25°C , Mostly cloudy | Kigali-Rwanda

CAF yemeje aho  imikino ya nyuma y’Afurika y’amakipe izabera

Yanditswe na Bugingo Fidèle

Ku ya 17-03-2020 saa 11:24:23
Sitade Japoma izakira umukino wa nyuma w'imikino y'Afurika y'amakipe yabaye aya mbere iwayo

Impuzamashyirahamwe y’umupira w’amaguru muri Afurika « CAF » yatangaje ibihugu bizakira imikino ya nyuma  y’Afurika y’amakipe “Interclubs 2019-2020”.

Tariki 16 Werurwe 2020 ni bwo CAF yatangaje ku mugaragaro ko umukino wa nyuma  w’imikino y’Afurika y’amakipe yabaye aya mbere iwayo « Toal CAF Champions League 2019-2020 » uzabera  i Douala muri Cameroun kuri  Sitade Japoma.

Iyi Sitade  yakira abantu bagera ku bihumbi 50 iracyari nshya  kuko yubatswe  mu rwego rwo kwitegura kwakira CHAN 2020  ndetse na CAN 2021. Iyi Sitade yatoranyijwe ihigitse izindi 2 zari zasabye kwakira uyu mukino zirimo  Sitade ya Mohammed V mu mujyi wa Casablanca muri Maroc  ndetse na Sitade Olympique de Radès mu mujyi wa Tunis muri Tunizia.

Muri iki kiciro  « Toal CAF Champions League 2019-2020 », imikino igeze muri ½ k’irangiza aho  ikipe ya Raja Casablanca  izahura na Zamalek naho Wydad Casablanca ihure na Al-Ahly. Imikino ya ½ ibanza izaba tariki 01 na 02 Gicurasi 2020 naho iyo kwishyura ibe tariki 08 na 09 Gicurasi 2020. Umukino wa nyuma  uzaba tariki 29 Gicurasi 2020  mu gihe icyorezo cya Coronavirus cyaba cyabaganutse kuko kuri ubu imikino mpuzamahanga yose yahagaritswe.

Undi mukino uzabera muri Maroc

Umukino wa nyuma  w’imikino y’Afurika y’amakipe yitwaye neza iwayo «Total CAF Confederation Cup 2019-2020 », Maroc ni yo yahawe  kwakira umukino wa nyuma aho uzabera kuri  Sitade Prince Moulay Abdellah mu mujyi wa Rabat akaba ari nayo yari yasabye kwakira uyu mukino ikaba yakira abantu bagera ku bihumbi 53.

Muri iki kiciro naho imikino igeze muri ½ k’irangiza  aho  ikipe ya Pyramids mu Misiri izahura na Horoya AC yo muri Guinea naho ikipe 2 zo muri Maroc, RS Berkane  na Hassania Agadir zihure. Imikino ya ½ ibanza izaba tariki 03 Gicurasi 2020 naho imikino yo kwishyura ibe  tariki 10 Gicurasi 2020.  Umukino wa nyuma uzaba tariki 24 Gicurasi 2020.

Iyi ni inshuro ya mbere  hagiye kuba umukino wa nyuma muri ibi byiciro  byombi bitandukanye n’ibyari bisanzwe aho amakipe yageraga ku mukino wa nyuma yakinaga umukino ubanza n’uwo kwishyura. Muri Kamena 2019 akaba ari komite nshingwabikorwa ya CAF yemeje ko hagomba kujya hakinwa  umukino umwe kandi aho uzabera hakemezwa mbere.

Ibi bikaba byaraje nyuma y’ikibazo cyabaye  mu mukino wa nyuma wa 2018-2019 wahuje Espérance de Tunis (Tunisia) na Wydad Casablanca (Maroc) ahakinwe umukino ubanza wabereye muri Maroc izi kipe zikanganya 1-1 naho umukino wo kwishyura nturangire kubera kutumvikana hanyuma bikarangira Espérance de Tunis  ihawe igikombe.

Umwanditsi:

Bugingo Fidèle

Tanga Igitekerezo

Email yanyu ntigaragazwa ku rubuga. Amazina na Email ni ngombwa.