22°C , Partly cloudy | Kigali-Rwanda
Dr Bizimana Damascene, Umunyamabanga Nshingwabikorwa wa CNLG

CNLG irategura kumurika ibitabo 4 kuri Jenoside muri uyu mwaka

Yanditswe na Twagira Wilson

Ku ya 11-01-2019 saa 16:13:36

Komisiyo y’Igihugu yo kurwanya Jenoside, CNLG yatangaje ko mu mpera z’uyu mwaka wa 2019 yitegura kuzamurika ibitabo kuri Jenoside bigera kuri 4 bigaragaza ishyirwa mu bikorwa rya Jenoside yakorewe Abatutsi mu Rwanda.

Mu gihe u Rwanda rwitegura igikorwa cyo kwibuka ku nshuro ya 25 Jenoside yakorewe Abatutsi mu 1994,

Ibyo bitabo bizamurikwa mu rwego rwo kugaragaza umwihariko wa buri gace ko mu byahoze ari Amaperefegitura.

Ibitabo bizamurikwa ni ku bijyanye n’umwihariko w’icyahoze ari Perefegirura ya Butare, Gikongoro, Gitarama na Cyangugu.

Umunyamabanga Nshingwabikorwa wa CNLG, Dr Bizimana Jean Damascene yabivugiye i Kigali, mu ubwo Komisiyo ayobora yamurikaga igitabo ku bushakashatsi yakoze ku itegurwa n’ishyirwa mu bikorwa rya Jenoside yakorewe Abatutsi mu cyahoze ari Perefegitura ya Ruhengeri, ubu ni mu Ntara y’Amajyaruguru.

Icyo gitabo CNLG yakoze kikaba kigaragaza, umwihariko w’icyahoze ari Ruhengeri n’uruhare abari abayobozi baho bagize mu itegurwa rya Jenoside.

Ubushakashatsi buri muri icyo gitabo bugaragaza ko mbere y’uko umutwe w’Interahamwe ubaho muri Ruhengeri ari ho hashingiwe umutwe witwaga Amahindure ari na wo wabanje kwica Abatutsi mu myaka ya 1959.

Ubushakashatsi bukubiye mu gitabo cya CNLG, bwerekana ko Abatutsi batangiye kwicwa kuva kera mu myaka ya 1959, ahakoreshwaga uburyo butandukanye bw’ubwicanyi burimo gutwikirwa amazu no guciribwa mu turere tw’ahandi nka Bugesera mu rwego rwo kugira ngo bicwe n’ubuzima butari bwiza nk’isazi yo mu bwoko bwa tsetse n’ibindi n’indwara.

Avugana n’itangazamakuru nyuma yo kumurika icyo gitabo, Umunyamabanga Nshingwabikorwa wa CNLG, Dr Bizimana Jean Damascène, yavuze ko umwihariko wa Ruhengeri ari uko kuva mu 1959, ari uko ubwicanyi bwibasiraga Abatutsi bwakorwaga bakusanyirizwa mu bigo by’Abihayimana, nko muri Paruwasi ya Janja, Ntemba n’ahandi.

Mu kiganiro n’abanyamakuru, Dr Bizimana J. Damascene avuga ko, kugeza ubu bamaze gusoza ibitabo bibiri ku birebana na Jenoside mu byahoze ari Amaperefegitura ya Gisenyi na Ruhengeri.

Ati “Mu mpera z’uyu mwaka wa 2019 CNLG irateganya kuzamurika ibitabo 4 bigaragaza umwihariko kuri Jenoside mu byahoze ari Butare, Gikongoro, Gitarama, na Cyangugu, dukurikizeho iyahoze ari Perefegitura ya Kigali, Kibuye, Byumba ku buryo tuzaba dusoje igihugu cyose.’’

Ku birebana n’inzitizi bagize mu gihe cyo gukora ubushakashatsi, Dr Bizimana atanga ingero z’aho abakoze ubushakashatsi byagoye mu kubona amakuru nk’abo bigora gutanga amakuru kubera ibihe banyuzemo, n’abari abayobozi bahoze mu myanya y’ubuyobozi banga kugira icyo bavuga kandi ari bo bakabaye baza ku isonga mu gufasha abantu kumenya amateka kuri Jenoside ngo ashyirwe ahagaragara Abanyarwanda bayamenye.

Dr Bizimana Damascene, Umunyamabanga Nshingwabikorwa wa CNLG

TANGA IGITEKEREZO

Leave a Reply

Your email address will not be published. Required fields are marked *