23°C , Intermittent clouds | Kigali-Rwanda

Bugesera: MINEDUC yahembye abana 196 basoje amashuri y’inshuke

Yanditswe na Twagira Wilson

Ku ya 08-11-2019 saa 07:45:58
Bamwe mu bana basoje ikiciro cy'amashuri y'inshuke (Foto Twagira W)

Mu rwego rwo guteza imbere uburezi bw’abana bato uhereye mu kiciro cy’amashuri y’inshuke, abanza, ayisumbuye kugeza no muri kaminuza, Minisiteri y’Uburezi MINEDUC, ku nkunga y’umuryango utegamiye kuri Leta “Plan International Rwanda”, bashyikirije ibikoresho by’ishuri abana 196 barimo abahungu n’abakobwa bo mu murenge wa Kamabuye mu karere ka Bugesera basoje ikiciro cy’amashuri y’inshuke bajya mu mashuri abanza.

Abo bana bashima uwo muryango nterankunga wabafashije kububakira ibikorwa remezo nk’amarerero yabafashije kwiga bakiri mu kiciro cy’amashuri y’inshuke kugeza bagisoje.

Umuyobozi muri Minisiteri y’Uburezi ushinzwe igenamigambi Rose Baguma, yafatanyije n’abayobozi ba Plan International guhemba abo bana ibikoresho by’ibanze by’ishuri. Yashimye umuryango ‘Plan International’ watumye abo bana bagana ishuri, dore ko ngo yabubakiye amarerero agezweho hamwe  n’ibyumba by’amashuri  yo kwigiramo  guhera mu mwaka wa 2017,  nyuma yo gusanga bari bafite ikibazo cyo kwigira munsi y’ibiti bigatuma biga ku buryo bugoranye  ndetse bikaba intandaro ya bamwe mu bana gucikisha amashuri  imburagihe.

Baguma wari uhagarariye MINEDUC  yagize ati “Mu bufatanye bushingiye ku masezerano Minisiteri y’Uburezi isanzwe ifitanye n’umuryango Plan international, turashima uwo muryango wakomeje gufatanya n’inzego z’ibanze gukangurira ababyeyi kuzana abana babo mu bigo mbonezamikurire n’amarerero, kuko bituma abana barushaho kugana no gukunda ishuri bakiri bato. Iyo abana barerewe mu marerero hamwe n’abandi bagenzi babo bitabwaho by’umwihariko ndetse bikabarinda na bimwe mu bibazo bishingiye ku ihohoterwa rishingiye ku gitsina.”

Yongeyeho ko ababyeyi bashishikarizwa kujyana abana mu bigo mbonezamikurire aho barererwa kuko ubushakashatsi bwagaragaje ko iyo umwana atize neza akiri muto bimugiraho ingaruka ageze mu mashuri abanza n’ayisumbuye mu buryo bumwe.

Umuyobozi w’ishami ry’uburezi mu rwego rw’Akarere ka Bugesera, Gashumba Jacques, avuga ko mu myaka isaga itanu ishize uwo muryango umaze ukorera mu karere ka Bugesera wakomeje kuba umufatanyabikorwa mu bijyanye no guteza imbere uburezi ndetse n’imirire myiza iganisha ku kurwanya ikibazo cyo kugwingira mu bana bakiri bato binyuze mu guhugura abarezi ndetse n’ababyeyi.

Ikindi kandi yagarutseho, ni uko ibyumba by’amashuri bitanu bubatse mu murenge wa Kamubuye na Ngeruka hafi y’umupaka w’u Burundi ku buryo abana bajyaga kwiga muri cyo gihugu cy’abaturanyi batakijyayo ubu bakaba bigira muri ayo mashuri kandi batekanye.

Umuyobozi w’umuryango Plan Rwanda mu rwego rw’igihugu Mutero William, avuga ko umuryango ahagarariye uzakomeza kuba umufatanyabikorwa mu burezi binyuze mu gushora imari mu guteza imbere uburezi bw’abana bakiri bato, kuko bituma bagira ejo heza.

Ati “Amahitamo twafashe yo gushyigikira abana  b’Abanyarwanda kugana ishuri no kurikunda tuzayakomeza kuko ari bimwe mu bituma akura neza mu bwonko no mu gihagararo ku buryo nyuma y’igihe ari we uzavamo umuturage mwiza ukunda igihugu ke.”

Mukarere ka Bugesera umuryango “Plan International” umaze kuhubaka amarerero 15, Nyaruguru uhubaka 10, muri Gatsibo bahubatse agera kuri 21.

Umwanditsi:

Twagira Wilson

Tanga Igitekerezo

Email yanyu ntigaragazwa ku rubuga. Amazina na Email ni ngombwa.