22°C , Partly cloudy | Kigali-Rwanda
Melchior Ndadaye yishwe kuwa 21 Ukwakira 1993 n'ibyegera bye, mu rupfu rutavugwaho rumwe

Burundi: Abarundi bakeneye ukuri ku rupfu rwa Ndadaye

Yanditswe na Kayira Etienne

Ku ya 06-12-2018 saa 13:29:13

Abanyepolitiki mu Burundi batanze ibitekerezo bitandukanye ku mpapuro ziheruka gusohorwa n’ubushinjacyaha zisabwa ko Pierre Buyoya akurikiranwaho urupfu rwa Melchior Ndadaye.

Sylvestre Ntibantunganya wayoboye u Burundi kuva 1993-1996 akavaho ahiritse na Buyoya, asanga gushakisha ukuri ku bwicanyi bwakorewe Ndadaye nta we bigomba gutera ubwoba.

Melchior Ndadaye yishwe kuwa 21 Ukwakira 1993 n’ibyegera bye, mu rupfu rutavugwaho rumwe

Ntibantunganya asanga ngo kwica Ndadaye ari yo ntandaro y’ibibazo by’ingutu u Burundi bumazemo igihe no kugeza uyu munsi.

Uyu munyapolitiki wabaye Perezida w’u Burundi nyuma y’urupfu rwa Ndadaye, ngo arahamagarira Abarundi gushyigikira ubutabera bw’igihugu ke kugira ngo bucire imanza abateguye ubwo bwicanyi n’ababushyize mu bikorwa hagamijwe guca umuco wo kudahana.

Ndadaye yatowe kuba Perezida w’u Burundi mu 1993 muri Kamena mu matora yari ahanganyemo na Buyoya, ariko nyuma y’amezi ane gusa aricwa.

Buyoya yasohoye yatanze itangazo rimenyesha ko ubutabera bwakoreshejwe ku nyungu za politiki y’ubutegetsi buriho, nk’uko bitangazwa na Iwacu.

Muri iryo tangazo yagize ati : « Ubutabera bwaburanishije abagize uruhare muri ubwo bwicanyi kuva mu 1998. Ubutegetsi buriho mu Burundi, bumaze hafi imyaka 13 nta cyo buvuga kuri iyi dosiye ya Ndadaye. Kuyizana muri iki gihe, hari ikindi kibyihishe inyuma harimo ko Guverinoma ya Bujumbura ishaka kwibagiza ibyo yananiwe gukemura by’imvururu zakurikiye amatora yo mu 2015 ».

Nyamara nk’uko bitangazwa n’umunyamakuru Egide Nikiza w’Ikinyamakuru Iwacu, mu ijambo rya Sylvestre Ntibantunganya yamenyesheje ko Umushinjacyaha Mukuru n’Abavoka baburaniraga imiryango y’abishwe, ngo batemeye imyanzuro y’Urukiko yo mu myaka ya 1998-1999, rwaburanishije abishe Ndadaye.

Ahubwo ngo bahise bajurira ubwo kuko batishimiye imikirize y’urubanza. Ati « Kuva icyo gihe, Urukiko rw’Ikirenga rwaricecekeya kugeza uyu munsi. Ubwo uru rubanza rwongeye kwibutswa, bibaye byiza nibahere aho ibya mbere byagejeje bakoze kugeza ukuri ku bwicanyi bwakorewe Melchior Ndadaye kugiye ahagaragara ».

Slyvestre Ntibantunganya yayoboye u Burundi kuva muri Mata 1994 kugeza Muri Nyakanga 1996 ubwo yahirikwaga na Pierre Buyoya wari waratakaje ubutegetsi mu 1993

Ku bw’iyi nyandiko Mpuzamahanga yo guta muri yombi Pierre Buyoya kubera dosiye y’urupfu rwa Ndadaye, Moussa Faki Mahamat, Perezida wa Komisiyo y’Umuryango w’Afurika Yunze Ubumwe (AU) yagiriye inama Leta y’u Burundi kwirinda kubyutsa ikibazo badafitiye ubushobozi bwo gukemura.

Mu kiganiro na RFI, Radio Mpuzamahanga y’Abafaransa, ku ya 2 Ukuboza Faki yagize ati « Abategetsi b’u Burundi bashatse bahagarika iriya nyandiko ishakisha Buyoya kuko batarebye neza byarushaho gusubiza inyuma intambwe iterwa mu kugarura amahoro hagati y’Abarundi ».

Ahubwo, yasabye Perezida Pierre Nkurunziza kuzitabira inama y’ibihugu byo mu karere iziga ku bibazo by’u Burundi mu mpera z’Ukuboza.

RFI ngo yashatse kuvugisha Prosper Ntahorwamiye, umuvugizi wa Leta y’u Burundi kuri kiriya kibazo ariko ngo ntiyagira icyo atangaza.

Nyamara Ambasaderi w’u Burundi muri Loni Albert Shingiro ku rukuta rwe rwa Twitter, ngo yandikiye Moussa Faki Mahamat amwiyama ko batagomba kujya bivanga muri politiki y’igihugu cyabo.

Soma inkuru yabanje: AU yasabye u Burundi kwitondera ibyo gushinja Buyoya ubwicanyi

TANGA IGITEKEREZO

Leave a Reply

Your email address will not be published. Required fields are marked *