19°C , Clear | Kigali-Rwanda
Intumwa za Minisiteri y'Uburezi zirimo Uwimana Delphine na Musabwa Eumene, baganira n'abanyeshuri ba G.S Gaseke muri Burera (Foto Samuel M)

Burera: Abanyeshuri ba G.S Gaseke ntibarakora kuri mudasobwa

Yanditswe na MUTUNGIREHE SAMUEL

Ku ya 15-05-2018 saa 07:33:32

Mu gihe u Rwanda ruri kwimakaza ikoranabuhanga mu kwihuta mu iterambere, abanyeshuri bo ku Rwunge rw’amashuri rwa Gaseke, mu murenge wa Ruhunde, batangaza ko bamwe bagiye kurangiza amashuri yisumbuye, kimwe n’abo mu y’abanza, batarakora kuri mudasobwa, bayiga mu bitabo no ku kibaho mu ishuri.

Intumwa za Minisiteri y’Uburezi zirimo Uwimana Delphine na Musabwa Eumene, baganira n’abanyeshuri ba G.S Gaseke muri Burera (Foto Samuel M)

Bamwe mu banyeshuri baganiriye n’Imvaho Nshya, kuri uyu wa Mbere tariki ya 14 Gicurasi 2018, ubwo Intumwa za Minisitseri y’Uburezi zageraga muri iki kigo mu bukangurambaga bwo kuzamura ireme ry’uburezi, abanyeshuri bo kuri iki kigo biga mu mwaka wa gatanu n’uwa gatandatu Imibare, Icungamutungo n’Ubumenyi bw’Isi (MEG) bavuze ko mu byo biga baba bakeneye gukora ubushakashatsi na bo ubwabo bakamenya ibyisumbuye ku masomo bahawe.

Hakizimana Alias, yagize ati “Ibintu byose twiga biba bikenera ubushakashatsi, kandi ubushakashatsi nta handi twabukorera atari kuri mudasobwa, biba bisaba ko twivumburira ibintu byacu cyangwa tukanabihuza n’iby’abarimu batwigisha mu ishuri bityo tukajya dukorera hamwe; ni bwo buryo birimo kutubangamiraho cyane.

Uko tuyiga, bazana ibitabo tukabyiga, tukamenya ngo iki ni ‘Mouse’ (agakoresho ka mudasobwa gafite ishusho nk’iy’imbeba), hano ni ukwandikiramo urupapuro n’ibindi. Na mwarimu ntayo yari yatuzanira ngo atwereke, mu bitabo rwose biba birimo ariko nta mudasobwa zihari”.

Imaniradukunda Jeannette, ati “No kuba ngana gutya ntarakanda kuri mudasobwa, utazi gufunga no gufungura ni ikibazo. Bayizanye bakabitubaza nta byo twashobora; ariko babanje no kubitwigisha tuzikoraho twabifata”.

Abo mu mwaka wa gatatu bo bagaragaje ko kutabona mudasobwa mu gihe biga isomo ry’ikoranabuhanga bibaca intege, ku buryo bamwe bataryiga, bakigira mu bindi kuko barambiwe kwiga ibyo batabona.

Umuyobozi w’Urwunge rw’Amashuri rwa Gaseke, Safari Benois, yabwiye Imvaho Nshya ko ikibazo cyateye kuba nta mudasoba abanyeshuri barabona ngo bayige ari ikibazo cy’umuriro icyo kigo kitagiraga ariko ubu wamaze kuhagera, biteguye kujya kuzisaba ku karere, ku buryo mu kwezi kwa Nzeri zaba zahageze zaba iz’abana bo mu mashuri mato za “One Laptop per Child” n’iz’abo mu mashuri yisumbuye za “Smart Classrom”.

Ati “Ikijyanye n’ishuri rya mudasobwa nta bwo twari kubishyiramo imbaraga tutarabona umuriro w’amashanyarazi. Izi nsinga mubona zigera hano mu kigo, zahageze muri Werurwe uyu mwaka; mu byo twemereye izi ntumwa za Minisiteri y’Uburezi ni uko tugiye gutegura icyumba, tukagishyiramo ibyangombwa bikenewe kugira ngo akarere nako kadukorere ubuvugizi na twe tuge ku rutonde rw’abazahabwa mudasobwa”.

Ku kijyanye na laboratwari, Safari yavuze ko bazasaba akarere kubaha ibikoresho bya laboratwari biri ku kindi kigo baturanye kitabashije kubona ishami risaba laboratwari bakazibaha.

Umuyobozi ushinzwe uburezi mu karere ka Burera, Musabwa Eumene, yijeje umuyobozi w’ikigo ko mu cyumweru kimwe bazagezwaho mudasobwa z’abo mu mashuri abanza naho iz’abo mu yisumbuye bazakorerwa ubuvugizi bakazihabwa ubwo bamaze kubona umuriro w’amashanyarazi.

Mu bindi aba banyeshuri bo ku Rwunge rw’amashuri rwa Gaseke bavuze ko bibabangamira mu myigire yabo mu nzira y’uburezi bufite ireme, birimo kuba nta byumba (laboratwari) byo gushyira mu bikorwa ibyo biga mu masomo y’ubumenyi, “Laboratory” kandi biga amasomo arimo ubutabire, ibinyabuzima n’ubugenge bisaba ko mu kizamini cya Leta bagira ibizamini byabyo bikorerwa muri laboratwari.

Minisitiri w’Uburezi ubwo aheruka mu karere ka Nyabihu, mu cyumweru gishize, akagezwaho ikibazo cy’abarimu badafite za mudasobwa zabo, yatangaje ko hari mudasobwa zigera ku bihumbi 18 zitegereje abazisaba, igisigaye ari ukugaragaza aho zikenewe.

 

TANGA IGITEKEREZO

Leave a Reply

Be the First to Comment!

avatar