21°C , Partly cloudy | Kigali-Rwanda

Bumbogo TVET School ikomeje gukura urubyiruko mu bushomeri

Yanditswe na Gisubizo Gentil

Ku ya Feb 19, 2019 saa 10:34

Bumbogo TVET School, ishuri ryigisha amasomo ashingiye ku bumenyingiro, ryiyemeje gutanga ubumenyi ku rubyiruko mu rwego rwo kurwanya ubushomeri.

Uwizeyimana Louise, Umuyobozi wa Bumbogo TVET School, yavuze ko abasoje amasomo yabo muri iki kigo bahabwa imirimo muri hoteli zitandukanye, abandi bakihangira imirimo ibafasha mu mibereho yabo ya buri munsi.

Iri shuri rimaze gutsindisha abakabakaba 200 bakaba barimo ababonye imirimo mu gihe abandi ryabafashije kuyihangira.

Uwizeyimana yagize ati “Iri shuri riragabanya ubushomeri mu rubyiruko kuko ruzabasha kugira no kongera ubumenyi mu bijyanye n’amasomo rwigira hano bukazarugirira akamaro mu buzima buri imbere.”

Iri shuri riherereye mu Murenge wa Bumbogo, mu Karere ka Gasabo ryatangiye mu mwaka wa 2015, rikaba ryigisha iby’amahoteli mu mashami y’ubugeni mu butetsi (Culinary Art) no kongerera ibiribwa agaciro (Food Processing).

Ritanga uburezi bw’ibanze bw’umwaka umwe n’ubw’imyaka itatu, abaharangije bakaba bashobora guhangana ku isoko ry’umurimo no kwihangira imirimo.

Ku bufatanye n’abarimu b’umwuga, abanyeshuri basoza amashuri bafite ubumenyi bwo gutegura indyo zinyuranye, kongerera agaciro imbuto nk’inanasi zikorwamo umushongi (confitures), gutegura amandazi, imigati na gateux z’ubwoko butandukaye n’ibindi.

Bumbogo TVET School yashinzwe na Leta mu rwego rwo kongerera urubyiruko ubushobozi n’amahirwe yo kwihangira imirimo.

Mu ntego iri shuri rifite harimo gutanga uburezi bufite ireme rikaba intangarugero mu mashuri y’imyuga. Ubuyobozi bwaryo bwifuza ko umuhanda werekeza aho riherereye wakorwa kugira ngo byorohere abaturuka mu Mujyi wa Kigali rwagati kuhayoboka, hakubakwa n’amacumbi kugira ngo n’abaturuka mu zindi ntara babashe kuhiga biboroheye.

Ubuyobozi bw’iri shuri burashimira Leta y’u Rwanda ikomeje guteza imbere amashuri y’imyuga n’ubumenyingiro kuko akomeje kubaka ikizere mu rubyiruko rugakura amaboko mu mifuka rwiteza imbere rukanateza imbere Igihugu muri rusange.

Imbere mu mashuri hagizwe n’intebe n’ibindi bikoresho bijyanye n’igihe

Hari imishini zitandukanye zitunganya ibiribwa mu kubyongerera agaciro

Bumbogo TVET School ni ishuri rifite ibyumba bigezweho

Umushongi wifashishwa mu kurya imigati na wo ukorerwa i Bumbogo

Uwizeyimana Louise Umuyobozi wa Bumbogo TVET School