22°C , Partly cloudy | Kigali-Rwanda

COVID-19: Abarwayi bashya 59 batahuwe mu Rwanda

Yanditswe na Imvaho Nshya

Ku ya 22-06-2020 saa 20:26:46

Kuri uyu wa Mbere tariki 22 Kamena 2020, habonetse abarwayi bashya 59  b’icyorezo cya Koronavirusi (COVID-19), ukaba ari wo mubare wa mbere uri hejuru cyane ubonetse mu munsi umwe kuva icyo cyorezo cyagaragara mu Rwanda.

Minisiteri y’Ubuzima yatangaje ko abo barwayi bashya batahuwe mu bipimo 2,287 byafashwe mu masaha 24 ashize, hakaba hatashye  abantu 11 bakize neza.

Abarwayi bashya  barimo 33 bagaragaye mu Karere ka Kirehe , 12 mu Karere ka Rusizi, barindwi mu Mujyi wa  Kigali,  bane bo muri Nyamasheke na batatu bo mu Karere ka Rubavu. Abatahuwe bose bashyizwe mu kato detse n’abo bahuye bahita bakurikiranwa.

Umubare w’abamaze gukira ugera kuri 370 muri 787 bamaze gutahurwaho icyo cyorezo mu Rwanda.

Kugeza ubu abakirimo kwitabwaho n’abaganga bageze ku 415 mu barwayi bamaze kuboneka  mu bipimo 113,544 byafashwe kuva umurwayi wa mbere yatahurwa muri Werurwe kugeza ubu.

Iki cyorezo kimaze gutwara ubuzima bw’abarwayi babiri mu Rwanda.

Igikorwa cyo gupima abantu mu buryo bwa rusange mu Gihugu kirakomeje, ndetse Akarere ka Rusizi n’aka Rubavu twashyizwe mu kato mu gihe hagisuzumwa abantu ngo harebwe uko ubwandu buhagaze muri utwo duce.

Mu tundi turere, ingendo zihuza intara zitandukanye n’Umujyi wa Kigali zirakomeje. Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 bageze ku 306,567 barimo 146,212 bakize n’abandi 8,115 bahitanywe na cyo. Abamaze kwandura ku Isi bangana na 9,135,510 barimo abakize 4,891,118 n’abapfuye 472,332.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.