17°C , Thunderstorms | Kigali-Rwanda

Bugesera: Basabwe kwiteza imbere kuko urugamba rw’amasasu rwarangiye

Yanditswe na Kayitare Jean Paul

Ku ya 05-07-2019 saa 07:46:28

Umunyamabanga Nshingwabikorwa w’Intara y’Iburasirazuba Kizito Habimana, yasabye abaturage b’Akarere ka Bugesera kurushaho gukora bakiteza imbere, kuko ngo urugamba igihugu kirwana ari urw’iterambere nyuma y’uko urugamba rw’amasasu rwarangiye.

Ibi yabibasabiye mu karere ka Bugesera kuwa 04 Nyakanga 2019 mu Mudugudu wa Akaniga Akagari ka Biharagu mu Murenge wa Kamabuye, ubwo u Rwanda rwizihizaga umunsi wo kwibohora ku nshuro ya 25, umunsi wahujwe no kwizihiza ubwigenge bw’u Rwanda. Kizito yasabye abaturage kumenya icyo kwibohora bivuze.

Yagize ati: “Abaturage bagomba kumenya amateka yo kwibohora ndetse n’icyo bivuze, intambwe yo kwibohora byatugejeje kuki, icya mbere twatashye ishuri, abaturage ba hano ntibagiraga amashuri, ntibagiraga ibikorwa remezo, amavuriro n’imihanda ariko uyu munsi twibohora ku nshuro ya 25 abaturage barahamya ko bivuza, abana bariga kandi bakiga n’imyuga, hari ibimina, amakoperative, hari ubuhinzi bwa kijyambere. Icyo nababwira ingabo zari iza FPR-Inkotanyi zabohoye iki gihugu, zigahagarika Jenoside zashakaga ko Abanyarwanda bose batekana, ivangura rikavaho bakaba umwe bagakora ibikorwa bibateza imbere”.

Abatuye Umurenge wa Kamabuye bavuga ko umunsi nk’uyu utuma batekereza ubuzima bubi banyuzemo igihugu kitaribohora, bityo bikabaha isomo ryo gusigasira ibyagezweho.

Habineza Samuel yagize ati: “Uyu munsi ni umunsi wo gusubiza amaso inyuma tugatekereza ubuzima twabayemo nko mu gihugu duturanye nahungiyemo tukakibamo ducunaguzwa, ntitwige kubera ko bataduhaga amahirwe ariko uyu munsi nageze mu gihugu cyacu ndiga kandi mfite akazi. Uyu munsi utwigisha ko dukwiye gutekereza aho twavuye tugasigasira ibyo tumaze kugeraho kugira ngo igihugu kitazongera gucura umwijima”.

Komushana Joy we yagize ati “Navukiye Tanzaniya kuko ababyeyi bange ari ho bahungiye ariko mu by’ukuri twumvaga u Rwanda tukumva bavuga ko ari rwiza tugashaka kurubona none icyo nishimira ni uko twaje gutahuka tukagera mu Rwanda tugasanga igihugu cyacu ari kiza”.

Ibivugwa n’aba baturage binashimangirwa n’umuyobozi w’Akarere ka Bugesera, Mutabazi Richard, aho avuga ko byari bigoye kugira ngo hagire uwifuza gutura mu karere ka Bugesera bitewe n’ingaruka za Jenoside yakorewe Abatutsi yagize ku karere ka Bugesera.

Ati “Gahunda yo kwibohora ku nshuro ya 25 ni gahunda ifite igisobanuro gikomeye ku baturage b’akarere ka Bugesera. Uyu munsi dufite akarere abantu bose bishimira guturamo, gushyiramo imishinga ikomeye, iyo mpinduka ubwayo mu myumvire no mu miterere ikaba ari igice cyo kwibohora gikomeye cyane”.

Ubuyobozi bw’Intara y’Iburasirazuba n’ubw’akarere bwasabye abaturage kwiteza imbere

Mu kwizihiza umunsi wo kwibohora, mu murenge wa Kamabuye hatashywe ibyumba by’amashuri 7 n’ubwiherero 12, ku ishuri ribanza rya Munzenze riherereye mu kagali ka Biharagu.

Umunyamabanga Nshingwabikorwa w’Intara y’Iburasirazuba, Kizito Habimana na Meya w’Akarere ka Bugesera Mutabazi Richard n’abandi bayobozi bataha ishuri muri Kamabuye

Umwanditsi:

Kayitare Jean Paul

Tanga Igitekerezo

Email yanyu ntigaragazwa ku rubuga. Amazina na Email ni ngombwa.