28°C , Mostly cloudy | Kigali-Rwanda

CG Gasana agiye kwimurira ibiro i Nyamagabe ngo akurikirane ibibazo byaho

Yanditswe na Kanamugire Emmanuel

Ku ya 28-02-2019 saa 09:10:30
Guverineri w'Intara y'Amajyepfo, CG Gasana Emmanuel mu kiganiro yagiranye n'abanyamakuru

Guverineri w’Intara y’Amajyepfo, CG Gasaba Emmanuel, yatangaje ko we n’itsinda rito ry’abakozi b’Intara bagiye kujya gukorera mu Karere ka Nyamagabe by’agateganyo.

Ikigamijwe, ngo ni ukugira ngo bakurikiranire hafi ibibazo aka karere gafite kandi babishakire umuti mu maguru mashya.

Akarere ka Nyamagabe kagize imiyoborere mibi yamaze imyaka igera kuri itanu ndetse bituma iterambere ry’abaturage rigenda risubira inyuma na bimwe mu bikorwa by’iterambere biradindira, nk’uko ubuyobozi bw’intara bubivuga.

Ubwo Umukuru w’Igihugu, Paul Kagame, yasuraga aka Karere ku wa 26 Gashyantare 2019, yagaragarijwe imishinga yadindiye irimo uruganda rw’Ingano kugera ubu rudakora ndetse n’Isoko rya Kijyambere riherereye mu Mujyi wa Nyamagabe.

Guverineri w’Intara y’Amajyepfo, CG Gasana Emmanuel, mu kiganiro yagiranye n’abanyamakuru ku wa 27 Gashyantare 2019, yatangaje ko Nyamagabe ifite ibibazo bishaka ko abantu babikurikirana babyegereye ari na yo mpamvu agiye kwimukirayo.

Yagize ati “Nyamagabe habaye ubuyobozi butari bwiza kandi bumara imyaka itanu cyangwa itandatu, muri icyo gihe rero bituma henda kudindira ho gato, mu buzima bw’abaturage bafite abana benshi bafite imirire mibi n’iterambere urabona ko ritihuta.”

Guverineri Gasana yavuze ko hamwe n’itsinda ry’abakozi b’Intara azajyana ku ikubitiro bazakorera Nyamagabe nibura mu mezi nk’ane akajya agaruka ku Ntara igihe bibaye ngombwa, nyuma hakazafatwa icyemezo niba bakomeza cyangwa bavayo.

Ati “Nzimuka ku itariki ya 2 Werurwe 2019, ndagira ngo ndebe uko ibibazo bimeze n’uko twabikemura vuba na bwangu.Iyo umukuru w’igihugu yatanze umurongo, ugomba kwimuka. Birashoboka ko tuzava Nyamagabe tujya n’ahandi hakeneye ko dushyira imbaraga nyinshi.”

CG Gasana yakomeje avuga ko ashimira Umukuru w’Igihugu wemeye ko imihanda hafi 80% mu Karere ka Nyamagabe igiye gukorwa kandi mu gihe cya vuba ndetse amashanyarazi agakwirakwizwa mbere y’ahandi hose mu gihugu.

Uko umujyi uteye imihanda irimo n’ibindi bikorwaremezo bigiye kuvugururwa n’izindi nzego zirimo uburezi bishyirwemo ingufu hamwe no guhindura imyumvire y’abaturage ku bufatanye n’ubuyobozi bw’akarere ka Nyamagabe.

Imishanga ihari nk’uruganda rw’ingano n’isoko rya kijyambere ryari ryaratangiye kubakwa na byo ngo byafatiwe ibyemezo by’uko bigiye gutangira gukoreshwa.

Guverineri w’Intara y’Amajyepfo, CG Gasana Emmanuel mu kiganiro yagiranye n’abanyamakuru

Umwanditsi:

Kanamugire Emmanuel

One Comment on “CG Gasana agiye kwimurira ibiro i Nyamagabe ngo akurikirane ibibazo byaho”

  1. Kwimukirayo ubwabyo sinumva ko byakemura ikibazo, ahubwo arebe niba inzego zibishinzwe zibikurikirana nibiba ngombwa zijye zimuha raporo, kuko n’ubundi najyayo si we uzubaka imihanda, amagorofa, kandi amategeko yayatanga ari n’aho asanzwe aba. Gusa kuba yifuza ko ibintu bivugururwa ni igitekerezo cyiza, abajyanama be bamufashe kukinoza

Tanga Igitekerezo

Email yanyu ntigaragazwa ku rubuga. Amazina na Email ni ngombwa.