi nubwo cyashyiriweho kwirinda icyorezo cya Koronavirusi (COVID-19).

Inama yahurije ku ikoranabuhanga intumwa z’u Rwanda n’iza Tanzania ku wa Gatanu tariki ya 16 Gicurasi 2020, yasuzumye icyakorwa ngo ubuhahirane bwongere gusagamba nyuma y’agatotsi kavutse kubera ingamba zikarishye u Rwanda rwafashwe nyuma yo kubona ko abashoferi b’abamakamyo bashobora kuba intandaro y’ikwirakwizwa rya COVID-19 mu Gihugu.

Iyo nama yanzuye ko igurana ry’amakamyo hagati y’abashoferi ryari ryemejwe ku mupaka wa Rusumo rihita rihagarikwa, ibicuruzwa bitangirika bivuye muri Tanzania bikajya bipakururirwa ku mupaka wa Rusumo, maze bigapakirwa n’imodoka z’u Rwanda.

Bivuze ko abashoferi bazanye ayo makamyo bazajya bagarukira ku mupaka, imodoka z’u Rwanda zikaba ari zo zigeza ibicuruzwa kuri ba nyirabyo aho bari mu Gihugu.

Ku mizigo yangirika n’ibikomoka kuri Peterori, Leta y’u Rwanda yemeye ko ba nyiri amakamyo bavuye muri Tanzania bazajya baherekezwa n’inzego z’umutekano ku buntu, kuva ku mupaka kugeza aho babigeza ndetse banaherekezwe basubirayo mu rwego rwo kwirinda ko bagira aho bakatira.

Abo bashoferi  bazaba bemerewe kuba bari mu Rwanda hagati ya saa kumi n’ebyiri za mugitondo kugeza saa kumi n’ebyiri z’umugoroba. Abo ijoro rishobora gufatira mu Gihugu bazajya bacumbikirwa ahabugenewe, igiciro cy’uburyamo kishyurwe na nyir’ibicuruzwa.

Leta ya Tanzania na yo yemeye kujya ipima abashoferi bayo mbere yo kwemera gutwara imizigo, kandi bage  banapimwa mbere yo guhaguruka aho baraye kubera ko urugendo rwo hagati ya Dar es Salaam na Rusumo ari rurerure.

Mu rwego rwo kwirinda ikwirakwizwa rya COVID-19, abashoferi bazemererwa kwinjira mu Rwanda na bo bazajya bapimwa mbere yo kwinjira no guherekezwa.

Abashoferi b’amakamyo n’abacuruzi mu bihugu byombi bishimiye ingamba zafatiwe gukemura ibibazo hagati y’ibihugu byombi

Agatotsi mu buhahirane n’u Rwanda, impamvu Tanzania ititabiriye inama ya EAC

Nk’uko biherutse gutangazwa na Minisitiri w’Ububanyi n’Amahanga w’u Rwanda Dr. Biruta Vincent ikibazo cy’ubutwererane hagati y’u Rwanda na Tanzania ni cyo cyagizwe impamvu yo kutitabira inama y’Abakuru b’Ibihugu bya EAC tariki ya 12 Gicurasi 2020, kuko Tanzania yashakaga kubanza guhura n’u Rwanda ngo babanze baganire kuri ibyo bibazo.

Iyo nama yatanze umusaruro nyuma y’aho amakamyo akabakaba 1,000 yakabaye yinjiza ibicuruzwa mu Rwanda yari yaheze muri Tananzia ku mupaka witwa Bonako.

Ibihugu byombi byanemeje ko nta gihugu kemerewe kugira ibyo gikora kitumvukanyweho kitabanje kumenyesha ikindi, muri urwo rugamba rwo kwirinda ikwirakwizwa ry’icyorezo cya COVID-19 hanoroshywa ubuhahirane.

Abashoferi b’amakamyo n’abacuruzi bishimiye iyo myanzuro yafashwe kuko ikemura impungenge zari ku mpande z’ibihugu byombi.

Leta y’u Rwanda ishimangira ko ntagishobora kugamburuza ingamba zashyiriweho kurinda ikwirakwira rya COVID-19 mu Banyarwanda, cyane ko nyuma y’igihe abashoferi bahagaritswe kwinjira mu Gihugu imibare y’abatahurwaho ubwo burwayi bashya yagabanyutse ku buryo bugaragara.

Imyanzuro ifashwe mu gihe Leta y’u Rwanda yamaze kuvugana na ba nyiri ibicuruzwa bizanwa n’abo bashoferi kujya babyifatira ku mupaka, haba hari ikiguzi kiyongeyeho bakabimenyesha inzego zibishinzwe bagafashwa.

Indi ngamba y’agateganyo u Rwanda rwari rwafashe yari ko abacuruzi bo muri Tanzania bagombaga kohereza abashoferi bizeye, u Rwanda rukabapima rukanabacumbikira kugira ngo ari bo batwara amakamyo ageze ku mupaka.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.