28°C , Sunny | Kigali-Rwanda

Byinshi ku mushinga wo kongera umusaruro w’ubuhinzi no kwihaza mu biribwa

Yanditswe na Imvaho Nshya

Ku ya 28-06-2019 saa 11:41:55

Umushinga wo kongera umusaruro w’ubuhinzi no kwihaza mu biribwa uzwi mu rurimi rw’Icyongereza nka “Sustainable Agricultural Intensification and Food security Project (SAIP)” watangije ibikorwa byawo ku itariki ya 14 Ukuboza 2018.

Intego nyamukuru y’uyu mushinga ni ukongera umusaruro w’ubuhizi, mu bwinshi, n’ubwiza, gushakira umusaruro amasoko no kwihaza mu biribwa hirya no hino mu Gihugu hakoreshejwe uburyo bugezweho bwo kuhira imyaka, gufata neza ubutaka no kububyaza umusaruro, no kuzamura urwego rw’imirire myiza mu muryango.
Kugeza ubu uyu mushinga ukorera mu turere umunani tw’Igihugu ari two Karongi, Rutsiro na Nyabihu duherereye mu Ntara y’Iburengerazuba, Rulindo mu Ntara y’Amajyaruguru, Nyanza mu Ntara y’Amajyepfo, Rwamagana, Kayonza na Gatsibo mu Ntara y’Iburasirazuba.

Biteganyijwe ko uyu mushinga uzamara imyaka itanu, ukazagura ibikorwa byawo no mu tundi turere biturutse ku masezerano azaba ari hagati ya Repubulika y’u Rwanda na Banki y’Isi (World Bank).
Uzafasha abahinzi kongera umusaruro, kongera agaciro kawo hibandwa ku bihingwa byatoranyijwe ari byo; imbuto, imboga, ibirayi, ibishyimbo n’ibigori, bikazashakirwa amasoko imbere mu Gihugu, mu karere ndetse no ku rwego mpuzamahanga.

Abarenga 200,000 bazungukira kuri uyu mushinga

Umushinga wo kongera umusaruro w’ubuhinzi no kwihaza mu biribwa uzashyirwa mu bikorwa binyuze mu bice 3 by’ingenzi: (1) kubaka ubushobozi bw’abahinzi-borozi mu nzego zitandukanye, kunoza umusaruro w’ubuhinzi no kuzamura urwego rw’imirire mu miryango, (2) kuhira imyaka no gukoresha neza amazi mu bikorwa by’ubuhinzi, (3) kongerera agaciro umusaruro no kuwushakira amasoko.

Uyu mushinga uteganya kugeza ibikorwa byawo mu miryango 38,606 igizwe n’abantu basaga 200,000 bibumbuye mu matsinda 1,724 agize koperative zigera kuri 16.

Iyo miryango ishobora kwiyongera bishingiye ku kuba umushinga na wo uzaba wagura ibikorwa byawo mu tundi turere mu gihe bizaba byumvikanyweho hagati ya Leta y’U Rwanda na Banki y’Isi.

Aba bahinzi ni abakorera ibikorwa byabo by’ubuhinzi mu masite yatunganyijwe ndetse n’ibyanya byuhirwa byatunganyijwe n’imishinga 2 yabanjirije uyu mushinga: uwo gutunganya ubutaka, gufata amazi no kuhira imirima y’imusozi (Land husbandry Water harvesting and Hillside irrigation project (LWH), n’umushinga utsura amajyambere y’icyaro ikiciro cya 3 (Third Rural Sector Support Project (RSSP3).

Mu gihe k’ishyirwa mu bikorwa rya SAIP, imbaraga nyinshi zizanashyirwa mu gushishikariza abagore n’urubyiruko kwitabira ibikorwa by’umushinga bizaba bikorerwa mu matsinda ndetse na koperative kuko byagaragaye ko ibyo byiciro byombi bifite imbaraga mu iterambere ry’Igihugu.

Mu zindi nyungu abakorera ibikorwa by’ubuhinzi aho uyu mushinga ukorera bazagira, harimo gukorana n’ibigo by’imari bitandukanye cyane cyane mu kubona inguzanyo z’ubuhinzi, gukoresha inyubako zigezweho zagenewe gutunganyirizwamo no guhunikamo umusaruro zubatswe muri utwo turere n’ibindi bikorwa bitandukanye.

SAIP ni umushinga uterwa inkunga n’Ikigega k’Isi gishinzwe gutera inkunga ubuhinzi no kwihaza mu Biribwa kizwi mu rurimi rw’Icyongereza nka “Global Agriculture and Food Security Program (GAFSP)”, binyuze muri Banki y’Isi (World Bank).

Uyu mushinga ubarizwa mu Kigo k’Igihugu gishinzwe Iterambere ry’Ubushinzi n’Ubworozi (RAB).

Kwita ku buhinzi bitera ibinezaneza mu gihe k’isarura

Ubuhinzi bukozwe neza buteza imbere imirire myiza

Ubuhinzi buvuguruye bwagiye buha abahinzi ubushobozi n’ikizere cyo kongera umusaruro

Ubuhinzi bwa watermelon bukomeje gutezwa imbere mu gihugu

Ku bindi bisobanuro, mushobora kubaza cyangwa mukatwandikira kuri aderesi ikurikira:

SPIU World Bank & KOICA Funded Projects
P.O BOX 6961
8 KG 7 Ave Kacyiru Kigali,
Boulevard de l’Umuganda

Email: saip@rssp.gov.rw, rcsp@rssp.gov.rw
Website: http://www.lwh-rssp.minagri.gov.rw

Twitter: @SAIP_RCSP
Facebook: SAIP/RCSP
Flickr: SAIP_RCSP
YouTube: SPIU SAIP/RCSP

 

TANGA IGITEKEREZO

Leave a Reply

Your email address will not be published. Required fields are marked *