21°C , Intermittent clouds | Kigali-Rwanda
Buravan ashyikiriza ishimwe Bugingo Fidele wari uhagarariye Imvaho Nshya

Buravan yeretse itangazamakuru igihembo yatsindiye

Yanditswe na NDAMYIROKOYE FRANÇOIS

Ku ya 19-07-2019 saa 08:39:00

Dushime Burabyo Yvan uzwi nka   Yvan  Buravan, umuhanzi umaze kugaragaza ubuhanga mu kuririmba indirimbo by’umwihariko ziganisha ku rukundo  yeretse itangazamakuru igihembo cya Prix Découvertes RFI 2018, yegukanye mu Gushyingo 2018, aranarishimira byihariye.

Mu ijambo rye Buravan yashimiye byimazeyo itangazamakuru ridahwema kumuba hafi umunsi ku wundi akabasha kuba ageze ku rwego ariho uyu munsi.

Yagize ati “Ni insinzi yacu twese ni na yo mpamvu nazanye iki gihembo   ngo mubashe kukibona abenshi bari bakibonye mu mashusho bakimpa. Ni inshuro ya mbere nkerekanye kuva ubwo bakimperaga mu Bufaransa”.

Yavuze ko amaze imyaka ine akora umuziki ariko akaba atari akazi koroshye kakorwa n’umuhanzi waba adafite itangazamakuru hafi ye ngo rimenyekanishe ibyo akora.

Yavuze  ko umuhanzi bitamworohera kumenyekanisha ibikorwa bye mu gihe itangazamakuru ritamuri hafi. Yashimangiye ko gukora muzika kandi bitakorohera umuntu mu gihe akora wenyine adafite abamufasha kumenyekanisha ibyo akora.

Uyu muhanzi yashishikarije urubyiruko ruhora ruvuga ko akazi kabuze kujya mu bijyanye n’ubuhanzi n’ubugeni kuko na we abijyamo yumvaga azaba umuhanzi uzajya aririmba abantu bakamumenya ariko atazi niba byavamo ubuzima.

Ku ya 8 Ugushyingo 2018, ni bwo Buravan yegukanye igihembo cya Prix découvertes RFI 2018. Yari mu bari bahataniye  igihembo gitangwa na Radiyo mpuzamahanga y’Abafaransa, RFI, gihabwa abahanzi b’abahanga mu muziki baturuka mu bihugu bitandukanye muri Afurika no hanze yayo.

Nyuma yo gutsindira icyo gihembo yahawe igihembo kirimo amafaranga asaga miriyoni 10 z’amafaranga y’u Rwanda aherekejwe n’ibindi bihembo birimo gukorera ibitaramo hirya no hino muri Afurika ndetse n’i Paris mu Bufaransa aho  yashyikirijwe igihembo.

Abahanzi yari ahatanye nabo ni  Umunya-Guinée witwa Azaya, Barakina wo muri Niger, Iyenga wo muri Repebulika iharanira Demokarasi ya Congo, OMG wo muri Sénégal, Umunya-Cameroun witwa Gasha, Ozane wo muri Togo, Biz Ice wo muri Congo Brazaville, Maabo ukomoka muri Sénégal na Geraldo wo muri Haïti.

Igikorwa cyo kwereka itangazamakuru igihembo yatsindiye cyabaye ku ya 17 Nyakanga 2019 i Kigali akaba kandi ibitangazamakuru yaragiye abiha ikemezo k’ishimwe”Certificate of appreciation”.          Mu bitangazamakuru yahaye iryo shimwe harimo n’Imvaho Nshya.

Buravan ashyikiriza ishimwe Bugingo Fidele wari uhagarariye Imvaho Nshya

Igihembo Buravan yahawe

TANGA IGITEKEREZO

Leave a Reply

Your email address will not be published. Required fields are marked *