22°C , Mostly cloudy | Kigali-Rwanda

Bwa mbere abapolisikazi benshi boherejwe mu butumwa bw’amahoro

Yanditswe na NDAMYIROKOYE FRANÇOIS

Ku ya 28-06-2018 saa 08:08:54

Mu masaha yo mu gitondo k’ejo hashize ku wa 27 Kamena 2018 itsinda ry’abapolisikazi ryerekeje mu butumwa bw’amahoro bw’Umuryango w’Abibumbye muri Sudani y’Epfo. Umuyobozi wa Polisi y’Igihugu wungirije ushinzwe ubuyobozi n’abakozi DIGP Juvenal Marizamunda, avuga ko kuri iyi nshuro ari bwo hagiye abapolisikazi benshi.

Itsinda rigizwe n’Abapolisikazi berekeza mu butumwa bw’amahoro muri Sudani y’Epfo (Foto RNP)

Iri tsinda ry’abapolisikazi riyobowe na ACP Teddy Ruyenzi wavuze ko biteguye kuzakora neza inshingano zabo nk’uko no mu Rwanda basanzwe bazikora. Yashimangiye ko babiherewe amahugurwa kandi mu kunoza akazi ntibazibagirwa kwitwara neza guhora kubaranga.

ACP Teddy avuga ko kwita ku bagore no ku bana uzaba umwe mu myihariko yabo kuko ari bo ahanini  bahohoterwa mu ntambara.

Kuba iryo tsinda rigizwe n’ab’igina gore, yavuze ko bifite icyo bivuze ku Banyarwanda ndetse no ku bagore bo muri Sudani y’Epfo. Igisobanuro cyabyo avuga ko nta kindi, ahubwo ari uko abagore imirimo yose bayishoboye.

Yavuze na none ko bo n’abapolisi baho bazafatanya mu kwigisha no kumvikanisha ko abagore bakwiye kugira uruhare mu kubungabunga umutekano cyangwa mu kuwugarura.

Umuyobozi wa Polisi wungirije ushinzwe ubuyobozi n’abakozi DIGP Juvenal Marizamunda, yavuze ko atari ubwa mbere u Rwanda rwohereje abapolisikazi mu butumwa bw’amahoro, ngo ariko kuri iyi nshuro ni bwo hagiye benshi.

Yagize ati “Nta bwo ari ubwa mbere twohereje abapolisikazi mu butumwa bw’amahoro. Hajyaga hagenda bake ariko ubu hagiye benshi n’umuyobozi wabo ni  ubwa mbere  tumwohereje  nk’umugore”.

Na we kandi yashimangiye ko by’akarusho abo bapolisikazi bazajya bafasha abanyantege nke “Abagore n’abana” bari mu nkambi kandi ni no mu rwego rwo kwerekana ko abagore bashobora no gukora inshingano zikomeye kurusha abagabo hamwe na hamwe.

DIGP Juvenal Marizamunda avuga ko ibi bigiye gufasha mu gukangurira Abanyarwandakazi kwitabira kujya mu kazi k’inzego z’umutekano, kandi n’aho bagiye mu butumwa bw’amahoro birabereka ko abagore bashoboye nk’uko Abanyarwandakazi babigezeho.

Ku ya 26 Kamena 2018, Umuyobozi Mukuru wa Polisi wungurije ushinzwe ibikorwa bya Polisi y’u Rwanda, DIGP Dan Munyuza yabahaye ubutumwa burimo ubw’uko bakwiye kuzakora akazi neza bagahesha ishema igihugu bahagarariye.

Aba bapolisikazi berekeje muri ubu butumwa nyuma y’uko  Umukuru w’Igihugu Paul Kagame muri Nzeri 2015 yari yabyiyemeje imbere y’inama  y’abakuru b’ibihugu yabereye ku kicaro cy’Umuryango w’Abibumbye  i New York.

TANGA IGITEKEREZO

Leave a Reply

Be the First to Comment!

avatar