21°C , Partly sunny | Kigali-Rwanda
Umusaruro w'ibitungu nta soko ufite mu Karere ka Bugesera

Bugesera: Abahinzi b’ibitunguru barasaba gushakirwa isoko

Yanditswe na KAYITARE JEAN PAUL

Ku ya 10-10-2018 saa 15:18:50

Abahinzi b’ibitunguru bo mu Karere ka Bugesera mu Ntara y’Iburasirazuba, baratangaza ko ibitunguru byabahombeye ugereranyije no mu myaka ishize.

Bavuga ko igiciro k’ikiro k’ibitunguru kirimo kugurwa hagati y’amafaranga 120 na 160, mu gihe umwaka ushize cyagurwaga amafaranga 250.

Abo bahinzi barasaba inzego zishinzwe iterambere ry’ubuhinzi kubafasha kubona isoko ribafasha kubona inyungu kugira ngo bibarinde igihombo.

Mushambokazi Evelyne avuga ko imbaraga ashyira mu buhinzi bw’ibitunguru n’ibyo akuramo ntaho bihuriye kubera ko yeza umusaruro mwinshi ariko akabura isoko.

Ati “Umuntu akora umushinga wo guhinga ibitunguru agategura ifumbire, imbuto ndetse akanategura n’umurima kandi ibyo byose aba yabishoyemo amafaranga. Muri uko kubishoramo amafaranga rero ugasanga arahombye.

Nk’ubung’ubu urebye igishoro washoye mu buhinzi ukareba n’agaciro k’ibitunguru si byiza kuko ikiro k’ibitunguru kiragura amafaranga ari hagati ya 120 na 150 noneho wabara ingufu wakoresheje mu kuvomerera, ugasanga harimo igihombo kinini, mbese ni ugukorera mu gihombo.”

Rusagara Samuel avuga ko bashakiwe isoko barushaho kunoza ubuhinzi bw’ibitunguru. Yagize ati “Akarere icyo kadufasha ni ukudushakira isoko tugakora ibintu tuvuga ko bifite isoko.”

Umukozi w’Akarere ka Bugesera ushinzwe ibihingwa ngengabukungu, Maniraguha Dieudonné, avuga ko kubura amasoko ashyira mu nyungu abahinzi byatewe n’umusaruro wabaye mwinshi.

Yongeraho ko abahinzi bahinze ibitunguru ari benshi kubera ko umwaka ushize bari babibonyemo amafaranga menshi.

Mu gutanga umuti urambye kuri iki kibazo, Maniraguha avuga ko bagiye kwigisha abahinzi uburyo bwo guhunika ibitunguru mu nzu bityo bikaba byagurwa ku giciro kinini.

Asobanura kandi ko barimo gukorana n’Ikigo gishinzwe guteza imbere ibihingwa byoherezwa mu mahanga NAEB, mu gushakira abahinzi b’ibitunguru amasoko.

Ati “Twavuganye na NAEB batwemerera gushaka amasoko n’ubu babirimo. Zimwe mu ngamba zihari ni ugukorana na NAEB tukabona abaguzi. Ikindi ni uko twafashe bamwe mu baturage bafite inzu babishyiramo, kugira ngo bye kuba byinshi ku isoko, abandi tubashishikariza kuba babishyira mu mahunikiro kubera ko hari amahunikiro dufite aba atarimo imyaka nko kubyanurira mu nzu y’ubwanikiro bw’ibigori bigatuma biba bike ku isoko, hanyuma byaba bike igiciro cyabyo kikazamuka, umuhinzi akunguka.”

Toni 1000 z’ibitunguru ni zo zisigaye zitarabona amasoko mu karere ka Bugesera.

Mu gihembwe k’ihinga gishize abahinzi b’ibitunguru bari bahinze kuri hegitari 720 heraho toni zisaga ibihumbi 13.

Uyu musaruro wose bawuguriwe ku giciro gito kuko ikiro kimwe kitarengeje amafaranga 160,bikaba bitandukanye n’umwaka ushize kuko bari baguriwe ikiro ku mafaranga 250.

TANGA IGITEKEREZO

Leave a Reply

Your email address will not be published. Required fields are marked *