Bugesera: Barashima abagize Inama Njyanama babakoreye ubuvugizi

Yanditswe na KAYITARE JEAN PAUL

Ku ya 29-11-2020 saa 06:58:56
Abajyanama muri Njyanama y'Akarere bifatanije n'abaturage gutera ibiti (Foto Kayitare J.Paul)

Abaturage b’Akarere ka Bugesera mu Ntara y’Iburasirazuba, barashima ko Inama Njyanama bitoreye izasoza manda yayo muri uyu mwaka wa 2020, yabakoreye ubuvugizi bakabona amazi, ahandi bakabona amashanyarazi.

Ibi babigarutseho ku wa Gatandatu tariki ya 28 Ugushyingo 2020 mu muganda usoza ukwezi, aho abaturage bifatanyije n’abagize Inama Njyanama y’Akarere gutera ibiti ibihumbi bitatu mu Murenge wa Gashora.

Nyaminani Augustin utuye mu Kagari ka Mwendo, mu Murenge wa Gashora mu Karere ka Bugesera, yabwiye Imvaho Nshya ko abahagarariye imirenge mu Nama Njyanama y’Akarere bafata igihe bakamanuka bakabaganiriza ku mihigo ndetse bagakorera ubuvugizi abatishoboye bityo bakubakirwa.

Ati: “Icyo dushimira abagize Inama Njyanama baduhagarariye ku karere, ni uko baza bakatugezaho ibigezweho harimo n’imihigo y’Akarere. Ikindi badufasha, badukorera ubuvugizi umuturage utishoboye udafite aho kuba, hagakorwa imiganda tukamwubakira ariko Akarere kagatanga isakaro, ni byinshi tubashimira”.

Ndekazi Enosi na we utuye mu Karere ka Bugesera, avuga ko hari ubukangurambaga bwakozwe n’Abajyanama muri Njyanama y’Akarere, butuma bashobora gutera imbere ndetse babashishikariza ibyiza byo gutanga Mituweri no kurwanya imirire mibi y’abana.

Abaturage bishimiye gukorana umuganda n’Abajyanama muri Njyanama y’Akarere kandi bagashima ubuvugizi bakorewe ubu bakaba bafite amazi (Foto Kayitare J.Paul)

Yagize ati: “Abajyanama badukanguriye ibikorwa biduteza imbere no kwishyura Mituweri kandi ku gihe. Nk’ubu badutereye ibiti, ibi biriyongera ku byo basanzwe badukorera nko kudukangurira kurwanya imirire mibi”.

Akomeza avuga ko abana babo banywa igikoma kandi ko ba nyina bagirwa inama uko bakwita ku bana n’uko bakwitwara mu gihe batwite.

Ayinkamiye Asiteri, umukecuru ugeze mu zabukuru, avuga ko imiyoborere y’ubu itandukanye n’iya mbere ya Jenoside yakorewe Abatutsi. Abishingira ku kuba buri muyobozi ku kagari ku murenge no ku karere baba bafite abamugira inama ndetse bakabagezaho n’ibyifuzo by’abaturage kandi bigakemuka.

Ati: “Imyaka maze yose nubwo ntayizi ariko ntaho nabonye imiyoborere nk’iy’iki gihe. Ubu umuyobozi abe uwo ku mudugudu, ku kagari, ku murenge no ku karere usanga bafite abajyanama. Iyo ufite ukugira inama imibereho y’abaturage irahinduka kuko no ku gihe cy’abami bari bafite ababagira inama, Igihugu kigatunga kigatunganirwa. Imiyoborere y’ubu itandukanye n’iya kera”.

Ndashimye Phocas utuye mu Murenge wa Mayange ariko akaba afite ibikorwa by’ubuhinzi mu Murenge wa Gashora, avuga ko bafite amazi ariko agasaba ubuvugizi ku bijyanye n’umuriro w’amashanyarazi. Yizeye ko Njyanama nibakorera ubuvugizi na wo uzabageraho bidatinze.

Yagize ati: “Turasaba gukorerwa ubuvugizi kuko nta muriro dufite. Muri Gashora hano, abantu bawufite ni bake. Abajyanama bazatorwa mu yindi manda bazadukorere ubuvugizi tubone amashanyarazi nk’uko twahawe amazi meza”.

Mutabazi Richard, Meya w’Akarere ka Bugesera atera igiti (Foto Kayitare J.Paul)

Mu kiganiro n’Imvaho Nshya Ndahiro, Perezida w’Inama Njyanama y’Akarere ka Bugesera, yagize ati: “Twishimira ko abaturage twabakoreye ubuvugizi tukaba dusize bahawe amazi meza. Ubu hari meterokibe 5000 aturuka Kanyenyomba, Leta yaduhaye uruganda ruzatanga meterokibe 10,000 twizera ko ikibazo cy’amazi dusize hari aho kigeze gikemuka”.

Avuga kandi ko muri iyi manda bimuye abaturage bari batuye mu manegeka, ku kirwa cya Mazane na Sharita bityo ngo bagatuzwa mu nzu nziza ziri mu Mudugudu w’Ikitegererezo wa Rweru. Yongeraho kandi ko muri iyi manda ari bwo batashye ibiro by’Akarere, ibyo na byo bakaba babyishimira.

Ndahiro,  avuga ko basize abaturage bahawe amashanyarazi, aho bavuye kuri 18 bakagera ku ngufu z’amashanyarazi asaga 60%.

Umukecuru Ayinkamiye Asiteriya ashima uruhare rw’Abajyanama muri Njyanama y’Akarere rwatumye abaturage batera imbere (Foto Kayitare J.Paul)

Umwanditsi:

KAYITARE JEAN PAUL

One Comment on “Bugesera: Barashima abagize Inama Njyanama babakoreye ubuvugizi”

  1. Njyanama ya Bugesera bakoze akazi neza kandi bigaragazwa n’iterambere akarere ka Bugesera kagezeho. Ahasigaye gushyirwa ingufu ni mu bikorwa remezo cyane cyane imihanda yunganira imihanda minini.

Leave a Reply to Jean de Dieu Cancel reply

Email yanyu ntigaragazwa ku rubuga. Amazina na Email ni ngombwa.