21°C , Intermittent clouds | Kigali-Rwanda

CAN 2021: Abakinnyi 27 b’Amavubi bahamagawe kwitegura Mozambique na Cameroun

Yanditswe na Bugingo Fidèle

Ku ya 07-11-2019 saa 10:13:52
Ikipe y'u Rwanda izakina na Mozambique na Cameroun mu mikino y'amajonjora mu gushaka itike ya CAN 2021

Tariki 14-11-2019

Mozambique-Rwanda (Maputo)

Tariki 17-11-2019

Rwanda-Cameroun (Kigali)

Umutoza w’ikipe y’igihugu “Amavubi”, Mashami Vincent  yahamagaye abakinnyi 27 kwitegura imikino ibiri y’amajonjora mu gushaka itike ya CAN 2021.

Iyi mikino ni iyo mu itsinda F aho ikipe y’u Rwanda iri kumwe na Cameroun izakira irushanwa, Mozambique na Cap Vert.

Tariki 14 Ugushyingo 2019 ni bwo ikipe y’u Rwanda “Amavubi” izakina na Mozambique, umukino uzabera Maputo. Nyuma y’uyu mukino tariki 17 Ugushyingo 2019, ikipe y’u Rwanda izahita yakira Cameroun, umukino uzabera i Kigali.

Mu kwitegura iyi mikino yombi, umutoza Mashami tariki 06 Ugushyingo 2017 yatangaje abakinnyi 27 barimo 11 bakina hanze y’u Rwanda bagomba gutangira umwiherero n’imyitozo.

Si ubwa mbere  izi kipe zigiye guhura n’Amavubi

Iyi kipe y’u Rwanda si ubwa mbere igiye guhura na Cameroun ndetse na Mozambique mu mikino yo gushaka itike y’imikino y’Afurika.

Mu gushaka itike ya CAN 2008, Amavubi yari mu itsinda rya 5 hamwe na Cameroun, Guinea Equatorial na Liberia. Icyo gihe Cameroun yasoje iyoboye itsinda n’amanota 15, Guinea  Equatorial iba iya 2 n’amanota 10 naho u Rwanda  rusoreza ku mwanya wa 3 n’amanota 6.

Ikipe y’u Rwanda yatsinzwe na Cameroun imikino yombi aho ubanza wabereye mu Rwanda Cameroun yatsinze ibitego 3-0 naho uwo kwishyura wabereye  Garoua, Cameroun itsinda u Rwanda ibitego 2-1.

Mu gushaka itike ya CAN 2017, ikipe y’u Rwanda yari mu itsinda H hamwe na  Mozambique, Mauritius na Ghana. ikipe y’u Rwanda yatsindiye Mozambique iwayo igitego 1-0 naho  mu mukino wabereye mu Rwanda, Mozambique itsinda u Rwanda ibitego 3-2.

Ikipe y’u Rwanda iheruka  kwitabira imikino y’Afurika  “CAN”  muri 2004. Muri iyi minsi ikipe y’u Rwanda irimo kwitwara neza dore ko mu mikino 6 iheruka iyi kipe itaratsindwa  aho yatsinze imikino 4 ikanganya 2.

Abakinnyi 27 bahamagawe

Abanyezamu:  Ndayishimiye Eric (AS Kigali), Kimenyi Yves (Rayon Sports), Habarurema Gahungu (Police FC)  na  Mvuyekure Emery (Tusker FC, Kenya).

Myugariro: Manzi Thierry, Fitina Omborenga, Imanishimwe Emmanuel, Mutsinzi Ange (APR FC), Rutanga Eric (Rayon Sports), Bayisenge Emery (Saif SC, Bangladesh), Rwatubyaye Abdul (Colorado Rapids, USA)   na  Nirisarike Salomon (Pyunik FC, Armenia).

Hagati:  Niyonzima Haruna, Nsabimana Eric (AS Kigali), Iranzi Jean Claude (Rayon Sports), Niyonzima Ally (Al Bashaer, Oman), Niyonzima Olivier, Manishimwe Djabel (APR FC), Muhire Kevin (Misr El Makkasa, Misiri) na Bizimana Djihad (Waasland Beveren, Belgium).

Rutahizamu: Mico Justin, Iyabivuze Osée (Police FC), Usengimana Danny (APR FC), Kagere Meddie (Simba SC, Tanzania), Tuyisenge Jacques (Pétro Atletico, Angola), Hakizimana Muhadjiri (Emirates Club, UAE) na Sibomana Patrick (Young Africans, Tanzania).

Abakinnyi bahamagawe bahise batangira umwiherero naho abandi barimo abo muri APR FC bazasanga abandi tariki 08 Ugushyingo 2019 nyuma y’umukino iyi kipe igomba gukina na Kiyovu. Mu bakina hanze, Tuyisenge Jacques ukinira  Pétro Atletico muri  Angola na Mvuyekure Emery ukinira Tusker FC yo muri  Kenya bageze mu Rwanda.

Umwanditsi:

Bugingo Fidèle

One Comment on “CAN 2021: Abakinnyi 27 b’Amavubi bahamagawe kwitegura Mozambique na Cameroun”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.