21°C , Partly sunny | Kigali-Rwanda
Umunyamabanga Nshingwabikorwa w'Umurenge wa Kanombe Higiro Emmanuel

Busanza na Karama bihanzwe amaso mu iterambere rya Kanombe

Yanditswe na admin

Ku ya 20-12-2017 saa 07:21:27

Umurenge wa Kanombe ni umwe mu mirenge igize Akarere ka Kicukiro, ufite abaturage barenga ibihumbi 51, ufite ikerekezo k’iterambere gishingiye ku kuvugurura imiturire, kunoza ubucuruzi, ibi bikajyana no guhanga ahandi hantu hashya hafite uruhare mu iterambere ry’ejo hazaza hawo.

Higiro Emmanuel ni umunyamabanga nshingwabikorwa w’Umurenge wa Kanombe, avuga ko uwo murenge ufite ibice bibiri bifatwa nk’ibice by’umugi n’ikindi gice kikiri mu nzira y’amajyambere. Ati ”Kanombe  ifite ibice bibiri hari Rubirizi na Kabeza bifatwa nk’igice cy’umugi, hari n’igice cya Busanza na Karama hakiri mu nzira y’amajyambere, aha hateganyirijwe umwihariko w’imiturire igezweho, hari umushoramari wamaze kuboneka agiye kubaka amazu muri Karama yakira abantu benshi ku buso bwa hegitari  20 muri 50 ziteganyijwe, ni ahantu hafite umwanya wo gukoreramo ibikorwa binyuranye by’amajyambere byitezweho iterambere rya Kanombe.”

Avuga ko hari ibikorwa byubatswe n’ibiteganyijwe bizafasha uyu murenge gutera imbere no guhahirana n’indi mirenge. Ati ”Nk’ubu uriya muhanda uva Rubirizi ugana Nyarugunga woroheje ubuhahirane, hari ikiraro gihuza Kanombe, Kagarama na Gahanga bizadufasha no kugera mu Bugesera, iyo urebye Kanombe ni Umurenge utari mu bwigunge kuko abaturage bamwe ni isoko ry’abandi, ibindi bikorwa    Polisi y’igihugu ishami ryo mu muhanda igiye kubaka inyubako y’ishuri rikomeye   izakorerwamo  imirimo yo kwigisha amategeko, n’ibindi bijyana n’imyitwarire yo mu muhanda nk’impushya zo gutwara.”

Avuga ko Umurenge wa Kanombe ari umurenge urangwa n’urubyiruko n’abagore bakunda umurimo. ati ”Dufite umubare w’urubyiruko n’abagore bakunda umurimo, urubyiruko abenshi batwara moto, abandi benshi batwara amagare kubera ko hari imihanda imwe n’imwe amagare yifashishwa, ibi bibafasha gutunga imiryango yabo, mu bagore hari abagore bahoze mu buzunguzayi bakuwemo ubu baracururiza mu Gashyushya, hari n’imishinga igera ku 100 umwaka ushize yasabaga guterwa inkunga, dufite umujyanama mu by’ubucuruzi ufasha abifuza gukora imishinga.”

Uyu muyobozi yizeza abaturage ko ikibazo cy’amazi bahuraga na cyo n’ikibazo cy’abatarabona ubwishingizi mu kwivuza  bidatinze nabyo biba byabonewe umuti. Ati ”Ku bufatanye n’Ikigo k’igihugu gifite mu nshingano amazi n’umuryango utari uwa Leta bagiye kuvugurura imiyoboro y’amazi  ku buryo bitarenze ukwezi kwa Mata umwaka utaha abaturage bose bazaba bafite amazi. Ku bijyanye n’ubwisungane mu kwivuza turi kuri 70%, ukwezi gushize twari dufite abantu barenga 2 000 batabufite, muri abo 1 400 bamaze kubwishyurirwa n’amadini afatanyije n’abacuruzi, abandi basigaye na bo harimo kurebwa uko babubona.”

Higiro Emmanuel asaba abanyakanombe gukomeza kwiteza imbere bijyana no kwirinda imyubakire y’utujagari. Ati ”Muri Busanza nk’igice kigifite ahantu hagutse ho guturwa hari abaturage bumva bakubaka inyubako z’utujagari, ndabasaba kugendana n’igishushanyo mbonera cy’Umujyi wa Kigali, ahandi hakiri imiturire itajyanye n’igihe inaha icyuho bamwe mu bantu bafite imyitwarire mibi nk’uburaya aho uko amajyambere aza, imiturire ivugururwa ni ko  bahava kuko ubu bagihari kubera ko bahabona inzu za make cyane.”

Asaba by’umwihariko abagore bacururiza mu Gashyushya gukomeza gucururiza mu isoko birinda icyabasubiza mu muhanda, ati ”Ndabasaba gukomereza mu makoperative yanyu, kuko hari bamwe bahitamo kuva  mu isoko bagasubira gukora ubucuruzi mu kajagari mu muhanda wo ku Giporoso.”

GATETE JEAN BOSCO

TANGA IGITEKEREZO

Leave a Reply

Be the First to Comment!

avatar