19°C , Partly cloudy | Kigali-Rwanda

Carnegie Melon University yakuwe mu nshingano za RDB ihabwa MINEDUC

Yanditswe na Mugisha Benigne

Ku ya 01-03-2019 saa 17:32:13
Dr. Mutimura Eugene, Minisitiri w'Uburezi ahererekanya amasezerano na Madamu Clare Akamanzi, Umuyobozi Mukuru wa RDB (Foto MINEDUC)

Kaminuza ya Canergie Melon (CMU) ishami ry’Afurika ikorera mu Rwanda yavanywe mu nshingano z’Urwego rw’Igihugu rw’Iterambere (RDB) ishyirwa mu nshingano za Minisiteri y’Uburezi (MINEDUC).

Umuhango wo kwimura iyi kaminuza wabereye mu cyumba k’Inama cya Minisiteri y’Uburezi hagati ya Minisitiri w’Uburezi Dr Mutimura Eugene n’Umuyobozi Mukuru wa RDB Clare Akamanzi.

Minisitiri w’uburezi, Dr Mutimura Eugene na Clare Akamanzi barasinya amasezerano yo guhererekanya kaminuza ya CMU (Foto Minisduc)

Clare Akamanzi yagaragaje ko mu buryo bwo kwigisha ngo byari bikenewe ko Minisiteri y’Uburezi iba hafi y’iyi kaminuza, kuko hari byinshi ishobora kuyifashamo bijyanye n’uburezi, cyane ko iyi kaminuza yakira abanyeshuri batsinze neza, aho 10% ari bo bahabwa iyi kaminuza muri benshi baba basabye.

Akamanzi yavuze kandi ko iyo ngingo yubahirizwa mu koherezamo abanyeshuri, ariko ngo bigaragara ko bamwe mu bahabwa amahirwe yo kuyigamo baza bafite ubuhanga bukomeye n’ubumenyi mu yandi masomo nk’imibare n’izindi siyansi ariko ugasanga bafite ikibazo k’Icyongereza, ngo ibyo bikaba bigomba gukemurwa na Minisiteri y’Uburezi.

Ati “Hari ibibazo Minisiteri y’Uburezi ishobora gukemura muri Canergie Melon University, ariko RDB itakemura nk’ibibazo bijyanye n’uburezi, ni yo mpamvu bibaye ngombwa ko ishyirwa mu nshingano za Minisiteri y’Uburezi.”

Avuga ko Minisiteri y’Uburezi ari yo ikwiye gufata mu nshingano iyi kaminuza kuko hari aho CMU na Minisiteri y’Uburezi bihurira kugira ngo ikibazo cyose cyavuka iyo Minisiteri ibe yabasha kugikemura.

Minisitiri w’Uburezi avuga ko iyi kaminuza hari byinshi imaze kugeza ku rwego rw’uburezi, aho yafashije gukora porogaramu z’ishuri ryigisha ikoranabuhanga (Rwanda Coding Academy) riherereye mu Karere ka Nyabihu.

Ati “Ni bo badufashije gukora porogaramu z’iri shuri ry’ikoranabuhanga riherereye Nyabihu kuko bafite intiti nyinshi kandi bumva neza izo porogaramu.”

Dr. Mutimura yongeyeho ko iyi kaminuza inafasha muri amwe mu masomo yigishwa mu mashuri yisumbuye nk’imibare n’ubugenge, bikaba bifasha gukomeza kongera ireme ry’uburezi mu mashuri yisumbuye.

Yagarutse ku ngengo y’imari yatangwaga na Leta mu kohereza abanyeshuri b’Abanyarwanda kwiga muri Amerika yagabanutse bitewe n’uko Kaminuza ya Canergie Melon yahageze ari naho abagera ku 10% batsindiye ku manota yo hejuru bajyanwa.

Minisitiri w’uburezi kandi yavuze ko iyi kaminuza yakira abana bavuye hirya no hino ku Isi kongeraho abana b’Abanyarwanda batsinze neza kandi bafite amanota menshi.

Yavuze ko Kaminuza ya Canergie Melon imaze kwibonera inyubako zo gukoreramo, kuko yujuje ibyumba by’amashuri izajya ikoreramo byatwaye ingengo y’imari ingana na miriyoni y’amadorari y’Amerika.

Uhagarariye Canergie Melon University, Rugege Crystal, yunze mu rya Minisitiri avuga ko abanyeshuri bakirwa muri iyi kaminuza b’Abanyarwanda ari ababa barabonye amanota yo hejuru kandi ngo hakirwa abagera ku 10% by’abiga muri iyi kaminuza bose harimo n’abaturaka hirya no hino ku Isi.

Yagarutse ku mubare w’abaharangije bangana na 145 kuri ubu abakiri ku ntebe y’ishuri akaba ari 104. Yongeyeho ko bajyaga bakira abanyeshuri bake ku mpamvu z’uko bari bagikorera mu bukode, ariko ko umubare ushobora kwiyongera kuko babonye amashuri yabo bwite bakoreramo.

Madamu Rugege yavuze ko bigisha porogaramu zinyuranye mu kiciro cya gatatu cya kaminuza kandi ngo abanyeshuri baharangiza babasha kugira amahirwe menshi yo kwiga no gukora hirya no hino ku Isi kuko baba bafite ubumenyi buhagije.

Dr. Mutimura Eugene, Minisitiri w’Uburezi ahererekanya amasezerano na Madamu Clare Akamanzi, Umuyobozi Mukuru wa RDB (Foto MINEDUC)

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.