COVID-19: Habonetse abarwayi bashya 277 ihitana abagabo 2

Yanditswe na NYIRANEZA JUDITH

Ku ya 16-01-2021 saa 21:04:13

Kuri uyu wa Gatandatu tariki ya 16 Mutarama 2021, Minisiteri y’Ubuzima yatangaje ko habonetse abarwayi bashya 277 b’icyorezo cya COVID-19 batumye umubare w’abamaze gutahurwaho icyo cyorezo ugera ku 10,850 barimo abakirwaye 3,517 n’abamaze kubura ubuzima 140 barimo babiri bapfuye mu masaha 24 ashize.

Abapfuye ni abagabo babiri, umwe ni uw’imyaka 66 wo mu Mujyi wa Kigali, undi n’uw’imyaka  27 w’i Huye. Minisiteri y’Ubuzima yihanganishije imiryango y’ababuze ababo kubera COVID-19.

Abarwayi bashya babonetse  barimo abo mu Mujyi wa Kigali: 139, Ngoma: 22, Kirehe: 19, Rulindo: 18, Huye: 15, Gicumbi: 12, Gisagara: 12, Nyamasheke: 7, Musanze: 7, Muhanga: 5, Rwamagana: 4, Nyanza: 4, Rubavu: 4, Gakenke: 3, Nyamagabe: 2, Karongi: 2, Nyagatare: 2.

Uyu munsi hakize abantu 165 bituma umubare w’abamaze gukira uba 7,193 bangana na 66.2 % by’abamaze gutahurwaho icyo cyorezo mu Rwanda, ahamaze gufatwa ibipimo 791,472 birimo 6,423 byafashwe uyu munsi.

Kuva mu ntangiriro z’ukwezi k’Ukuboza hagiye hagaragara imibare idasanzwe y’abandura ndetse n’abahitanwa na COVID-19, Inzego z’ubuzima zikaba zemeza ko icyo cyorezo kimaze kugira ubukana buteye inkeke mu Gihugu hose.

Abaturage barasabwa kutirara kuko icyorezo kigihari ndetse bigaragara ko imibare y’abandura ku munsi yikubye inshuro ebyiri  iy’abapfa n’abarembye yikuba inshuro enye.

Kuri ubu mu Rwanda ingendo zirabujijwe guhera saa mbiri z’ijoro kugeza saa kumi za mugitondo, ingendo zihuza Uturere dutandukanye zikaba zibujijwe ndetse n’izihuza Uturere n’Umujyi wa Kigali zirabujijwe, keretse gusa ku mpamvu za serivisi z’ubuzima cyangwa izindi z’ingenzi.

Guhera tariki 5 Mutarama 2021, ibikorwa byose harimo iby’ubucuruzi, resitora, butiki, amasoko n’amaduka (malls and markets) bizajya bifunga saa kumi n’ebyiri za nimugoroba (6:00pm) kugira ngo abantu babashe kubahiriza isaha yo kuba bageze mu ngo zabo.

Abaturarwanda barasabwa kwitwararika no kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa alukoro yabugenewe.

Umwanditsi:

NYIRANEZA JUDITH

One Comment on “COVID-19: Habonetse abarwayi bashya 277 ihitana abagabo 2”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.