27°C , Mostly cloudy | Kigali-Rwanda
Barahira Tito na Ngenzi Octavien bahamijwe ibyaha bya Jenoside n'ibyibasiye inyoko muntu bahanishwa igifungo cya burundu

CNLG irishimira imyanzuro y’urubanza rwa Ngenzi na Barahira

Yanditswe na MUGISHA BENIGNE

Ku ya 11-07-2018 saa 06:42:19

Komisiyo y’Igihugu yo kurwanya Jenoside (CNLG) irashima ibyemezo by’inkiko zo muri bimwe mu bihugu by’amahanga bihana abakoze Jenoside yakorewe Abatutsi harimo n’u Bufaransa bwafatiye imyanzuro Ngenzi na Barahira, mu rubanza rwabereye mu rukiko rw’i Paris, hashingiwe ku masezerano mpuzamahanga yo gukumira no guhana ibyaha bya Jenoside yasinywe mu 1948.

Barahira Tito na Ngenzi Octavien bahamijwe ibyaha bya Jenoside n’ibyibasiye inyoko muntu bahanishwa igifungo cya burundu

Ibi byashyizwe ahagaragara mu itangazo iyi Komisiyo yasohoye igaragaza uko yakiriye imikirize y’urubanza rwa Ngenzi Octavien Ngenzi na Barahira Tito ishingiye ku kemezo cy’urukiko rw’Ubujurire rw’i Paris, rwashimangiye tariki ya 6/7/2018 igifungo cya burundu kuri aba bagabo, nyuma yo gusanga bahamwa n’ibyaha bya Jenoside yakorewe Abatutsi mu 1994 ndetse n’ibyaha byibasiye inyoko muntu, bakoreye mu cyahoze ari Komini Kabarondo ho muri Perefegitura ya Kibungo, ubu ni mu Ntara y’Iburasirazuba.

Urubanza rw’aba bagabo bombi rusoje  rwari rumaze amezi abiri ruburanishwa n’Urukiko rwa Rubanda rw’i Paris, humviswe abatangabuhamya 120 ku ruhande rw’abashinja n’abashinjura.

Nyuma yo guhatwa ibibazo mu gihe cy ;amezi 2, abaregwa ari bo Ngenzi Octavien na Barahira Tito  bahakana ibyo baregwa, urukiko rwaje gushimangira ku wa gatanu, tariki ya 06 Nyakanga 2018  igifungo aba bagabo bombi bari barahawe mu rw’ibanze, rubakatira igifungo cya burundu.

Ibyaha byahamijwe abagabo bombi basimburanye ku butegetsi bwa Komini Kaborondo, ni icyaha cya Jenoside n’ibyaha byibasiye inyoko muntu, aho baregwaga ibitero byibasiye abatutsi bari bahungiye muri Kiliziya ya Kabarondo.

CNLG  yanagarutse ku  kemezo cy’Urukiko rw’Ubujurire rwa Bobigny mu Bufaransa cyahamije Pascal Simbikangwa icyaha cya Jenoside rumukatira igifungo k’imyaka 25 nyuma y’urubanza rwabaye hagati y’itariki ya  25/10 na 3/12/2016.

Iyi Komisiyo kandi  irishimira umwanzuro w’urukiko rwo muri Suwedi, ku gihano k’igifungo cya burundu bwahanishije Umunyarwanda Rukeratabaro Théodore tariki ya 27/06/2018, wahamwe n’icyaha cya Jenoside n’ibindi byaha byibasira inyokomuntu yakoreye Abatutsi mu cyahoze ari Komini Cyimbogo, Perefegitura Cyangugu.

CNLG yibukije ububasha bwa ba Burugumesitiri mu rwego rwo kunenga abunganizi ba Rukeratabaro bavuze ko ba Burugumesitiri batari bafite ububasha bwo guhagarika ubwicanyi bwakorwaga kuko bwari bubarenze.

Muri iri tangazo Bizimana Jean Damascene, umuyobozi wa Komisiyo y’Igihugu yo kurwanya Jenoside (CNLG) aragira ati “Ba Burugumesitiri bayoboraga amakomini, babaga bafite ububasha bwo gufata ibyemezo ku bibazo byose byarebaga amakomini bayoboraga, harimo no kurinda abaturage n’ibyabo byose”.

Avuga ko Burugumesitiri yakoraga nk’uhagarariye Perezida wa Repuburika muri Komini, ku bijyanye n’umutekano, akaba umuyobozi mukuru wa Polisi ndetse na Jandarumori bakoreraga muri Komini, hashingiwe ku [Itegeko rigenga ubutegetsi bwa Komini ryo ku wa 23/11/1963].

CNLG igaragaza ko ibi kandi byanashimangiwe n’ikemezo cyafashwe n’Urukiko Mpuzamahanga Mpanabyaha rwashyiriweho u Rwanda, mu rubanza rwa Akayesu Jean Paul, ku ya 2/9/1998.

