26°C , Partly sunny | Kigali-Rwanda
Mutabazi Richard, Umuyobozi w'Akarere ka Bugesera

Bugesera: Ingengo y’imari ya miliyari 18 izibanda ku bikorwa by’iterambere

Yanditswe na MUGISHA BENIGNE

Ku ya 09-07-2018 saa 08:49:17

Ingengo y’imari y’umwaka  wa 2018-2019 y’Akarere ka Bugesera yatowe n’abajyanama  ni miliyari 18 z’amafaranga y’u Rwanda ikazakoreshwa mu mishinga 82 yatoranyijwe.

Mutabazi Richard, Umuyobozi w’Akarere ka Bugesera

Nk’uko bitangazwa n’umuyobozi w’Akarere ka Bugesera Mutabazi Richard, ngo iyi ngengo y’imari izibanda ku bikorwa by’iterambere birimo kubaka imihanda no gusana inyubako zimwe za Leta nk’ibiro by’imirenge n’utugari.

Bimwe mu bikorwa bizibandwaho muri iyi ngengo y’imari ni ugutera amashyamba mu mirenge inyuranye y’aka karere, gusana imihanda no guhanga imishya, kubaka isoko rigezweho mu Murenge wa Mayange, kongerera agaciro umusaruro w’ubuhinzi n’ubworozi cyane cyane ku gihingwa k’ibigori, umuceri n’imyumbati.

Ibindi bikorwa ni ugufatanya n’abikorera kugeza ifumbire ku bahinzi kandi ku gihe, guteza imbere abahinzi no kubongerera ubumenyi, kuhira ku buso bwa hegitari 165 mu nkuka z’umugezi wa Cyohoha, gutera amashyamba ku kirwa cya Mazane no gusazura andi mu yindi mirenge no kubaka inzu y’uburyamo ku ishuri ryisumbuye rya Kamabuye.

Mu bikorwa bindi biteganyijwe harimo kubakira abarokotse Jenoside batishoboye, kubaremera borozwa inka, kubaka ikibuga cy’umupira cy’Akarere, gushyira ku muhanda Kicukiro Nemba amatara abonesha.

Meya Mutabazi ariko avuga ko hari n’imbogamizi bahura nazo zijyanye n’ubukungu zigatuma  iterambere ry’abaturage  b’aka karere ritihuta,  nko kuba badafite imihanda ya kaburimbo ihagije, kutagira amashanyarazi nk’uko bikwiye n’ikibazo k’imihindagurikire y’ibihe.

Mu bijyanye n’imibereho myiza, Mutabazi avuga ko hari imbogamizi zo kutagira amazi meza muri aka karere, kutagira abaganga bahagije ngo bite ku buzima bw’abaturage, kugira ibitaro bimwe byivurizwaho n’abaturage bose, n’umubare munini w’abaturage batishoboye, dore ko bagera ku ijanisha rya 13.4%.

Mu miyoborere myiza, hari imbogamizi z’ikoranabuhanga rya interineti ridahagije, kudashyira mu bikorwa imyanzuro y’Inkiko Gacaca n’ahakorera ubuyobozi bw’imirenge n’utugari hadahagije.

Umuyobozi w’Akarere ka Bugesera Mutabazi avuga ko ingengo y’imari y’umwaka ushize wa 2017-2018  yakoreshejwe ku kigereranyo cya 92%.

 

 

TANGA IGITEKEREZO

Leave a Reply

Be the First to Comment!

avatar