22°C , Mostly sunny | Kigali-Rwanda
APR FC nyuma yo gutsinda Green Eagles yahise ikatisha itike ya ¼ muri CECAFA Kagame Cup 2019

CECAFA Kagame Cup 2019:  APR FC yabonye itike yo gukomeza muri  ¼

Yanditswe na BUGINGO FIDELE

Ku ya 09-07-2019 saa 07:37:43

APR FC 1-0 Green Eagles

Proline 2-0 Heegan FC

AS Ports 2-0 KMKM

Gor Mahia 2-1 AS Maniema

Tariki 09-07-2019

Bandari FC-Mukura (Huye-13h00)

KCCA-Azam FC (Huye-15h30)

TP Mazembe-KMC (Regional-17h00)

Rayon Sports-Atlabara (Regional-19h30)

Ikipe ya APR FC iri mu makipe atatu ahagarariye u Rwanda mu mikino ya CECAFA Kagame Cup 2019 irimo kubera mu Rwanda yakatishije itike ya ¼ k’irangiza nyuma yo kwitwara neza igatsinda imikino 2 mu itsinda C.

Ejo hashize tariki 08 Nyakanga 2019 ni bwo hakinwe imikino y’umunsi wa  kabiri mu itsinda C yabereye kuri Sitade ya Kigali i Nyamirambo  maze ikipe ya APR FC itsinda Green Eagles yo muri Zambia  igitego 1-0 cyabonetse ku munota wa 59 aho umukinnyi wa Green Eagles, Borface Sunzu yitsinze ku  mupira wari utewe na myugariro wa APR FC, Fitina Ombalenga.

Mu wundi mukino wo mu itsinda C, ikipe ya Proline FC yo muri Uganda yatsinze Heegan FC yo muri Somalia ibitego 2-0 byatsinzwe  na Okiror Joshua na Mustafa Mujuzi.

Muri iri tsinda ikipe ya APR FC irayoboye n’amanota 6 aho yahise ibona itike ya ¼ , ikurikiwe na Proline FC na Green Eagles zifite amanota 3 naho Heegan FC nta nota na rimwe ifite.

Tariki 11 Nyakanga 2019 ni bwo hazakinwa imikino ya nyuma muri iri tsinda aho Proline FC na Green Eagles zizahura kugira ngo  hamenyekane ikipe ikomeza muri ¼   naho APR FC ikine na Heegan FC.

APR FC nyuma yo gutsinda Green Eagles yahise ikatisha itike ya ¼ muri CECAFA Kagame Cup 2019

Mu itsinda D bakinnye imikino y’umunsi wa mbere

Kuri Sitade Umuganda i Rubavu hakinwe imikino y’umunsi wa mbere mu itsinda D aho  ikipe ya  AS Ports yo muri Djibouti yatsinze KMKM yo muri Tanzania ibitego 2-0 naho ikipe ya Gor Mahia yo muri Kenya igatsinda AS Maniema yo muri RDC ibitego 2-1.

Muri iri tsinda imikino izongera kuba tariki 10 Nyakanga 2019 aho Gor Mahia izakina na AS Ports naho AS Maniema ikine na KMKM.

Mu itsinda A na B,  imikino irakomeza uyu munsi

Nyuma y’aho ikipe ya Rayon Sports itangiye neza itsinda TP Mzembe, kuri uyu wa Kabiri tariki 09 Nyakanga 2019  irakina na Atlabara  yo muri Sudani y’Amajyepfo  saa moya n’igice (19h30) mu gihe mbere y’aho ikipe ya TP Mazembe ikina na KMC   saa kumi n’imwe (17h00). Imikino yombi irabera kuri Sitade ya Kigali i Nyamirambo.

Mu mikino y’umunsi wa mbere, Rayon Sports yatsinze TP Mazembe igitego 1-0 naho Atlabara inganya na KMC igitego 1-1.

Mu itsinda B naho  barakina imikino y’umunsi wa kabiri aho  Bandari FC yakira Mukura (13h00) naho KCCA ikine na Azam FC (15h30). Iyi mikino yombi irabera kuri Sitade mpuzamahanga ya Huye.

Ikipe ya Rayon Sports nyuma yo gutsinda TP Mazembe mu mukino wa mbere irakina na Atlabara

TANGA IGITEKEREZO

Leave a Reply

Your email address will not be published. Required fields are marked *