18°C , Partly cloudy | Kigali-Rwanda

Bruce Melodie yongerewe mu gitaramo cyatumiwemo Jidenna

Yanditswe na Gisubizo Gentil

Ku ya 06-11-2019 saa 13:35:24
Bruce Melodie ukunzwe mu ndirimbo Katerina azasusurutsa abazitabira igitaramo cya Kigali Jazz Junction

 

Itahiwacu Bruce wamamaye mu muziki nka Bruce Melodie, niwe muhanzi rukumbi w’umunyarwanda uzaririmba mu gitaramo cya Kigali Jazz Junction cyatumiwemo icyamamare Jidenna.

Bruce Melodie uherutse gushyira hanze amashusho y’indirimbo “Katerina” ikunzwe muri iki gihe, yaherukaga kuririmba muri Kigali Jazz Junction mu gitaramo yahuriyemo n’umunyabigwi mu muziki,  nyakwigendera Oliver Mtukudzi.

Uyu muhanzi uri mu bakunzwe cyane mu ndirimbo nyinshi zazamuye igikundiro cye mu bantu, amaze kuririmba mu birori no mu bitaramo bikomeye muri uyu mwaka.

Ni umwe mu bahanzi b’abanyarwanda bafite indirimbo zikunzwe ahanini bitera n’ubuhanga mu miririmbire ye.

Bruce Melodie afite indirimbo zitandukanye zamuhesheje kuba ari mu bahanzi bakunzwe cyane, muri zo twavuga indirimbo nka “Complete me”, “Ndakwanga”, “Ndumiwe”, “Ntundize” n’izindi nyinshi.

Ibi byamuhesheje ibihembo bitandukanye yegukanye abikesha umuziki.

Ku mugoroba wo ku wa 05 Ugushyingo 2019, nibwo kompanyi ya Rg Consult itegura ikanashyira mu bikorwa ibitaramo bya Kigali Jazz Junction, yatangaje ko iki gitaramo kizaba kuwa 29 Ugushyingo 2019 muri Kigali Conference and Exhibition Village ahazwi nka Camp Kigali mu ihema ry’Akagera.

Bavuze ko muri iki gitaramo hazifashishwa itsinda rya Nep Djs, Dj Marnaud, Neptunez Band, Nganji na Kinga Blues.

Jidenna agiye gutaramira i Kigali nyuma y’umuhanzi w’umunyabigwi ukomoka muri Repubulika Iharanira Demokarasi ya Congo(RDC), Awilo Longomba wanyuze imitima yabenshi mu gitaramo giheruka.

Jidenna ni umunyamerika w’umuraperi, umuririmbyi, umuhimbyi unatunganya amajwi wavukiye muri Leta ya Imo muri Nigeria. Yaje imbere ku rutonde rw’abahanzi batatu RG Consult yatanze abafana bemeza ko ari we bashaka kubona abataramira mu Ugushyingo 2019.

Jidenna wakunzwe cyane mu ndirimbo ‘Classic Man’ aje gutaramira abanyabirori b’i Kigali nyuma y’amatora yarahuriyemo n’abandi bahanzi aho yabahigitse ku amajwi 60% agakurikirwa na Vanessa Mdee wo muri Tanzania wagize amajwi 30% naho MI Casa wo muri Afurika y’Epfo agira amajwi 9%.

Mu 2015 nibwo Jidenna yashyize hanze indirimbo ‘Classic Man’ yamwubakiye izina akurikizaho na ‘Yoga’ aho izi zombi zamwongereye igikundiro.

Kubera uburyo indirimbo ‘Classic Man’ yakunzwe cyane ku isi byaje gutuma kuwa 15 Nyakanga 2015 ayisubiramo aho yafatanyije na Kendrick Lamar, ikaba imaze kurebwa na Miliyoni 51 kuri Youtube.

Naho ku wa 20 Gashyantare 2019 ashyira hanze amashusho y’iyi ndirimbo ‘Classic Man’ afatanyije n’umuhanzi GianArthur; imaze kurebwa n’abantu Miliyoni 68 zirenga ku rubuga rwa Youtube.

Umwanditsi:

Gisubizo Gentil

Tanga Igitekerezo

Email yanyu ntigaragazwa ku rubuga. Amazina na Email ni ngombwa.