21°C , Partly cloudy | Kigali-Rwanda
Minisitiri w'Ikoranabuhanga na Inovasiyo, Ingabire Paula mu kiganiro n'Imvaho Nshya ku buzima bwe bwite

Byinshi wamenya ku buzima bwite bwa minisitiri Ingabire Paula

Yanditswe na Kayitare Jean Paul

Ku ya 22-10-2018 saa 15:25:45

Ingabire Paula ni nyina w’abana batatu, akaba imfura mu muryango w’abakobwa batandatu.

Yavukiye muri Kenya kuwa 24 Mutarama 1983, iwabo baza kwimukira muri Uganda hanyuma baza mu Rwanda.

Mu kiganiro cyihariye yahaye Imvaho Nshya, yatubwiye ko akunda koga no kureba basketball.

Twamwegereye nyuma y’aho agiriwe icyizere akagirwa Minisitiri w’Ikoranabuhanga na Inovasiyo, atubwira byinshi ku buzima bwe bwite.

Ingabire Paula ni muntu ki?

Navukiye muri Kenya, ndubatse mfite abana batatu; umuhungu n’abakobwa babiri. Amashuri abanza nayigiye muri Kenya na Uganda ariko hagati aho no muri Camps Kigali nahigiye amashuri abanza tugitaha mu Rwanda, ikiciro rusange cy’amashuri yisumbuye nacyigiye muri Lycée Notre-Dame de Cîteaux hanyuma ikiciro cya kabiri cy’amashuri yisumbuye ngikomereza muri Lycée de Kigali mu ishami ry’Imibare n’Ubugenge. Kaminuza nayikomereje muri KIST niga Computer Science (ubumenyi mu bya mudasobwa) nyuma nkomeza ikiciro cya gatatu cya kaminuza muri kaminuza ya Massachusetts muri Leta zunze ubumwe z’Amerika. Narangije uyu mwaka muri Nyakanga.

Minisitiri w’Ikoranabuhanga na Inovasiyo, Ingabire Paula mu kiganiro n’Imvaho Nshya ku buzima bwe bwite

Mbere yo kuba minisitiri, ni iyihe mirimo wakoze?

Nkirangiza kwiga muri Kaminuza nahise njya gukora mu kigo kitwa RITA (Rwanda Information Technology Authority). Akazi narinshinzwe kari ugukorana n’abikorera mu by’ikoranabuhanga, ako kazi nagakozemo imyaka igera kuri ibiri hanyuma nkora nk’umukozi ushinzwe imishinga (Project Manager). Iki kigo cyaje gushyirwa muri RDB aho nakoze mu myanya itandukanye harimo no kuba narabaye umuyobozi mukuru w’ishami rishinzwe ikoranabuhanga.

Nyuma y’amasaha y’akazi, ukora iki?

Umwanya wose mbonye ntari ku kazi, nywushyira mu bana nkamenya ibijyanye n’ishuri, gusohokana tukajya gusura imiryango. Nk’umubyeyi nita ku bana no ku muryango muri rusange.

Week end yawe iba yifashe ite?

Ku wa Gatandatu ntaha ubukwe, iyo hatari ubukwe njya mu birori by’incuti zanjye, kujya gusura abarwayi. Ndi umukirisitu, ku Cyumweru njya gusengera kuri Christian Life Assembly CLA hariya Nyarutarama, njye n’umuryango wanjye.

Mukunda uwuhe mukino?

Nkunda kureba umukino wa Basketball ariko mu bindi nkunda amarushanwa yo koga. Hanyuma umukino nkunda gukina ni koga ni na cyo kintu nkunda cyane.

Mu bindi nkunda gutwara igare, gusoma ibitabo igihe nibura mbonye iminota 30 ariko iyo ufite abana batoya uba ufite gihe gito.

Iyo wasohotse ukunda kurya iki, unywa iki?

Ikintu cya mbere nkunda ni capati, ibishyimbo, ariko iyo ngize amahirwe nkasohoka ndya capati n’isosi.

Mu buzima bwawe ni nde muntu ukubera ikitegererezo?

Nakuze nigira kuri papa umbyara kuko yari wa muntu wadusigiraga ibibazo 10 byo mu mibare ngo tubikore kandi akagaruka agasanga twayirangije twese, ni byo byatuma nkunda imibare nkanayiga muri kaminuza. Yanyubatsemo imbaraga antera umwete ni yo mpamvu mvuga ko ari we umbera ikitegererezo.

Ugira umwanya wo gusura abagize umuryango wanyu mu cyaro?

Yego atari vuba aha. Twajyaga tubikora kera nyogokuru agihari tukajya kumusura ariko amaze kwitaba Imana ntitukijyayo. Iyo hari uwo mu muryango wapfushije cyangwa hari uwakoresheje ubukwe tujyayo.

Iyo umuntu agiye mu cyaro by’umwihariko iyo ari abatunzi hari inka aba yumva akunze, wowe wakundaga iyihe niba iwanyu mworoye?

[Aseka cyane..] nkunda inka y’ibara ry’umukara n’umweru ariko ntibambwiye uko yitwa. Ndi umwana nakundaga inka y’igisa kuko nibuka ko najyaga mbaza papa nti Gisa zimaze kuba zingahe? Akambwira ngo ntazihari ngahita mubwira nti ugomba gushaka gisa.

Perezida Paul Kagame yakugiriye ikizere aguha inshingano zo kuyobora minisiteri y’ikoranabuhanga na inovasiyo, wabyakiriye ute?

Narishimye birumvikana kandi nishimira n’inshingano mpawe. Numvise ampaye akazi kenshi kandi ngomba gukora. Numvise ko abo ngiye gukorana na bo twari dusanzwe duhura kenshi kandi nizeye ko bizanyorohera […].

Uburinganire mu ikoranabuhanga mu Rwanda burashoboka?

Yego burashoboka cyane! Ndi mu itsinda twatangije ryitwa ‘Girls In ICT’ impamvu yayo kwari ukugira ngo dukangurire abari n’abategarugori kumva ko ikoranabuhanga tutagomba kuriharira abagabo cyangwa abasore. Uburinganire burashoboka cyane kandi hari urwego bimaze kugeraho.

Mu Rwanda mufana iyihe kipe?

[N’ubwuzu bwinshi] Mfana APR FC

Mukunda kumva iyihe ndirimbo, ni uwuhe muhanzi ukunda?

Nkunda indirimbo zaririmbiwe Imana. Nta muhanzi navuga ko nkunda ahubwo nkunda ubutumwa batanga.

Ni ryari uba wumva wambaye neza?

Iyo nambaye kositimu n’inkweto ndende mba numva nambaye neza ariko nambaye kositimu nkambara inkweto ziciye bugufi, sinkubeshye ntabwo mba numva nambaye neza.

Turabashimiye kubw’iki kiganiro muduhaye

Murakoze namwe.

Minisitiri Ingabire Paula aganira n’umunyamakuru wacu Jean Paul Kayitare mu biro bye nyuma y’umuhango w’ihererekanyabubasha n’uwo asimbuye.

TANGA IGITEKEREZO

Leave a Reply

Your email address will not be published. Required fields are marked *