Bisobanura ko ari muri ubwo bubasha ba Burugumesitiri Ngenzi na Barahira basimburanwe ku buyobozi bwa Komini Kabarondo, batanze amabwiriza yo gukora Jenoside kandi abaturage bakayubahiriza.

Umwanzuro w’urubanza rwa Ngenzi na Barahira rwaciwe n’urukiko rwo mu gihugu cy’u Bufaransa, uje wiyongera ku zindi manza za Jenoside yakorewe Abatutsi zaciwe n’ibihugu by’amahanga zigera kuri 22 zabereye mu bihugu nk’u Bufaransa, Suwedi, u Bubiligi, u Bwongereza, Noruveji  Canada n’u Budage.

Hari n’aboherejwe kuburanishirizwa mu Rwanda bagera kuri 18 baturutse  muri Leta Zunze Ubumwe z’Amerika, Canada, Uganda, u Buholandi, Urukiko Mpuzamahanga Mpanabyaha rwashyiriweho u Rwanda, Norveji n’u Budage.

Ibyo byerekana ko hari ibihugu bigenda byubahiriza Amasezerano Mpuzamahanga yo gukumira no Guhana ibyaha bya Jenoside kandi ko ari ibyo kwishimirwa.

N’ubwo CNLG ishima iyo ntambwe igenda iterwa mu butabera mpuzamahanga mu guhana abakoze Jenoside hari byinshi byo kunenga.

Ni muri urwo rwego iyi Komisiyo itemeranywa n’ikemezo cyo ku wa 21/6/2018 u Bufaransa bwafashe cyo guhagarika gukurikirana mu butabera Padiri Wenceslas Munyeshyaka, kubera uruhare rukomeye yagize muri Jenoside yakorewe Abatutsi, n’ibindi ibyaha byibasira inyoko muntu nk’ubwicanyi, gufata abagore ku ngufu, gushimuta Abatutsi byakurikiwe no kubica, haba kuri Kiliziya ya Sainte Famille yayoboraga, mu kigo cya Saint Paul no mu nkengero zacyo.

CNLG iributsa kandi ko hari Abanyarwanda 42 batorotse ubutabera bidegembya mu Bufaransa, badafatwa kandi bakurikiranweho ibyaha bya Jenoside, barimo Dr Sosthène Munyemana ikirego cyantanzwe tariki ya le 18/10/1995; Laurent Bucyibaruta ikirego cyatanzwe tariki ya  6/10/2000, 9/5/2017 ;  Col Laurent Serubuga, ikirego cyatanzwe tariki ya  6/10/2000, 9/5/2017; Agathe Kanziga Habyarimana, ikirego cyatanzwe tariki ya 3/2/2007; Dr Eugène Rwamucyo, ikirego cyatanzwe tariki ya 15/4/2007; Marcel Bivugabagabo, ikirego cyatanzwe mu Kwakira 2008; Pierre Tegera, ikirego cyatanzwe 7/5/2009, ubutabera bufata umwanzuro wo kutamukurikirana mu Kuboza 2016, Dr Charles Twagira, ikirego cyatanzwe tariki ya  30/11/2009; Hyacinthe Rafiki Nsengiyumva, ikirego cyatanzwe tariki ya le 6/1/2012 ; Claude Muhayimana, ikirego cyatanzwe tariki ya 3/6/2013, Félicien Baligira, ikirego cyatanzwe tariki ya 22/5/2014.

CNLG isanga ugereranyije n’igihe ikirego cyatangiwe, ubutabera bw’u Bufaransa bwatinze gukurikirana abakekwaho icyaha cya Jenoside, ndetse kuri bose, bwafashe ikemezo ku mpamvu za politiki cyo kutagira uwo bwohereza mu Rwanda, kandi u Rwanda rutarahwemye kubisaba.

Hari kandi n’umubare w’abantu 914 bakekwaho Jenoside yakorewe Abatutsi mu 1994, nyamara bakaba badafatwa ngo bagezwe imbere y’ubutabera. Umubare munini w’abatorotse ubutabera kubera icyaha cya Jenoside bari muri Repubulika iharanira Demokarasi ya Kongo (254), Uganda (226), ku mugabane w’u Burayi, Leta Zunze Ubumwe z’Amerika, Australiya  na Nouvelle Zélande.

CNLG  iboneraho kongera gusaba ibihugu byose u Rwanda rwoherejemo izo mpapuro zo gufata no guta muri yombi abakekwaho icyaha cya Jenoside yakorewe Abatutsi, ko zakwitabwaho, abo bakekwaho Jenoside bagafatwa, bagacibwa imanza n’ibihugu bahungiyemo cyangwa se bakoherezwa mu Rwanda nk’uko amategeko mpuzamahanga abiteganya.

 

 

 

TANGA IGITEKEREZO

Leave a Reply

Be the First to Comment!

avatar