17°C , Thunderstorms | Kigali-Rwanda

CNLG yamaganye abahembera amacakubiri bitwikiriye Miss Rwanda

Yanditswe na Nshimyumukiza Janvier Popote

Ku ya 25-01-2019 saa 10:35:59
Dr Bideri Diogene, Umujyanama mu by'Amategeko wa CNLG, mu bihe byahise.

Komisiyo y’Igihugu yo kurwanya Jenoside (CNLG), irasaba abakwirakwiza imvugo zihembera amacakubiri babinyujije mu irushanwa rya Miss Rwanda, kubihagarika.

CNLG iravuga ko bibabaje kuba hari abantu bashaka gukoma mu nkokora urugendo rw’ubwiyunge bw’Abanyarwanda, igasaba ko bene ubwo butumwa butahabwa agaciro.

Ni nyuma y’aho hagaragaye abantu bandika kuri Facebook na Twitter ko Josiane Mwiseneza akwiye kuba Miss Rwanda 2019, abandi bakamurwanya, bose bishingikirije amoko.

Umujyanama wa CNLG mu by’amategeko, Dr Bideri Diogene, amaze kubwira Imvaho Nshya ko abakwirakwiza imvugo nk’izi bakwiye kumenya ko amategeko abateganyiriza ibihano bikomeye.

Dr Bideri ashimangira ko guhembera inzangano n’amacakubiri bihabanye n’ibikubiye mu irangashingiro ry’Itegeko Nshinga ry’u Rwanda n’andi mategeko, bityo ko bitakwihanganirwa.

CNLG ivuga ko irimo gukorana bya hafi n’inzego z’ubutabera ngo abakwirakwiza ubutumwa bwangisha abantu abandi bafatwe bashyikirizwe inkiko, babiryozwe.

CNLG ivuga ko irushanwa rya Miss Rwanda ari irushanwa ryiza ryitabirwa n’abakobwa bahujwe n’ubunyarwandakazi, igasaba ko hatagira ubizanamo amoko kuko irondamoko ryasenye igihugu.

Dr Bideri Diogene, Umujyanama mu by’Amategeko wa CNLG, mu bihe byahise.

Inkuru irambuye ni mu kanya.

Hagati aho, ushobora gucisha amaso mu butumwa CNLG yatanze kuri Twitter, yamagana abakwirakwiza imvugo zibiba amacakubiri n’ingengabitekerezo mu banyarwanda.

Umwanditsi:

Nshimyumukiza Janvier Popote

13 Comments on “CNLG yamaganye abahembera amacakubiri bitwikiriye Miss Rwanda”

  1. I’m glad , smart people like cnlg are clever enough to see it and condemn it ! I had seen it but couldn’t tackle it ! Abagira amatwi bumve kandi ngo ” Nyamwanga kumva ntiyanze no kubona”! Prof Malonga

  2. Ariko ikibazo abantu bafite Niki?ninde ise cyangwa nyina Wa josiane uvuga ibi?ibyubuhutu nubutusi ntabwo bikwiriye rwose muri iri irushanwa gusa sinzi igipimo ngenderwaho bakurikiza bamenya umuntu ko ari umuhutu cg umututsi!gusa izo posts narazisomye hari nabashinze imbuga bazita anti josiane ngo ntamuhutu waba miss n’ibindi byinshi ariko mwitonde harigihe ukomeretsa umuntu utazi amateka ye ukamubwira nabi kuriya bikazatuma yanga igihugu

  3. Mana y’u Rwanda turagusaba gukiza imitima y’Abanyarwanda ikizitiwe n’indorerwamo y’amoko. Ubahumure, ubereke ubwiza butatse inshusho zacu n’ubwuzuzanye by’ibisagirane bugize uburanga bwacu.

    Ndagusaba ngo uturindire abana bacu gukurira mu macakubiri n’urwangano bidafite inshingiro, ubuzuze imitima yo gukunda no gukundwa, kubana neza no koroherana.

    Uturemere imitima ikunda u Rwanda rwacu nk’ingobyi iduhetse twese kandi rwo ntirurobanura, ndetse imitima ikunda abanyarwanda bose n’ikiremwa muntu aho kiva kikagera.

    Amina

  4. Ni gute ibikorwa nk’ibi bya Miss Rwanda bishobora guhungabanya urugendo rw’ubumwe n’ubwiyunge ndetse na Ndi Umunyarwanda twirirwa twigishwa Kandi dutozwa na Leta y’igihugu? Ibi ntibyumvikana

  5. Banyarwanda banyarwanda kazi turwanye icyakongera kutuzanamo ibibi twavuyemo uwanditse biriya agomba gushakishwa akagezwa imbere y’ubutabera miss Rwanda niya abanyarwanda twese.

  6. Ikibabaje nuko Josiane yaje kuko abikunda kandi yifitiye icyizere, ayo macakubiri atayarimo, Ariko Nyumvira ibyo bamuzanyemo. Numvise na evangelist wa ADEPR avuga ngo Josiane nataba Miss, ngo uzatorwa ntazemerwa, ngo azitwa Miss rusyo. Ukibaza Uyu ni evengelist cg ni ibandi gusa. Josiane we akivugira ko niyo atatorwa yabyakira kuko ari muri competition, hakaba hagomba kuba utsinda n’utsindwa. Birababaje.

  7. Bazahane na ba bandi bashyiraga ama Posts kuri Facebook bavuga ko Josiane ahagarariye ingagi. Abandi ngo Josiane ni inguge .Rwose nibabahane nzashima ko Ubumwe n’ubwiyunge biri gutera imbere kurushaho

  8. Poor ideology should be totally condemned those responsible be accountable and justice take place no longer impunity allowed in Rwanda.

  9. Birababaje BYO. ndamushyigikiye ijana ku ijana. gusa ntabwo bishingiye kumoko. ahubwo histoire ye. ibindi sinzi aho biri kuva. erega abntu bazamura umwuka mubi bitewe n inyungu zabo.

  10. Nanjye ndamagana ivanguramoko aho riva rikagera. Ariko mu gukurikirana ibintu uko byagiye bifata indi ntera, ndacyeka ko CNLG, NURC na Leta y’u Rwanda muri rusange babonye isomo rikomeye.
    Nari nzi ko Abanyarwanda akenshi dufatwa nk’indyarya, ariko sinari nzi ko dushobora kubyerekana kuri uru rugero. Ni gute tumaze imyaka irenga 20 twigishwa ubumwe n’ubwiyunge, hanyuma mu kanya gato no ku mpamvu idafashe tugatangira guterana amagambo ya Hutu na Tutsi? Imana itube hafi, idukomereze ubuyobozi bwiza. Kuko ibi binyeretse ko habayeho inyigisho mbi, no gutemana twatemana. Umutima mubi ntaho wagiye, ingengabitekerezo ya jenoside ntaho yagiye, kandi ku mpande zombi z’abibona mu isura y’amoko.

  11. Ese abavuga ko Josiane cg undi azatsinda muri final baba bazi ikizami cya final icyo aricyo ? Ndacyeka ko abazana uyumwuka uteranya Josiane atari abfana be ahubwo bateje bias.

  12. Ntabwo numva uburyo ki abanyarwanda aho kugirango bashyigikire iterambere ry’abari b’u Rwanda muri miss Rwanda ahubwo bagenda bakwirakwiza imvuga mbi gusa. Ababikora nibasubize ubwenge Ku gihe kuko ibyamoko ntaho byatugeza.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.