19°C , Partly sunny | Kigali-Rwanda
Umwe mu ngabo z'u Rwanda yambikwa umudali

Centrafique: Brig. Gen. Adil yashimye ubunyamwuga bw’Ingabo z’u Rwanda

Yanditswe na TWAGIRA WILSON

Ku ya 09-02-2018 saa 06:40:39

Umugaba w’Ingabo za MINUSCA (Ingabo z’Umuryango w’Abibumbye zibungabunga amahoro muri Centrafique), mu gice cy’Uburasirazuba, Brig. Gen. Adil Yamin, yashimiye Ingabo z’u Rwanda ku bunyamwuga zigaragaza mu kazi hamwe no kwita ku barwayi baturuka mu bihugu bitandukanye bari mu butumwa bw’amahoro.

Umwe mu ngabo z’u Rwanda yambikwa umudali

Ibyo Brig. Gen.  Adil yabitangaje ubwo  Umutwe w’abaganga b’Ingabo z’u Rwanda bari mu butumwa muri Santarafurika bambitswe imidali ya Loni, Minisiteri y’Ingabo z’Igihugu ikaba yaratangaje ko  abambitswe  imidali bagera kuri  70 bagize Umutwe w’Ingabo z’u Rwanda ufite ibitaro byo ku rwego rwa II mu butumwa bw’amahoro muri Santarafurika .

Brig. Gen. Adil Yamin, akaba yarashimiye Ingabo z’u Rwanda ku bunyamwuga zigaragaza mu kazi hamwe no kwita ku barwayi baturuka mu bihugu bitandukanye bari mu butumwa bw’amahoro.

Yabashimiye akazi keza bakoze kandi abasaba gukomeza guhagarira neza u Rwanda baruhesha ishema ari nako bahesha ishema ubutumwa bwa Loni barimo.

Bambitswe imidali mu rwego rwo kubashimira ubunyamwuga no kwitangira akazi mu bikorwa bigamije kugarura amahoro muri Santarafurika. Umuhango wo kubambika imidali wabereye i Bria, aho ibi bitaro by’ingabo z’u Rwanda bikorera.

Abambitswe imidali bagiye mu butumwa muri Kanama umwaka ushize wa 2017 biteganyijwe ko bazamara igihe cy’umwaka kuko ubutumwa bazaburangiza muri Kanama 2018. Mu gihe bamaze cy’amezi atandatu bavuye uburwayi butandukanye, bakora n’ibikorwa byo kubaga, hamwe n’ubutabazi bwa kiganga bwakozwe hakoreshejwe indege mu kurokora abantu ahantu hatari umutekano.

Ibi bitaro byohereje ikipe  z’abaganga mu gihe cy’amezi 3 ahitwa Bangassou bafasha muri operasiyo za gisirikare ndetse n’abagiye ahitwa Pomboro bahamaze ukwezi batanga ubuvuzi ku baturage bari bakeneye ubutabazi bwihuse. Uretse ibi bikorwa ibitaro by’Ingabo z’u Rwanda mu butumwa bw’amahoro byatanze inkunga y’imiti ku bitaro bya Bria mu gufasha gutabara abarwayi bakeneye imiti.

Umugaba w’Ingabo za MINUSCA, mu gice cy’Uburasirazuba, Brig. Gen. Adil Yamin, wari uhagarariye Intumwa yihariye y’Umunyabanga Mukuru wa Loni, ni we wayoboye uyu muhango wo kwambika imidali ingabo z’u Rwanda ziyobowe na Col. Dr. Jean Chrysostome Kagimbana.

 

 

TANGA IGITEKEREZO

Leave a Reply

Be the First to Comment!

avatar