29°C , Partly sunny | Kigali-Rwanda

Bugesera: Abahinzi barashimira Hinga Weze yabafashije guhangana n’imihindagurikire y’ikirere

Yanditswe na BUGINGO FIDELE

Ku ya 14-09-2020 saa 15:47:26
Abahinzi buhira imyaka yabo, kimwe mu bifasha guhangana n'imihindagurikire y'ikirere kugira ngo umusaruro uboneke

Mu Karere ka Bugesera ni  hamwe mu hakunze kwibasirwa n’izuba  aho bituma abahinzi bahura n’ikibazo cyo kudahinga ibihembye byose by’ihinga. Ku bufatanye bw’umushinga  Hinga Weze n’akarere ka Bugesera, abaturage batuye mu Murenge wa Mayange, mu mudugudu wa Rwarusaku bubakiwe uburyo bubafasha kuhira imyaka hifashishijwe imirasire y’izuba.

Nyuma yo gutangiza ubu buryo ku mugaragaro muri Nyakanga 2020, abahinzi bibumbiye muri Koperative Abakoranamurava bakorera ubuhinzi iruhande rw’ikiyaga cya Cyohoha bagaraza ko  byabafashije cyane kuko batakikanga imihindagurikire y’ikirere nka mbere.

Ndaberetse Daniel yatangarije Imvaho Nshya ko  agereranyije n’uko  bahingaga mbere ubu ari byiza cyane kuko  aya amazi yabafashije ikintu kinini. Ati : “ Ubu  turahinga nta bwoba dufite ko izuba rizava imyaka yacu ikarumba kuko twuhira nka  kabiri mu cyumweru.”

Uyu muhinzi agaragaza ko mbere yajyaga akoresha moteri bikamutwara amafaranga menshi ariko ubu yuhira nta kiguzi akaba ashimira umuterankuga wabafashije kububakira iki gikorwa remezo.

Kamaraba Patricia nawe ubarizwa muri iyi Koperative Abakoranamurava yavuze ko  uretse kuhira imyaka banigishijwe ubundi buryo bwo guhangana n’imihindagurikire y’ikirere bwo    gusasira imyaka kuko bifata amazi bigatuma buhira nka kabiri mu cyumweru. Nawe avuga ko mbere guhinga byabavunaga kuko bahingaga gusa hafi y’ikiyaga cyane kandi bakuhira imyaka  bakoresheje Arozwari.

Aba bahinzi bakaba baratangiye bahinga imiteja, uresenda, intoryi n’inyanya ku buso bwa hegitari 10.

 Higa Weze  ni umushinga watangijwe mu Rwanda  ku bufatanye n’Ikigo k’Igihugu Gishinzwe Guteza Imbere Ubuhinzi n’Ubworozi (RAB) ku nkunga y’Umuryango w’Abanyamerika wita ku iterambere mpuzamahanga (USAID) mu gihe cy’imyaka 5 (2017-2022)  ukaba ugamije kuzamura mu buryo burambye umusaruro w’abahinzi n’aborozi bato, kuzamura imirire y’abagore n’abana no kongera imbaraga z’ubuhinzi n’ibiribwa mu Rwanda mu bihe by’imihindagurikire y’ikirere.

Uhagarariye umushinga Hinga Weze  mu Karere ka Bugesera,  Kamuzima Phoibe avuga bafatanyije na RAB  muri gahunda ya “Twigire Muhinzi” bahugura  abajyanama b’ubuhinzi  n’abajyanama b’ubuzima  nk’urwego rufasha abaturage rubegereye mu mudugu nabo bakigisha abahinzi baturanye.

Uhagarariye umushinga Hinga Weze  mu Karere ka Bugesera,  Kamuzima Phoibe

Yagize ati:  “Dukora uturima shuri kugira ngo umuhinzi abashe kwigishwa n’igihingwa, iyo igihingwa gikuze neza  nta ndwara, umuhinzi yagifashe neza  ndetse akabona ko kibashije kwihanganira imihindagurikire y’ikirere nk’ahantu nk’aha harangwa n’izuba, ibyo  bituma umuhinzi nawe ubwe abasha gusobanukirwa  neza ko ashobora gukora  ubuhinzi buhangana n’imihindagurikire y’ikirere kandi akabona umusaruro  igihe cyose.”

Uretse ibikorwa byo kuhira imyaka, Mukamuzima avuga Hinga Weze yafashije abahinzi bahinga ku buso bwa hegitari 100 gukora imirwanyasuri  ituma amazi  yajyaga atembana ubutaka ahagarara muri ya miringoti hanyuma akamanuka mu butaka aho kugira ngo atembane ubutaka  abujyane mu kiyaga.

Ikindi  ni  uko kuri  iyo mirwanyasuri  bigisha abahinzi guteraho ibiti bivangwa n’imyaka birimo Gereveriya, Kariyandara, Resena n’ubundi bwoko butandukanye.

Bimwe mu biti bivangwa n’imyaka

Yagize ati: “Ibyo biti rero bifite akamaro ko gufata ubutaka ndetse bikanakurura Azote  ikamanuka mu butaka, amababi y’ibyo biti kandi  atanga ifumbire  ndetse bimwe muri ibyo biti bigaburirwa n’amatungo.”

Mukamuzima avuga ko abahinzi  bigishwa uburyo bwo gukoresha ifumbire y’imborera iboze neza n’isaso byose bigamije guhanga n’imihindagurikire y’ikirere.

Umuhinzi ashyira mu murima ifumbire y’imborera

Umwe mu bahinzi yerekwa bimwe mu byiza byo gusasira imyaka

Nyuma yo kubaka uburyo bufasha abahinzi kuhira imyaka muri Nyarugenge, Mayange na  Rweru, Hinga Weze ubu irimo kubaka mu Murenge wa Kamabuye  ibigega by’amazi 6 aho bizafasha abahinzi kuhira imyaka ku buso bwa hegitari 50.

Ahari kubakwa Site nshya mu murenge wa Kamabuye

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.