25°C , Partly sunny | Kigali-Rwanda

Burera: Abajyanama b’ubuzima bagiye kwiyubakira hoteri izatwara akabakaba miriyari

Yanditswe na Twagira Wilson

Ku ya 14-01-2020 saa 11:02:26
Akarere ka Burera (mu mutuku) ku ikarita y'u Rwanda

Mu gihe mu karere ka Burera mu mujyi wa Rusumo hakigaragara ikibazo cyo kutagira inzu zakira abantu benshi baza gusura akarere gasanzwe gafite amahirwe y’ubukerarugendo, Abajyanama b’ubuzima ku bufatanye n’umushinga Inshuti z’ubuzima PIH babifashijwemo n’Akarere ka Burera bagiye kuhubaka hoteri igezweho ya mbere  izuzura mu mpera za 2020 itwaye akabakaba miriyari y’amafaranga y’u Rwanda.

Umuyobozi wungirije w’Akarere ka Burera ushinzwe Imibereho myiza y’abaturage Manirafasha Jean de la Paix  yatangarije Imvaho Nshya ko iyo hoteri ari ikimenyetso k’ishoramari  ryagutse rigiye gukorwa n’abikorera baba mu karere ka Burera mu bijyanye no guteza imbere ubukerarugendo cyane ko Burera ari kamwe mu turere turimo amahirwe menshi yakurura ba mukerarugendo n’Abanyarwanda ubwabo batangiye kwitabira gusura batabihariye abanyamahanga.

Avuga ko ari hoteri izubakwa mu bice bibiri aho igice cya mbere  gitangira kubakwa mu kwezi gutaha kwa Gashyantare 2020.  Akomeza agira ati: Ni hoteri igizwe n’amacumbi agezweho aho igice cya mbere kigiye gutangira kubakwa mu gice cya mbere k’ingengo y’imari, mu gihe igice cya kabiri kizatangirana n’umwaka utaha. Igice cya mbere kizatwara miriyoni zisaga 450 z’amafaranga y’u Rwanda, muri rusange ikazuzura itwaye akabakaba miriyari imwe.”

Ni igitekerezo cyavuye mu bajyanama b’ubuzima bafatanyije n’umushinga Inshuti mu buzima mu rwego rwo kwishyira hamwe, bakazabifashwamo n’Akarere ka Burera kabereka ahari amahirwe babyaza amafaranga. Ni umushiga uje ari igisubizo ku bibazo byari mu karere birebana no guteza imbere urwego rw’ubukerarugendo, kuko hari byinshi basura  bijyanye n’amateka, nk’igishanga kinini  cy’Urugezi gikurura ba mukerarugendo, ibiyaga bya Ruhondo na Burera, amoko atandukanye y’inyoni nk’imisambi, urucenceberi n’izindi,  ibivumu byatewe n’abami biri mu murenge wa Butaro n’ahandi.

Umurenge wa Butaro kuri ubu urangwa n’ibikorwa binyuranye by’iterambere birimo Ibitaro bya Butaro bifite umwihariko wo kuvura kanseri Ishami rya Kaminuza y’Ubuvuzi ya Havard. Abajyanama b’ubuzima 1009 bibumbiye mu makoperative 18 ni bo bamaze gusesengura amahirwe y’ishoramari aboneka iwabo, biyemeje kubaka hoteri bemeza ko izagira uruhare mu iterambere ryabo, iry’akarere n’igihugu muri rusange.

Perezida w’Abajyanama b’ubuzima mu karere ka Burera, Maniriho  Iyanze Jean Damascene avuga ko iki ari igitekerezo cy’Abajyanama b’ubuzima ubwabo kandi ko iyi hoteri izakemura ikibazo cy’amacumbi cyagaragaraga  muri aka gace.

Bamwe mu baturage ba Butaro  bashima igitekerezo Abajyanama b’ubuzima bagize kuko basanga kiziye igihe, ndetse bavuga ko banejejwe n’iyo hoteri kuko izakura akarere  mu bwigunge.

Iyi hoteri izubakwa ku butaka bufite ubuso bwa Hegitari 1.5 bwaguzwe miriyoni 69 z’amafaranga y’u Rwanda. Biteganyijwe ko imirimo yo kuyubaka izatangira  mu kwezi kwa Gashyantare 2020 ikazaba yuzuye mu mpera z’uyu mwaka.

Umwanditsi:

Twagira Wilson

Tanga Igitekerezo

Email yanyu ntigaragazwa ku rubuga. Amazina na Email ni ngombwa.