Bugesera: Ababyeyi barasabwa gutanga umusanzu ireme ry’uburezi rikagerwaho

Yanditswe na Uwimana Donatha

Ku ya 02-12-2019 saa 07:10:39
Abayobozi batandukanye baganira ku bijyanye n'imitangire ya serivisi mu karere ka Bugesera

Ubuyobozi bw’Akarere ka Bugesera burasaba Ababyeyi guhindura imyumvire bagafasha kugira ngo ireme ry’uburezi rigerweho ku gipimo gishimishije.

Byatangajwe nyuma y’aho abayobozi batandukanye bakora mu rwego rw’Igihugu rw’Imiyoborere, RGB, bagiranye ikiganiro  n’Inama Njyanama y’akarere, abayobozi b’amashami, abafatanyabikorwa b’Akarere ka Bugesera ku ruhare rwabo mu kwimakaza imiyoborere myiza, uko abaturage babona serivise bahabwa, n’ibindi.

Kuri Serivisi zitangwa mu rwego rw’Uburezi, ubushakashatsi buherutse gukorwa na  RGB ku bijyanye n’imitangire ya serivice bwerekanye ko ababyeyi bishimira ireme ry’uburezi ku gipimo cya 68% naho 38% bakaba bavuga ko batishimiye ireme ry’uburezi.

Gashumba Jacques, umuyobozi w’ishami ry’uburezi muri aka karere, mu kiganiro yagiranye n’Imvaho Nshya, yavuze ko ababyeyi kuba bavuga ko uko babona ireme ry’uburezi bajijutse bigaragara ko bakurikirana aho usanga batandukanye n’abo mu myaka 5 -10 ishize.

Ati: “Kwishimira ko abanyeshuri bajya mu mashuri ni ikintu kiza, ariko nanone ababyeyi bakareba niba abana bageze ku ishuri ni iki bahasanga, ibyo rero bituma umubyeyi yumva afite inyota yo kuba yakwigisha umwana we akajya mu ishuri kuko rimuha rya reme rifatika.

Iyo umubajije uko umwana yiga bitewe n’umusaruro azana, hari igihe akubwira ngo nta kigenda, aya mashuri ntakora neza. Gusa wajya kubaza umubyeyi uruhare rwe kwa kudatsinda ugasanga yabigizemo uruhare.”

Abayobozi bakaba barasabwe kwigisha umubyeyi gufasha umwarimu kugera ku ireme ry’uburezi, dore ko hakiri n’ikibazo cy’abanyeshuri benshi imbere y’umwarimu umwe aho usanga mwarimu atakwifasha kugera ku Ireme ry’uburezi.

Gashumba avuga ko ariko hari n’amashuri amwe n’amwe adafite umuriro aho usanga mudasobwa zidakoreshwa, amashuri ari mu giturage aho usanga wa mwana kugira ngo abe ajijutse ashingira kuri mwarimu gusa, ibyo na byo bikadindiza ireme ry’uburezi uretse ko ibi bibazo bikorerwa ubuvugizi.

Yavuze ko ireme ry’uburezi kugira ngo rigerweho bisaba ibintu byinshi harimo: integanyanyigisho, umubare w’abarimu, ibikorwa remezo, amashuri (ibitabo n’izindi mfashanyigisho), ababyeyi n’ubuyobozi.

Hatangajwe ko Akarere karimo kwishakamo ibisubizo hubakwa amashuri mashya mu kugabanya ingendo z’abana, kongera ibyumba ku mashuri asanzwe, kongera mudasobwa mu mashuri, guha umuriro amashuri atawufite n’ibindi. Ubu ibigo 10/21 bitagiraga umuriro byahawe ‘solar’ ingufu zitangwa n’imirasire y’izuba.

Ikindi yavuze ko REB yabageneye abarimu 205 (A2) bashya bazigisha mu mashuri abanza mashya, abarimu 60 (A1) bazigisha muri mashuri yisumbuye na 84 (A0) basimbura abigishaga batabifitiye ubushobozi.

Ati: “Turakomeza ubukangurambaga mu guhindura imyumvire y’ababyeyi binyuze mu nama zisanzwe ziri muri gahunda y’Akarere.”

Dr. Usengumukiza Felicien, Umuyobozi ushinzwe ubushakashatsi muri RGB n’itsinda ry’abashakashatsi, avuga ku bijyanye n’ireme ry’uburezi, yibukije ko mbere kwiga byari amahirwa none bisigaye ari inshingano z’umwana n’umubyeyi.

Imbogamizi zagaragajwe zirimo ni uko mu ishyirwa mu bikorwa ry’iburezi kuri bose hari ahagaragara ubucucike mu mashuri. Abana bimurwa ari benshi kugira ngo n’abari inyuma babone imyanya.

Umwanditsi:

Uwimana Donatha

Tanga Igitekerezo

Email yanyu ntigaragazwa ku rubuga. Amazina na Email ni ngombwa.