19°C , Mostly cloudy | Kigali-Rwanda
Abakinnyi b'Amavubi ubwo bari bageze muri Guinea Conakry

CAN 2019: Amavubi yakomereje imyiteguro y’umukino wa Guinea i Conakry

Yanditswe na BIZIMANA ERIC

Ku ya 11-10-2018 saa 14:27:39

Nyuma yo kugera muri Guinea Conakry, abakinnyi n’abatoza b’ikipe y’igihugu bakomeje kwitegura umukino uzabahuza na Guinea Conakry mu gushaka itike y’igikombe cy’Afurika “CAN 2019” uzaba ejo tariki 12 Ukwakira 2018 kuri Sitade yitiriwe uwa 28 Nzeri.

Amavubi yageze muri Guinea ku wa Kabiri tariki 09 Ukwakira 2018 saa moya z’umugoroba (19h00) ku isaha y’i Kigali nyuma y’amasaha 28 bahagurutse i Kigali, baraye Addis Abeba muri Ethiopia. Bakigera muri iki gihugu bakiriwe n’abanyarwanda bake bahaba.

Ku munsi w’ejo tariki 10 Ukwakira 2018 mu gitondo, abakinnyi b’Amavubi bakoze imyitozo yo kunanura imitsi mu gihe ku gicamunsi bakoze imyitozo banakora ku mupira. Binateganyijwe ko bakomeza imyitozo kuri uyu wa Kane tariki 11 Ukwakira 2018 baza gukorera kuri Sitade bazakiniraho umukino ejo tariki 12 Ukwakira 2018.

Abakinnyi b’Amavubi ubwo bari bageze muri Guinea Conakry

Mashami Vincent, umutoza mukuru w’Amavubi avuga ko kuba barageze muri iki gihugu hakiri kare byatumye bamenyera ikirere cyaho gishyuha cyane ugereranyije no mu Rwanda. Yongeye gusobanura ko abakinnyi n’abatoza bazi neza ko uyu mukino ari uw’amahirwe ya nyuma bityo bagomba kuwitwaramo neza byanze bikunze.

Ati “Ubutumwa abakinnyi barabuzi nk’uko n’Abanyarwanda babizi. Ni imibare igaragara, ni imibare yumvikana. Birasaba ko uyu mukino tuwuha agaciro kadasanzwe tukibagirwa ibyabaye mbere byarangiye ku mikino ibiri iheruka, dukeneye amanota atatu kuri uyu mukino nubwo bizaba bitoroshye. Ni umusozi muremure tuzurira ariko abakinnyi bacu biteguye gutanga ibyo bafite na bo bavuye i Kigali babizi. Aya ni yo mahirwe yacu ya nyuma.”

Ibi binashimangirwa kandi na Haruna Niyonzima, kapiteni w’Amavubi werekanye ko baje bazi ikibazanye, kandi bataciwe intege n’ibitangazwa n’abakunzi b’umupira w’amaguru muri iki gihugu bafashe Amavubi nk’ikipe nto izatsindwa ibitego biri hejuru ya bitatu.

Ati “Abantu bari iwabo bakubwira ibyo bashaka, ariko ku bantu tuzi umupira biriya ni amagambo ibyivugira ni mu kibuga. Mu mupira nkunda kubivuga cyane nta kintu kidashoboka icyangombwa ni ukubyishyiramo no kumva ko bishoboka. Ni umukino utoroshye ni ibintu bigaragarira buri wese. Ariko mu mupira iyo wabyishyizemo birashoboka. Murabyibuka twagiye dukina imwe mu mikino abantu batumva ko twakora ibintu bihambaye ariko bigashoboka, tukanatungurana. Ni umukino dushobora gukora ibyo abantu batatekerezaga.”

Visi Perezida w’ishyirahamwe ry’umupira w’amaguru mu Rwanda “FERWAFA” Habyarimana Marcel Matiku akaba ari nawe uyoboye abagiye muri Guinea, yavuze ko bakiriwe neza cyane n’Abanyarwanda baba muri iki gihugu banabijeje kuzaza kubashyigikira kuri Sitade.

Abakinnyi 21 bahagurutse mu Rwanda berekeza muri Guinea bahahuriye na Nirisarike Salomon na Bizimana Djihad bakina mu Bubiligi.

TANGA IGITEKEREZO

Leave a Reply

Your email address will not be published. Required fields are marked *