18°C , Partly sunny | Kigali-Rwanda

COVID-19: Adebayor yanze gufasha igihugu ke muri iki gihe cyo guhangana n’iki cyorezo

Yanditswe na BUGINGO FIDELE

Ku ya 23-04-2020 saa 23:01:18
Sheyi Emmanuel Adebayor wavuze ko nta nkunga azagera Togo muri iki gihe cyo guhangana n'icyorezo cya koronavirusi

Muri iki gihe Isi yugarijwe n’icyororezo cya koronavirusi, ibikorwa by’imikino  n’ibindi bihuza abantu benshi byarahagaritswe mu rwego rwo kwirinda ikwirakwira ry’iki cyorezo.

Bamwe mu bakinnyi bakomoka muri Afurika cyane  abakina ku mugabane w’u Burayi  bakoze igikorwa cyo kutera inkunga ibihugu byabo mu rwego rwo  guhangana n’iki cyorezo cya koronavirusi.

Umukinnyi ukomoka muri Togo unakinira ikipe y’igihugu nka rutahizamu,  Sheyi Emmanuel Adebayor akaba yarakiniye amakipe akomeye ku mugabane w’u Burayi arimo Arsenal, Tottenham na Manchester City mu Bwongereza ndetse na Real Madrid muri Espagne   yatangaje ko  nta bufasha azagera igihugu cya Togo muri ibi bihe.

Sheyi Emmanuel Adebayor ubu uri muri iki gihugu yavuze ko abantu benshi batishimiye iki kemezo  ko  ndetse ko  banamushyize mu bazanye iki cyorezo muri Togo  kuko ubu asigaye akinira ikipe ya Olimpia muri Paraguay muri Amerika y’Amajyepfo.

Yagize ati : “ Ntabwo ari nge wazanye koronavirusi muri iki gihugu kandi abo bose bavuga ko ntacyo nafashije igihugu cyange reka mbabwize ukuri  nkora ibyo nshaka kandi ndya ibyo nshaka.”

Kuri ubu muri Togo harabarurwa abantu 88  banduye iki cyorezo aho  6 bamaze gupfa hakaba harakize 59 naho 23 bakaba bakirwaye.

Kubera ibihugu byinshi byo muri Afurika bikunze kugira ikibazo k’ibikoresho by’ubuvuzi ni yo mpamvu  bamwe mu bakinnyi ndetse n’abasoje gukina bafashije ibihugu byabo. Muri aba hari Samuel Eto’o wakiniye ikipe ya FC Barcelone muri Espagne n’andi makipe akomeye i Burayi  akaba akomoka muri Cameroun.

Uyu wahoze ari umukinnyi ukomeye akaba afite imyaka 39 y’amavuko  yiyemeje gufasha abaturage bagera  bihumbi 100 iwabo muri Cameroun binyuze mu muryango yashinze “Samuel Eto’o foundation” aho  yatanze ibikoresho bitandukanye birimo  udupfukamunwa, isabune yo gukaraba mu ntoki ndetse n’ibiribwa. Ibi bikaba bizagera mu mijyi 4 irimo  Douala, Buea, Yaounde  na  Bafoussam.

Samuel Eto’o Fils wiyemeje gufasha abaturage bagera ku bihumbi 100 iwabo muri Cameroun

Undi ni Didier Drogba wakiniye Chelsea mu Bwongereza akaba akomoka muri Cote d’Ivoire, uyu we  yatanze ibitaro bye yubatse muri kiriya gihugu ngo byifashishwe mu kuvura iki cyorezo.

Adebayor aha yagize ati: “Barangereranya na Drogba ndetse na Eto’o ariko ntabwo ndi bo, ndi Emmanuel Sheyi Adebayor kandi ngomba gukora ibyo nshaka.”

Didier Drogba watanze ibitaro bye ngo byifashishwe mu gukurikirana abanduye iki cyorezo

Mu bagikina undi watanze inkunga ku gihugu ke ni Sadio Mane, rutahizamu w’ikipe ya Liverpool mu Bwongereza  akaba akomoka muri Senegal watanze inkunga ingana n’ibihumbi 41 by’amapawundi akaba agera kuri miriyoni 30 z’amafaranga akoresha muri Senegal.

Sadio Mane watanze inkunga mu rwego rwo guhangana na koronavirusi iwabo muri Senegal

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.