19°C , Partly cloudy | Kigali-Rwanda

COVID-19: CDC yashimye imyiteguro y’u Rwanda

Yanditswe na Imvaho Nshya

Ku ya 22-05-2020 saa 19:25:33
Minisitiri w’Ubuzima Dr. Ngamije Daniel (ibumoso) ari kumwe n’Umuyobozi wa RBC Dr. Nsanzimana Sabin

Ikigo cy’Amerika Gishinzwe Kurwanya no Gukumira Indwara (CDC) cyanyuzwe n’uburyo u Rwanda ruhagaze ku myiteguro, ingamba zashyiriweho kwirinda n’ubushobozi rufite rwo guhangana n’icyorezo cya Koronavirusi (COVID-19), n’uko ruhagaze neza mu guhangana n’iki cyorezo cyayogoje amahanga.

Umuyobozi  wa CDC ku Isi Robert R. Redfield n’itsinda ry’abakozi ba CDC mu Rwanda bashimiye intambwe imaze guterwa mu nama yabereye ku ikoranabuhanga ry’amashusho, yabahuje na Minisitiri w’Ubuzima Dr. Ngamije Daniel n’Umuyobozi wIkigo k’Igihugu cy’Ubuzima mu Rwanda Dr. Nsanzimana Sabin, ku ri uyu wa Gatanu tariki ya 22 Gicurasi 2020.

Minisitiri w’Ubuzima Dr. Ngamije Daniel yashimiye CDC n’abandi bafatanyabikorwa bose bashyigikira u Rwanda muri ibi bihe rukomeje kunoza imyiteguro no gushyira mu bikorwa ingamba zashyiriweho guhashya COVID-19.

Minisitiri Dr. Ngamije yashimangiye akamaro k’ubudahangarwa bw’urwego rw’ubuvuzi mu guhangana n’icyorezo cya COVID-19 kimwe n’izindi mbogamizi zose ku buzima.

Yanagarutse ku buryo ingamba zihamye u Rwanda rwafashe rugikubita, zagize uruhare rukomeye mu kugabanya ubwiyongere bw’abarwayi bashya batahurwa imbere mu gihugu, binoroshya uburyo bwo kubakurikirana, gupima abakekwa bose ndetse no gushyira mu kato abantu bose bahuye na bo.

Dr Nsanzimana yanagaragaje ubushobozi bwa Laboratwari y’Igihugu bwo gupima, gusuzuma no gutanga amakuru yizewe nka bumwe mu buryo bukomeje gufasha u Rwanda cyane mu rugamba rwo guhangana n’icyo cyorezo.

By’umwihariko, abayobozi ba CDC n’ab’u Rwanda bunguranye ibitekerezo no ku myiteguro ijyanye no guhashya ibindi byorezo nka Ebola n’ibindi bihangayikishije Akarere, bavuga ko hakenewe ubufatanye buhamye no kubaka inzego z’ubuzima zitajegajega.

 

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.