28°C , Partly sunny | Kigali-Rwanda

COVID-19: Hakize 31 mu Rwanda, haboneka abarwayi bashya 22

Yanditswe na Imvaho Nshya

Ku ya 15-09-2020 saa 20:21:18

Minisiteri y’Ubuzima yatangaje ko kuri uyu wa Kabiri tariki ya 15 Nzeri 2020, habonetse abarwayi bashya 22 b’icyorezo cya Koronavirusi (COVID-19) mu bipimo 1,935  byafashwe mu masaha 24 ashize, abaganga basezerera abantu  31 bakize neza.

Umubare w’abamaze gukira ugera ku 2,767 bangana na 60% by’abarwayi 4,624 bamaze gutahurwaho icyo cyorezo mu Rwanda, mu bipimo 466,518 bimaze gufatwa kuva umurwayi wa mbere yatahurwa mu Rwanda.

Abarwayi bashya barimo 18 batahuwe mu Mujyi wa Kigali bapimwe mu bibasiwe kurusha abandi, 2 bo mu Karere ka Rubavu, umwe wo mu Karere ka Kirehei, n’undi wo muri Nyabihu.

Kugeza ubu abakirimo kwitabwaho n’abaganga bageze kuri 1,835, iki cyorezo kikaba kimaze gutwara ubuzima bw’abarwayi 22 mu Rwanda.

Igikorwa cyo gupima abantu mu buryo bwa rusange mu Gihugu kirakomeje, ndetse ingendo zihuza Umujyi wa Kigali n’Intara mu modoka rusange zahagaritswe mu rwego rwo gukumira ikwirakwizwa ry’icyo cyorezo. Ingendo zijya n’iziva i Rusizi mu modoka bwite (private cars) zaremerewe nyuma y’igihe kinini aka Karere kari mu kato.

Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 bageze kuri miriyoni n’ibihumbi 360.6 barimo abantu miriyoni bakize n’abandi basaga ibihumbi 32.8 bahitanywe na cyo. Abamaze kwandura ku Isi barasaga miriyoni 29.6 barimo abasaga  miriyoni 21.4 bakize n’abapfuye barenga ibihumbi 936.5.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.