21°C , Intermittent clouds | Kigali-Rwanda
Mu Karere ka Bugesera kugeza muri Kanama 2019 ubwitabire bwa Mituweri ya 2019-2020 bugeze kuri 57.3% (Foto Manishimwe N)

Bugesera: Ubwitabire bwa Mituweri ya 2019-2020 bugeze kuri 57.3%

Yanditswe na Manishimwe Noël

Ku ya 15-08-2019 saa 16:18:49

Ubuyobozi bw’akarere ka Bugesera bugaragaza ko ubwitabire bw’abaturage mu gutanga ubwisungane mu kwivuza (Mituweri) bwa 2019-2020 bugeze ku gipimo cya 57.3%, imbaraga zikaba zikomeje gushyirwa mu bukangurambaga.

Umukozi w’Akarere ka Bugesera ushinzwe Mituweri Mukamisha Espérance, avuga ko kuva uyu mwaka wa Mituweri wa 2019-2020 watangira, mu kwezi gushize kwa Nyakanga kugeza hagati muri uku kwa Kanama, ubwitabire bw’abatuye ako karere muri Mituweri butari ku bipimo bishimishije ariko imbaraga zikaba zishyirwa mu bukangurambaga.

Ati: “Abaturage bamaze gusobanukirwa gutanga Mituweri n’akamaro kayo, ubu tugeze ku bwitabire bwa 57.3% muri Mituweri. Ubukangurambaga na bwo burakomeje hirya no hino mu mirenge. Abaturage tubona bashishikajwe no kwishyura ubwisungane mu kwivuza, ahari Irembo, muri SACCO aho bakoresha Mobicash hose bari kubyitabira cyane, kuri terefoni za bo, cyane cyane ko ubu ngubu umuturage urangiza kwishyura Mituweri yemerewe guhita ajya kwivuza.”

Mukamisha avuga ko abaturage badafite ubushobozi bwo guhita babonera icyarimwe umusanzu w’ubwisungane mu kwivuza basabwa, bagirwa inama yo kwibumbira mu matsinda yo kwizigama n’ibimina bya Mituweri.

Kugeza muri cyumweru cya kabiri cy’ukwezi kwa Kanama 2019, mu Mirenge 15 y’Akarere ka Bugesera, Umurenge wa Ruhuha ni wo wari ku isonga mu kugira ubwitabire bwinshi muri Mituweri ya 2019-2020 bamaze kuyitanga ku gipimo cya 68.3%, Umurenge wa Mayange kuri 68.1%, umurenge uza ku mwanya wa 15 ukaba uwa Rweru ufite 47.5%.

Mukamisha, Umukozi w’Akarere ka Bugesera ushinzwe Mituweri avuga ko kuba Rweru iri inyuma muri Mituweri bihuzwa no kuba ari umwe mu mirenge yavuyemo izuba ryumishije imyaka abaturage bahinze mu gihembwe k’ihinga cya 2019B, ntibeze neza.

Gusa, avuga ko hari uburyo abatishoboye bo muri uwo murenge batangiye kunganirwa, burimo no kuba Polisi y’Igihugu iherutse kwishyuriramo abantu 1000 Mituweri muri gahunda z’ukwezi kwahariwe ibikorwa bya yo.

Mukamisha ni byo agarukaho agira ati: “Rweru, kuba iri inyuma ntabwo ari ikibazo gikomeye, uyu murenge ufite utugari twinshi twagiye duhura n’izuba bigatuma abaturage bateza kandi ari ho bari bizeye ubwishyu bwa Mituweri.

Muri ibyo byose rero turagerageza, tugashaka abafatanyabikorwa bakabafasha, n’ubu Polisi y’Igihugu yishyuriye Mituweri abaturage 1000 bo muri uyu Murenge wa Rweru tukaba twashimiye Polisi ku gikorwa kiza yafashije Abanyarwanda muri rusange by’umwihariko abo mu Murenge wa Rweru.”

Hari abaturage bo mu Karere ka Bugesera bavuga ko uretse ubukene, nta yindi mpamvu yakabaye ituma abantu badatangira umusanzu wa Mituweri basabwa ku gihe.

Muri bo harimo Nzeyimana Denis wo mu Murenge wa Mayange, ugira ati: “Ubu tuzi akamaro k’ubwisungane mu kwivuza kuko ushobora kuba warwara ukishyura amafaranga ibihumbi 50, mu gihe ufite ubwisungane mu kwivuza yishyura amafaranga ibihumbi bitanu gusa harimo ikinyuranyo gikomeye. N’utarishyuye byaba wenda ari ukubura ubushobozi, ariko ubundi umuntu ufite Mituweri aba atekanye.”

Tuyishime Alexis, Ushinzwe Ubwisungane mu kwivuza bwa Mituweri mu ishami ry’Ikigo cy’ubwiteganyirize- RSSB mu Karere ka Bugesera, na we avuga ko imbaraga zikomeza gushyirwa mu bukangurambaga, ikifuzo kikaba ko ukwezi kwa Kanama kwarangira ubwitabire bugeze ahashimishije.

Ati: “Ubukangurambaga kuri Mituweri ni igikorwa gikomeje, kugeza icyumweru kizakurikiraho, twifuza ko ukwezi kwa Kanama kwarangira abaturage bose bakoresha ubwisungane mu kwivuza mu Karere ka Bugesera bamaze kujya mu bwisungane mu kwivuza, ku buryo nta we uzagira ikibazo cyo kurembera mu rugo cyangwa se uwarwara akaba yabura uko yivuza.”

Mu bukangurambaga kuri Mituweri buri gukorwa abaturage bibutswa inzira n’uburyo bwo kwishyura Mituweri, no kumenya amakuru ya bo mu byiciro by’Ubudehe.

RSSB yibutsa abaturage bakoresha ubwishingizi bwa Mituweri ko nyuma y’Ukwezi kwa Nzeri 2019, umuntu uzaba atari yishyura Mituweri azajya ayishyura ariko kugira ngo ayivurizeho ategereze iminsi 30.

Mu Karere ka Bugesera kugeza muri Kanama 2019 ubwitabire bwa Mituweri ya 2019-2020 bugeze kuri 57.3% (Foto Manishimwe N)

TANGA IGITEKEREZO

Leave a Reply

Your email address will not be published. Required fields are marked *