19°C , Intermittent clouds | Kigali-Rwanda

Christopher ashishikajwe no kuzamura muzika ye ku rwego mpuzamahanga

Yanditswe na Ndamyirokoye François

Ku ya 07-10-2019 saa 08:11:36
Umuhanzi Christopher

Muneza Christophe ukoresha mu buhanzi izina rya Christopher mu kiganiro yagiranye n’Imvaho Nshya yavuze ko  yatangiye urugendo rwo  kuzamura umuziki we ku rwego mpuzamahanga akorana n’abahanzi bo mu bindi bihugu bamaze gukataza muri muzika.

Indirimbo yakoranye n’abo bahanzi z’intangiriro avuga ko zizaba zikubiye kuri alubumu arimo gukora  izaba igizwe n’indirimbo 12.

Mu bahanzi yakoranye nabo yirinze guhita atangaza amazina yabo ariko  yavuze ko ari abo muri Tanzania na  Uganda.

Avuga ko bishoboka ko abo yatangiriyeho atari bo yifuzaga ngo kuko ari ibintu bihenze cyane gukorana indirimbo n’abahanzi bo hanze ngo ariko byose ni urugendo umuntu atwara gahoro gahoro.

Alubumu ye avuga  ko azabwira abantu uko yitwa mu bihe bya vuba. Mu ndirimbo zizaba ziyiriho harimo “Ko wakonje”  yasohoye mu bihe byatambutse.

Ati “Alubumu yanjye izaba igizwe n’indirimbo zitandukanye  zirimo izo nafatanyije n’abandi bahanzi”. Magingo aya avuga ko alubumu yarangiye  ubu arimo kugenda asohora indirimbo ziyigize.

Kuvuga ko  azasohora  iyi  alubumu iri mu buryo bw’amajwi ndetse n’amashusho avuga ko kakiri agaseke gapfundikiye ngo ariko abantu nabyo bazabimenya vuba.

Mu bihe byahise avuga ko yari ahugiye mu gukora iyo Alubum ngo ariko yamaze gukora indirimbo ziyigize.

Vuba cyane  avuga ko azatangaza amatariki azaberaho ibitaramo byo kumurika iyo Alubumu avuga ko yaririmbweho.

Gukorana n’abahanzi bo hanze avuga ko bifasha iyo umuhanzi wo hanze  na we amenyekanishije indirimbo mwakoranye  mu gihugu akomokamo.

Gukorana n’uwo muhanzi avuga ko bihenze ngo kuko hariho ushobora kukwaka amafaranga kugira ngo mukorane cyangwa atayakwaka akagusaba gukorana ibikorwa bihenze nko gukora amashusho y’indirimbo cyangwa kwita ku bagize itsinda rye rimufasha muri muzika ye mu gihe murimo gukorana.

Ati “Ashobora kutaguca amafaranga ariko akagusaba nko gukora amashusho y’indirimbo ahenze cyane. Ibyiza rero umuntu agenda akora ibijyanye n’ubushobozi afite”.

Kuba muzika nyarwanda  idatera imbere cyane, Christopher avuga ko  ikibazo ari uko abashoramari batari bumva ko bakwiye gushora mu muziki uko bikwiye.

Nubwo bimeze uko ariko avuga bizageraho bikagerwaho abashoboramari  bakiyemeza gushora imari mu muziki mu buryo bufatika.

Ku rundi ruhande avuga ko  indirimbo aherutse gusohora  yitwa “Ndakwemera” abantu  bayakiriye neza kuko ibyinitse akaba kandi ari indirimbo yakoreshwa mu birori bitandukanye.

Kuba indirimbo ye yarakozwe na Madebeats ndetse na Bob Pro avuga ko kubyumva bombi byoroshye ngo kuko n’ubundi  asanzwe akorana nabo bya hafi.

Christopher ukundwa mu ndirimbo z’urukundo

Yagarutse  ku  kuntu  yisanze ari umuhanzi

Christopher avuga ko  ubwo KINA Music yateguraga irushanwa yaje gutsindamo ngo yari yagiye aherekeje abandi bo bahatanye baratsindwa,  umuntu aza gutuma ajyamo atabishaka ariko ahatanye aratsinda.

Ageze muri KINA Music avuga ko yakoze indirimbo  ya mbere ngo ariko ntiyabasha kumenyekana   nyuma hahita hakurikiraho indirimbo  iyitwa “Iri joro” yakoranye na Danny Nanone, iyo ikaba ari yo yamumenyekanishije cyane ituma aba icyamamare ari muto.

Kumenyekana kwe avuga ko byabaye akiga mu mashuri yisumbuye ngo ariko iwabo barushijeho kumwitaho  kugira ngo atarangara.

Muri urwo rugendo kandi avuga ko  yagiye arebera uburyo abahanzi nka King James bitwaraga na we biramufasha.

Ati “Mu rugo barushijeho kunyitaho kugira ngo ntarangara  ariko narebaga  n’ukuntu nka King James yitwara nkabyigiraho”.

Asobanura ko King James yari azwi cyane ngo ariko ntibyamuhinduraga.

Nyuma y’uko yakoranye indirimbo na Danny Nanone ikamenyekana avuga ko yaje gukora izindi ndirimbo zirimo  iyo yakoranye na Riderman.

Gukorana na Riderman avuga ko byamushimishije cyane  ngo dore ko yakuze ari umufana we. Kwiyumva ijwi rye ryahuye n’irya Riderman avuga ko byamurenze.

Christopher mu rukundo

Umuhanzi Christopher uririmba indirimbo zibanda ku rukundo ariko akaba atajya akunda kuvugwa mu nkundura z’urukundo n’abakobwa batandukanye avuga ko gukunda akunda ngo ariko kuba bidakunda kuvugwa ngo ni uko aba yumva ari ubuzima bwe bwite.

Ati “Gukunda ndakunda ahubwo  ni uko kuvuga iby’urukundo rwanjye numva ari ubuzima bwanjye bwite”.

Mu myaka yashize Christopher yavuzweho gukundana na Akiwacu Colombe ariko avuga ko batigeze bakundana ngo ahubwo ni uko    bigeze  kwifotoranya  abantu babona bari kumwe bagatangira kubivugaho.

Akiwacu Colombe, Miss Rwanda 2014. Christopher avuga ko batigeze bakundana

Umuhanzi afite inyota yo kuzakorana na we indirimbo

Christopher avuga ko yakuze akunda uburyo Cécile Kayirebwa aririmba  ngo akaba yumva afite igitekerezo cyo kuzakorana indirimbo na we.

Avuga ko atigeze abasha kubimuganirizaho ngo ariko afite icyo kifuzo.

Ku rwego rw’Afurika abahanzi yakorana indirimbo nabo  bikamushimisha avuga ko ari Burna Boy,  Diamond  Platnmuz ndetse  na Wizkid.

Umuhanzikazi Angelique Kidjo, Christopher avuga ko kandi ari mu bahanzi akunda uburyo aririmba.

Ku rwego rw’Isi avuga ko Beyoncé ari we akunda uko aririmba ngo ariko yakundaga cyane nyakwigendera Michael Jackson.

Umwanditsi:

Ndamyirokoye François

Tanga Igitekerezo

Email yanyu ntigaragazwa ku rubuga. Amazina na Email ni ngombwa.