29°C , Partly sunny | Kigali-Rwanda

CHAN 2020  yimuriwe igihe kitazwi kubera icyorezo cya koronavirusi

Yanditswe na BUGINGO FIDELE

Ku ya 18-03-2020 saa 11:24:07
Ikipe y'igihugu ya Maroc ifite igikombe giheruka yamaze gutangaza ko itazitabira CHAN 2020

Kuva tariki 04 kugeza 25 Mata 2020 muri Cameroun hagombaga kubera imikino ya nyuma y’Afurika y’ibihugu mu bakinnyi bakina imbere mu gihugu “CHAN 2020”. Impuzamashyirahamwe y’umupira w’amaguru muri Afurika “CAF” tariki 17 Werurwe 2020 yafashe umwanzuro wo kwimurira iri rushanwa gusa ntibatangaje igihe rizabera.

Muri iyi minsi kubera icyorezo cya koronavirusi cyatangiriye mu Bushinwa kikaba kimaze gukwirakwira mu bice bitandukanye by’Isi,  ibikorwa by’imikino byabaye bihagaritswe.

Mu cyumweru gishize, CAF yahagaritse imikino yo gushaka itike ya CAN 2021  yagombaga kuba kuva tariki 23 kugeza 31 Werurwe 2020. Gusa  ntabwo bari bigeze bafata umwanzuro kuri CHAN 2020  aho batangaje ko itsinda ry’abaganga ryagombaga kujya muri Cameroun tariki 14 na 15 Werurwe 2020 nyuma bagafata umwanzuro.

Igihugu cya Cameroun  cyagaragayemo abantu 5 bafashwe n’iki cyorezo.  Tariki 14 na 15 Werurwe 2020, itsinda ry’abaganga ba CAF, Dr Aboubakari Sidiki, Adoum Djibrime na  Dr. Zerguini basuye Cameroun kugira ngo barebe uko ubuzima bwifashe.

Mu nama ya komite nshingwabikorwa ya CAF yabaye tariki 17 Werurwe 2020 hemejwe ko CHAN 2020 isubitswe. Uretse iyi mikino kandi  hanasubitswe inama  rusange ya CAF yagomba kubera muri Cameroun tariki 24 Mata 2020.

Muri CAF bakomeza batangaza ko bagiye gukomeza gukurikirana  ku buryo bigenze neza amarushanwa yakongera agasubukurwa ari nabo bazatangaza igihe CHAN 2020 yabera.

Ibihugu bitandukanye muri Afurika birimo u Rwanda, Equatorial Guinea, Ghana, RDC na Misiri  byahagaritse ibikorwa byose by’imikino. Igihugu cya Maroc gifite igikombe giheruka cya CHAN 2018  ndetse n’u Rwanda, Togo na Uganda   biri kumwe mu itsinda C bari batangaje ko batazitabira iri rushanwa.

Uko amakipe yari ateganyijwe guhura

Tariki 17 Gashyantare 2020 ni bwo  habaye tombora y’uko amakipe azahura aho itsinda A ririmo Cameroon, Mali, Zimbabwe na Burkina Faso. Itsinda B ririmo Libya, Niger, RDC na Congo Brazzaville. Itsinda C ririmo Maroc, Uganda, Togo n’u Rwanda naho itsinda C rikabamo Zambia, Guinea, Namibia naTanzania.

Byari biteganyijwe ko munsi wa mbere w’iri rushanwa tariki 04 Mata 2020, Cameroun             izakina  na     Zimbabwe naho Mali igakina na Burkina Faso kuri  Ahmadou Ahidjo i Yaoundé.

Iri rushanwa rya CHAN ryatangiye gukinwa muri 2009 aho ryashyizweho mu rwego rwo gufasha abakinnyi bakina imbere mu gihugu kwigaragaza. Muri 2009 ryabereye muri Cote d’Ivoire ryegukanwa na RDC, muri 2011 ribera muri Sudani ryegukanwa na Tunizia, muri 2014 ribera muri Afurika y’Epfo aho Libya yegukanye igikombe. Muri 2016 iri rushanwa ryabereye mu Rwanda, RDC yongera gutwara igikombe naho ubwo riheruka muri 2018 ryabereye muri Maroc aba ari naho igikombe kiguma.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.