21°C , Partly sunny | Kigali-Rwanda
Manishimwe Djabel na Mukunzi Yannick ubwo ikipe y'u Rwanda yari mu mikino ya CECAFA 2017

CHAN 2018: Ikipe y’u Rwanda igiye gukina na Sudani umukino wa gicuti

Yanditswe na admin

Ku ya 03-01-2018 saa 11:49:44

Tariki 05-01-2018

Rwanda-Sudani

Tariki 10-01-2018

Rwanda-Algeria

Kuva ejo hashize tariki 2 Mutarama 2018, ikipe y’u Rwanda iri muri Tunizia  aho yagiye mu myitozo yo kwitegura imikino ya nyuma ya CHAN 2018  izabera muri Maroc kuva tariki 13 Mutarama kugeza 04 Gashyantare 2018.

Manishimwe Djabel na Mukunzi Yannick ubwo ikipe y’u Rwanda yari mu mikino ya CECAFA 2017

 

Ikipe y’u Rwanda igizwe n’abakinnyi 23 n’abandi bari babaherekeje yahagurutse mu Rwanda tariki 01 Mutarama 2017 yerekeza muri Tunizia aho igiye gukorera imyitozo  y’iminsi 10 nyuma tariki 11 Mutarama 2018 izerekeza muri Maroc mu mujyi wa  Tangier aho izakinira.

Nk’uko tubikesha urubuga rw’ishyirahamwe ry’umupira w’amaguru mu  Rwanda“FERWAFA”, ikipe y’u Rwanda muri iyi minsi 10 igiye kumara muri Tunizia izakina imikino ibiri ya gicuti. Umukino wa mbere  Amavubi azakina na  Sudani  tariki 05 Mutarama 2018 naho umukino wa kabiri ikipe y’u Rwanda ikine n’ikipe y’igihugu ya Algeria tariki 10 Mutarama 2018.

Amavubi azatangira imikino ya CHAN 2018 ahura na Nigeria

Nyuma y’iyi mikino 2 ya gicuti, ikipe y’u Rwanda izerekeza muri Maroc mu mujyi wa Tangier aho izasanga ikipe ziri mu itsinda rimwe ari zo Nigeria, Libiya yegukanye CHAN 2014 na Equatorial Guinea.

Imikino ya CHAN 2018 izatangira tariki 13 Mutarama 2018 ariko ikipe y’u Rwanda izakina umukino wa mbere tariki 15 Mutarama 2018 na Nigeria. Umukino wa kabiri uzaba tariki 19 Mutarama 2018 aho ikipe y’u Rwanda izakina na Equatorial Guinea isoze imikino yo mu matsinda tariki 23 Mutarama 2018 ikine na Libiya.

Iyi ni inshuro ya 3 u Rwanda rugiye gukina imikino ya nyuma ya CHAN  nyuma yo kwitabira bwa mbere muri 2011 ndetse n’ubuheruka muri 2016 ubwo iyi mikino yaberaga mu Rwanda ikipe y’u Rwanda ikaviramo muri ¼ k’irangiza.

Abakinnyi b’Amavubi n’ababaherekeje

Abantu 31 barimo abakinnyi 23 ni bo bahagurutse mu Rwanda berekeza muri Tunizia. Abakinnyi ni Ndayishimiye Eric, Nzarora Marcel, Kimenyi Yves, Usengimana Faustin, Manzi Thierry, Kayumba Soter, Rutanga Eric, Iradukunda Eric, Fitina Omborenga, Ndayishimiye Celestin, Rugwiro Herve, Mbogo Ally, Mukunzi Yannick, Bizimana Djihad, Nshimiyimana Amran, Niyonzima Ally, Imanishimwe Djabel, Hakizimana Muhadjiri, Nshuti Dominique Savio, Nshuti Innocent, Mico Justin, Biramahire Abeddy  na Mubumbyi Barnabe.

Hari kandi ababaherekeje barimo Mashami Vincent (Umutoza wungirije), Higiro Thomas (Umutoza w’abanyezamu), Hakizimana Moussa (Physiotherapist), Rutamu Patrick (Physiotherapist), Nshimiyimana Protogene (Team Doctor), Kamanzi Emery (Team Manager), Baziki Pierre (Kit Manager) na Mugabe Bonnie (Team Media Officer). Umutoza mukuru Antoine Hey akaba yaraye asanze ikipe muri Tunizia avuye iwabo mu Budage.

BUGINGO FIDELE

TANGA IGITEKEREZO

Leave a Reply

Be the First to Comment!

avatar