18°C , Mostly cloudy | Kigali-Rwanda
Louise Mushikiwabo (iburyo) na Michaelle Jean ni bo bahanganye ku mwanya w'Umunyamabanga Mukuru wa Francophonie

Canada na Quebec bishyigikiye Mushikiwabo mu kuyobora Francophonie

Yanditswe na Imvaho Nshya

Ku ya 10-10-2018 saa 08:37:53

Guverinoma ya Canada n’iya Quebec byatangaje ko bishyigikiye kandidatire ya Louise Mushikiwabo ku mwanya w’ubuyobozi bw’Umuryango wa Francophonie.

Ibi birongera amahirwe ya Mushikiwabo usanzwe ari Minisitiri w’Ububanyi n’amahanga w’u Rwanda kuva muri 2009, bikagabanya aya Michaelle Jean bahanganye umaze imyaka ine ayobora uyu muryango.

Amatora y’Umuyobozi wa Francophonie, umuryango w’ibihugu bikoresha Igifaransa, azaba mu nama nkuru yawo iteganyijwe kuwa 11-12 Ugushyingo 2018 muri Armenia.

Louise Mushikiwabo (iburyo) na Michaelle Jean ni bo bahanganye ku mwanya w’Umunyamabanga Mukuru wa Francophonie

Umuvugizi wa Minisitiri wa Canada ufite ibikorwa bya Francophonie mu nshingano ze, Melanie Joly, yavuze ko Canada yanzuye gushyigikira Mushikiwabo, nk’uko tubikesha Global News.

“Twubaha ibyo Jean yakoze nk’Umunyamabanga Mukuru wa Francophonie, cyane cyane mu burezi no guteza imbere abagore”, ni ko itangazo rya Joly rivuga.

Rikomeza rigira riti, “Gusa ku bijyanye n’ukwiye kuba Umunyamabanga Mukuru kuri ubu, Canada ishyigikiye ushyigikiwe na benshi” ari we Louise Mushikiwabo.

Mushikiwabo asanzwe ashyigikiwe n’Umuryango wa Afurika yunze Ubumwe na Perezida w’u Bufaransa, Emmanuel Macron.

Kuwa 9 Ugushyingo, Minisitiri w’Intebe wa Quebec, Francois Legault abicishije kuri twitter, yavuze ko Francophonie ikeneye imiyoborere mishya.

Yavuze ko Quebec yiteguye gushyigikira umukandida ushyigikiwe n’ibihugu bya Afurika.

Jean ashinjwa gusesagura umutungo mu gihe cy’imyaka ine amaze ayobora uyu muryango.

Itangazamakuru ryo muri Quebec ryatangaje ko yakoresheje ibihumbi 500 by’amadolari mu gusana inzu ye iri i Paris ndetse agakoresha amadolari ibihumbi 20 kuri piano.

Mushikiwabo yanditse kuri Twitter ko yishimiye byimazeyo kuba Quebec imushyigikiye, avuga ko ari ikimenyetso cy’ubufatanye bukwiye kuranga Francophonie.

TANGA IGITEKEREZO

Leave a Reply

Your email address will not be published. Required fields are marked *