21°C , Partly cloudy | Kigali-Rwanda
Ba Gen. Gilbert Diendéré (uwa mbere ibumoso) na Djibril Bassolé (uwa kabiri) baregwa gutegura kudeta yaburijwemo muri Burkina Faso muri Nzeri 2015

Burkina Faso: Abaregwa kudeta batangiye kubazwa

Yanditswe na Kayira Etienne

Ku ya 06-11-2018 saa 07:49:44

Muri Burkina Faso, ejo hashize ku wa Mbere Urukiko Rukuru rwa gisirikare rwatangiye guhata ibibazo abari ku isonga mu gukekwaho gutegura kudeta yaburijwemo yari igamije guhirika Guverinoma y’inzibacyuho ku wa 16 Nzeri 2016.

Kuva Urubanza rwatangira, abantu bagera kuri 80 bamaze kuburanishwa.

Ba Gen Gilbert Diendéré wari Umugaba w’Ingabo wihariye wa Blaise Compaoré na Djibril Bassolé, ni bo batangiye guhatwa ibibazo n’Urukiko rwa gisirikare , nk’uko bitangazwa na RFI, Radio Mpuzamahanga y’u Bufaransa.

Ba Gen. Gilbert Diendéré (uwa mbere ibumoso) na Djibril Bassolé (uwa kabiri) baregwa gutegura kudeta yaburijwemo muri Burkina Faso muri Nzeri 2015

Nubwo aba bari abayobozi bakuru mu gisirikare cya Burkina Faso mbere y’uko Compaoré yirukanwa ku butegetsi n’imyigaragambyo y’abaturage biroshye mu mihanda ari ibihumbi n’ibihumbi, bavuga ko bamurambiwe.

Abavugwa ko bagize uruhare muri iyo kudeta y’abari bagize Guverinoma y’inzibacyuho ngo ni Umutwe w’ingabo zarindaga Perezida zizwi ku izina rya RSP (Régiment de Sécurité Présidentielle).

RFI iti “Abasirikare bari mu mutwe wa RSP bo ntibashyidikanywaho kuko ari bo bagaragaye mu gikorwa cyo gufata no gufunga uwari Minisitiri w’Intebe n’abo benshi mu bo bakoranaga muri Guverinoma y’inzibacyuho, bakaza kubarekura babisabwe n’Abakuru b’ibihugu by’Umuryango wa CEDEAO, Akarere Burkina Faso iherereyemo. Jenerali Diendéré avugwamo cyane kubera ko, ari we wari umuyobozi mukuru wa RSP”.

Djibril Bassolé wahoze ari Minisitiri w’Ububanyi n’Amahanga wa Burkina Faso na we yatangiye kubazwa n’Urukiko, kimwe na Col Maj Boureima Kiéré wari Umugaba w’Ingabo wihariye wa Minisitiri w’Intebe wa Guverinoma y’inzibacyuho, ndetse na Komanda Abdoul Aziz Korogo, wari ushinzwe umutekano w’umuyobozi w’uwo mutwe w’ingabo zarindaga Umukuru w’Igihugu.

Undi muntu ukomeye waburanye ni Me Mamadou Traoré wigeze kuba Umuyobozi w’Urugaga rw’Abavoka muri Burkina Faso.

Mu kiganiro kihariye RFI yagiranye na Me Olivier Yelkouni, umwe mu bunganizi ba Gen Diendéré mu mategeko yagize ati «Uko bigaragara, ni bwo twavuga ko urubanza rw’abakekwaho gutegura guhirika ku ngufu Guverinoma y’inzibacyuho ya Burkina Faso muri Nzeri 2015 rutangiye. Impamvu ni uko Urukiko Rukuru rwa gisirikare rwa Burkina, rwumva ko aba babajijwe ku wa Mbere w’iki cyumweru ari bo bayobozi b’abandi basirikare bose bamaze hafi amezi atatu baburanishwa.”

Uwahereweho mu guhatwa ibibazo ngo ni Komanda Abdoul Aziz Korogo, kubera ko ari na we wahagarariye umutwe w’ingabo za RSP mu biganiro byaje gutuma abagize Guverinoma y’inzibacyuho barekurwa, mu rwego rwo guhagarika imirwano ikaze yari yatangiye bahanganye bikomeye n’izari ingabo za Leta.

RFI iti “Ikigaragara cyo ni uko Komanda Abdoul Aziz Korogo, ari we ufite amabanga yose kuko ari we wari urangaje imbere RSP mu biganiro by’umushyikirano n’ingabo za Leta y’inzibacyuho”. Me Guy Hervé Kam, na we yemera ko Komanda Korogo ari we uhishemo amabanga y’abagiye bavugwa n’abasirikare bato bamubanjirije mu Rukiko.

TANGA IGITEKEREZO

Leave a Reply

Your email address will not be published. Required fields are marked *