23°C , Mostly cloudy with thundershowers | Kigali-Rwanda

BPR Atlas Mara yorohereje abakiriya kwishyura badakoze ku mafaranga

Yanditswe na admin

Ku ya Jan 29, 2018 saa 8:18

Mu gihe Guverinoma y’u Rwanda ikomeje guteza imbere gahunda y’ubukungu budashingiye ku guhererekanya amafaranga mu ntoki, Banki y’Abaturage y’u Rwanda (BPR Atlas Mara) yatangiye korohereza abakiriya bayo kwishyura serivisi zirimo n’iza Leta  bifashishije ikoranabuhanga.

Umuyobozi Mukuru wa BPR Atltas Mara Maurice K. Toroitich mu kiganiro n’abanyamakuru

Izo serivisi nshya zatangijwe zirimo izo kwishyura gahunda za Leta uciye ku rubuga ‘Irembo’ harimo nk’icyemezo cy’amavuko, uruhushya rwo gutwara ibinyabiziga rw’agateganyo n’urwa burundu, icyemezo cy’uko utafunzwe (Criminal record) n’icyemezo cyo gushyingirwa.

Abakiriya ba BPR bashobora kandi kwishyura serivisi zinyuranye bakoresheje internet cyangwa telefoni mu kwishyura umuriro, kwishyura imisoro, kwishyura amazi, abonnement ya DSTV na Star Times, kwishyura imishahara no kohereza amafaranga kuri konti zo mu mabanki atandukanye hatabayeho kubanza kubyemereza kuri banki.

Ntibikiri ngombwa ko ukenera kugura umuriro, amazi na serivisi z’irembo ngo ubanze ujye kujya kuri banki

Uburyo bwo gukoresha telefoni mu guhererekanya amafaranga na bwo bwavuguruwe ku buryo abakiriya bashobora kohereza amafaranga ku zindi konti batabanje kugera kuri banki.

Icyo umukiriya ufite Smartphone asabwa ni ugutunga ‘Application’ ya BPR abonera ku buntu; utarabona iyi serivisi asabwa  kugana  ishami rya banki rimwegereye kugira ngo bamwandikishe muri iri koranabuhanga.

BPR Atlas Mara yanakoranye na sosiyete z’itumanaho mu gufasha abakiriya bayo kuba babikuza bakoresheje Tigo Cash na Mobile Money. Umukiriya asabwa kuba afite konti muri banki  ndetse ari n’umufatabuguzi wa Tigo cyangwa MTN.

Kohereza amafaranga kuri konti ukoresheje Tigo Cash usabwa gukanda *500# ugakurikiza amabwiriza na ho MTN Mobile Money ugakanda *182#. Mu gihe wohereza amafaranga ava kuri konti ajya kuri iyi mirongo, usabwa gukanda *150#.

Telefoni yawe yagufasha byose nko guhumbya utavuye aho uri

Nk’uko bitangazwa n’Umuyobozi  Mukuru wa BPR Atltas Mara Maurice K. Toroitich izi serivisi z’ikoranabuhanga zigamije kwagurira amahirwe abakiriya yo kubona serivisi nziza kandi zihuse aho baba bari hose batarinze kujya kuri banki.

Yakomeje avuga ko ubu ari bumwe mu buryo bwo gufasha abakiriya bayobotse ikoranabuhanga gukomeza kuryoherwa n’ibyiza byaryo, anashimangira ko n’abatararikoresha BPR Atlas Mara yiyemeje kubigisha, cyane ko ari yo banki igera mu mpande zose z’igihugu.

Maurice K. Toroitich yagize ati “Ubu umukiriya ntagikeneye kwirukira kuri banki atinya ko igiye gufunga, cyangwa igicuku cyaniha agategereza ko bucya. Ubu ikoranabuhanga rya internet rishobora kugufasha ako kanya igihe umukiriya yamaze kuryiyandikishamo. ”

Umuyobozi Mukuru wa BPR Atltas Mara Maurice K. Toroitich

Yakomeje ashimangira ko BPR Atlas Mara itirengagije umutekano w’amafaranga y’abakiriya bayo mu gihe yinjiranye imbaraga mu gukoresha ikoranabuhanga, ikaba ikomeje gukorana n’inzego bireba mu gucungira hafi ubujura cyangwa ibindi byaha byakorwa hifashishijwe ikoranabuhanga.

Yashimiye ko uko abakiriya ba BPR Atlas Mara bagenda biyongera ndetse n’ibyo bakenera bikiyongera bazakomeza kuvugurura uburyo bahabwa serivisi, bidakuyeho no gukomeza gufasha abataragera ku ikoranabuhanga mu buryo bunoze.