20°C , Partly cloudy | Kigali-Rwanda
Casa Mbungo, Umutoza wa AFC Leopards

Casa afite ikizere cyo guhindura ibintu muri AFC Leopards

Yanditswe na Bizimana Eric

Ku ya 11-02-2019 saa 08:43:53

Casa Mbungo Andre, umutoza wa AFC Leopards yabwiye abafana b’iyi kipe ko hari ikizere cyo guhindura byinshi kugira ngo iyi kipe ibone umusaruro mwiza.

Arabivuga nyuma yo gutsindwa na Gor Mahia ibitego 2-0 mu mukino w’abakeba uzwi nka “Mashemeji Derby” wabaye ku wa Gatandatu tariki 09 Gashyantare 2019, ubera kuri Moi Sports Center i Kasarani mu Mujyi wa Nairobi.

Gor Mahia yafunguye izamu hakiri ku munota wa 15 ku mupira watsinzwe na Kenneth Muguna; yinjiza igitego cya kabiri cya Francis Kahata ku munota wa 64 naho Jacques Tuyisenge atsinda igitego cya gatatu ku munota wa 71 ariko umusifuzi avuga ko yari yabanje kurarira. Iyi kipe ikomeza agahigo ko kumara imikino umunani idatsindwa na AFC Leopards kuva mu 2016.

Casa Mbungo, umutoza wa AFC Leopards avuga ko mu minsi mike amaze muri Kenya, yabonye ko hari amakosa abakinnyi be bakoze mu mikino ibiri ya shampiyona ariko azakosora kugira ngo ikipe ye igaruke mu bihe byiza nyuma yo gutakaza imikino ine iheruka.

Ati: ’’Mu mikino nk’ibiri twakinnye nabonye amakosa cyane cyane ku mipira y’imiterekano dutsindwa. Nge nemera ko abakinnyi bange bifitemo ibikenewe kugira ngo ikipe igaruke mu bihe byayo. Mu cyumweru maze muri Kenya, mfite ikizere. Nge nasaba abafana kudacika intege kuko tugiye gutangira gutsinda.”

Kuri ubu, AFC Leopards iri mu makipe ashobora gusubira mu kiciro cya kabiri kuko iri ku mwanya wa 15 mu gihe Gor Mahia iri ku mwanya wa kabiri n’amanota 22 irushwa amanota atatu n’ikipe ya mbere.

Casa Mbungo, Umutoza wa AFC Leopards

TANGA IGITEKEREZO

Leave a Reply

Your email address will not be published. Required fields are marked *