22°C , Partly cloudy | Kigali-Rwanda

COVID-19 : FIFA yasabye ko amarushanwa nasubukurwa abasimbura baba 5

Yanditswe na BUGINGO FIDELE

Ku ya 27-04-2020 saa 23:58:40
Abasimbura mu mukino bagiye kuva kuri 3 babe 5

Ishyirahamwe ry’umupira w’amaguru ku Isi “FIFA” ryashyize aharara ikifuzo cy’uko ubwo amarushanwa atandukanye mu mupira w’amaguru azaba asubukuwe nyuma y’iki cyorezo cya koronavirusi cyugarije Isi , abakinnyi bemerewe gusimbura mu mukino baba 5.

Ubusanzwe umubare w’abakinnyi bemerewe gusimbura wari 3 mu mukino wenda bakaba bahinduka bitewe n’irushanwa gusa muri shampiyona zitandukanye ku rwego mpuzamahanga abakinnyi bari bemerewe kwinjira mu kibuga basimbuye ni 3.

Iki kifuzo cyatanzwe mu rwego kuzafasha amakipe kuko ashobora kuzahura n’ikibazo cy’abakinnyi bashobora kuzaba batameze neza ku buryo bakina iminota 90 yose.

Umuvugizi wa FIFA atangaza ko  umunsi iki cyorezo kizaba cyarangiye amarushanwa agasubukurwa hazaba hakinwa imikino myinshi kugira ngo amarushanwa yateganyijwe asozwe. Ibi rero ni byo byatumye batekereza ku  bakinnyi kuko bishobora kubagiraho ingaruka kuko byaba bibasaba imbaraga nyinshi ugasanga bagize impanuka zirimo imvune n’ibindi cyane ko ubu bamaze igihe bicaye badakina.

Kugeza ubu shampiyona zikomeye ku mugane w’u Burayi ndetse n’ahandi hose zarahagaze aho bose bategereje ko iki cyorezo cya Koronavirusi kigabanuka bagasubukura kugira ngo hasozwe umwaka w’imikino wa 2019-2020 ubusanzwe wagomba kurangira muri Kamena 2020.

Shampiyona y’u Rwanda ya 2019-2020 yahagaritswe tariki 15 Werurwe 2020 aho yari igeze ku munsi wa 24. Ikipe ya APR FC ikaba ari yo yari iyoboye urutonde n’amanota n’amanota 57 ikurikiwe na Rayon Sports n’amanota 51 naho ku mwanya wa nyuma wa 16 hari Gicumbi FC n’amanota 16.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.